Leh wưng Têt Djuê ana truh kơ ară anei, grăp hruê, Adŭ ksiêm mkă dlăng klei ruă, Sang êa drao mdrao klei ruă hlăm phung hđeh čar Gia Lai mdrao mơ̆ng 150 truh kơ 200 čô hđeh mâo klei ruă djŏ tuôm kơ êlan bi êwa. Amai Rơ Mah H’Blê, mbĭt hŏng ung mơ̆ng să Dun, kdriêk Čư̆ Sê, ba anak mrâo 10 mlan nao ksiêm mkă dlăng, brei thâo:

 “Anak kâo dŭm hruê êlâo nao dŏng mdrao ti kdriêk Čư̆ Sê. Leh kbiă mơ̆ng sang êa drao ăt dôk êngoh mơh, mmăt ñu êngoh yơh, mtŭk lu, kyua anăn kâo ba anak hriê ksiêm mkă dlăng tinei (Sang êa drao mdrao klei ruă hlăm phung hđeh čar Gia lai). Aê mdrao bi mklă ĕ ruă hlăm ksŏ, brei êa drao wĭt mnăm ti sang lehanăn bi kčah 2 hruê êdei lŏ ksiêm mkă dlăng. Ti să kâo ăt mâo lu phung hđeh mâo klei ruă snei.

Ti anăp klei mâo dleh dưi ksiêm dlăng lehanăn ênoh mnuih ruă hlăm êlan bi êwa đĭ, lu mnuih ƀuôn sang ruah leh hdră nao tlŏ vaccine gang mkhư̆ klei ruă hdrak. Aê mdrao Huỳnh Nguyễn Hồng Điệp, Anôk bruă tlŏ mgang mơ̆ng Adŭ ksiêm dlăng klei ruă Sydmec, ƀuôn hgŭm Phù Đổng, ƀuôn prŏng Pleiku brei thâo, grăp hruê anôk bruă mâo hlăm brô 50 čô hđeh nao tlŏ vaccine gang mkhư̆ hdrak. Anei jing hdră msir tŭ dưn čiăng pral gang mkhư̆ klei ruă hlăm êlan bi êwa hlăk dôk đĭ lu.

 “Leh tlŏ vaccine hdrak srăng bi hrŏ ênoh mnuih nao đih mdrao lehanăn klei truh kjham. Mbĭt anăn, hŏng phung khua mduôn, phung hđeh, mnuih toh hroh ai bi kdơ̆ng hŏng klei ruă snăn hdră tlŏ vaccine jing hdră msir tŭ dưn čiăng đru kơ mnuih ruă bi hrŏ klei hmăi amâo jăk mơ̆ng hdrak ngă, bi hrŏ klei tưp lar mơ̆ng kman hlăm êpul êya.

Thạc sĩ, aê mdrao Từ Thị Mai Linh, Kơiăng khua Sang êa drao mdrao klei ruă hlăm phung hđeh čar Gia Lai, brei thâo, yan adiê thu krô mâo sui msĕ ară anei srăng mđĭ ênoh mnuih mâo klei ruă hdrak. Khădah klei ruă hdrak anei srăng hlao hlăm sa wưng, ƀiădah phung ênưih mâo klei ruă anei lu msĕ si phung hđeh gŭ 5 thŭn, boh nik gŭ 2 thŭn, mnuih khua thŭn, mnuih mâo klei ruă mơ̆ng êlâo lehanăn mnuih mâo ai bi kdơ̆ng hŏng klei ruă awăt, klei ruă anei srăng ngă lu klei truh kjham msĕ si ruă hlăm ksŏ, ruă kboh, ruă hlăm kŏ dlô, awăt asei mlei, đa đa hlŏng truh kơ djiê.

Aê mdrao Mai Linh mtă brei răng, tơdah mâo klei bi êdah msĕ si êngoh, êăt asei mlei, êmăn êmik, ruă hlăm klang, aruăt ariêng, brei mnuih ƀuôn sang nao mtam kơ anôk bruă mdrao mgŭn ksiêm mkă dlăng lehanăn mdrao hluê si klei ktrâo lač. Mbĭt anăn, brei mnuih ƀuôn sang mâo hdră gang mkhư̆ klei ruă kñăm rŏng klei suaih pral:

 “Hdrak jing sa klei ruă kyua kman ngă kyua anăn amâo mâo êa drao mdrao jih ôh, knŏng bi hrŏ klei bi êdah lehanăn klei truh amâo jăk djŏ tuôm kơ êlan bi êwa. Kyua anăn, gang mkhư̆ klei ruă jing hdră msir yuôm bhăn hĭn. Êlâo hĭn, brei bi mdoh asei mlei, adŭng, kŏng đŏk, huă ƀơ̆ng djăp ênŭm mta tŭ jăk kñăm mđĭ klei suaih pral, bi mdoh wăl anôk hdĭp mda, boh nik brei nao tlŏ vaccine gang mkhư̆ klei ruă hdrak mbĭt hŏng dŭm vaccine gang mkhư̆ klei ruă mkăn.

Yan adiê thu krô, angĭn srăng ngă mđĭ ênoh mnuih mâo klei ruă hdrak (lŏ pia jing kman hlăm êlan bi êwa). Thŭn anei, ti krĭng lăn dap kngư, yan adiê mâo dleh dưi ksiêm dlăng, khădah truh leh Yan mnga ƀiădah adiê ăt ê’ăt, ênoh hđeh mâo klei ruă hlăm êlan bi êwa ti čar mâo klei bi êdah đĭ lu.

Hluê Thạc sĩ, aê mdrao Từ Thị Mai Linh - Kơiăng khua Sang êa drao mdrao klei ruă hlăm phung hđeh čar Gia Lai, brei thâo, klei ruă hdrak srăng hlao leh sa wưng ƀiădah klei ruă anei huĭ srăng đĭ kơ ktrŏ lehanăn ngă truh kơ djiê, boh nik hŏng phung hđeh gŭ 5 thŭn, boh nik gŭ 2 thŭn, mnuih khua thŭn, mnuih mâo klei ruă mơ̆ng êlâo lehanăn mnuih mâo ai bi kdơ̆ng hŏng klei ruă awăt, mnuih êmŏng… Dŭm klei truh kjham kbiă hriê mơ̆ng klei ruă hdrak msĕ si: msĕ si ruă hlăm ksŏ, ruă kboh, ruă hlăm kŏ dlô, awăt asei mlei, kman hlăm êrah…

Aê mdrao mtă, ară anei, mnuih ƀuôn sang mâo klei mưng tơdah mâo klei ruă kreh blei êa drao wĭt mnăm, amâo mâo nao ksiêm mkă dlăng kơ phung aê mdrao. Kyua anăn tơdah mâo klei bi êdah msĕ si êngoh, êăt asei mlei, êmăn êmik, ruă hlăm klang, aruăt ariêng… brei mnuih ƀuôn sang nao mtam kơ anôk bruă mdrao mgŭn ksiêm mkă dlăng lehanăn mdrao hluê si klei ktrâo lač. Klei ruă hdrak dưi gang mkhư̆ hluê hdră tlŏ vaccine. Anei jing hdră msir tŭ dưn kñăm gang mkhư̆ klei djŏ lehanăn dŭm klei truh amâo jăk mơ̆ng klei ruă anei. Brei mnuih ƀuôn sang nao tlŏ vaccine čiăng gang mkhư̆ klei ruă./.