Hŏng 30 thŭn ngă bruă, amai H’Er Niê Kđăm, Pô ngă bruă thơ̆ng hlăm Adŭ bruă djuê ana kdriêk Čư̆ Mgar, čar Dak Lak yăl dliê, ñu ƀuh klei đru jăk kơ phung knuă druuh mdei êlâo kơ jih thŭn mă bruă hlue si Hdră mtrŭn 178 jing djŏ guôp. Amai H’Er đăo knang, phung mda asei srăng mđĭ lar hĭn klei thâo pô leh anăn ñu  pô ăt srăng mâo klei đru mguôp jăk kơ êpul êya anôk pô hdĭp mda.

Leh mdei mă bruă, kâo srăng wĭt ti ƀuôn sang. Hlăm hdră mă bruă pô mâo leh lu klei thâo srăng wĭt hŏng ƀuôn sang, ya klei mnuih ƀuôn sang ka thâo snăn srăng đru kơ mnuih ƀuôn sang, tă hdră kơ mnuih ƀuôn sang ngă bruă duh mkra mđĭ kyar. Tơdah pô dưi hgŭm mă bruă ti alŭ ƀuôn pô srăng gĭr đru kơ ƀuôn sang.

Msĕ snăn mơh, Kỹ sư Nguyễn Ngọc Giao, Khua adŭ bruă lŏ hma leh anăn mđĭ kyar krĭng ƀuôn sang kdriêk Čư̆ Mgar, ăt ngă hră akâo mdei êlâo kơ jih thŭn mă bruă. Giao đăo knang, klei ngă bi khuăt êpul mă bruă hlăm jih bruă kđi čar srăng ba klei tŭ dưn sui kơ mnuih ƀuôn sang leh anăn klei đĭ kyar hơĭt kjăp. Hŏng bruă  lŏ hma, srăng đru mđĭ kyar bruă lŏ hma hnơ̆ng jăk, ba prăk hrui wĭt jăk kơ mnuih ƀuôn sang.

 “Kâo čang hmăng phung lŏ čuê êdei anei srăng mđĭ lar ai tiê đua klam leh anăn boh tŭ phung nao êlâo ngă leh čiăng mđĭ klei tŭ dưn, klei jăk hlăm klei hlue ngă bruă klam kđi čar mơ̆ng Đảng leh anăn Knŭk kna mbha”

Yap truh hruê 10/1, kdriêk Čư̆ Mgar mâo leh 16 čô knuă druh čih hră akâo mdei bruă êlâo kơ jih thŭn mă bruă. Nguyễn Thiên, K’iăng Khua dlăng bruă Đảng kdriêk Čư̆ M’Gar brei thâo, Anôk dlăng bruă  Đảng srăng ksiêm dlăng djăp boh lei, rơ̆ng klei dưi djŏ guôp hlue si hdră bhiăn. Nguyễn Thiên ăt mñă klă:

 “Kâo ƀuh phung mă bruă ătt ƀuh leh hdră kñăm, klei yuôm bhăn mơ̆ng bruă bi khuăt êpul mă bruă. Tơdah ngă klei mblang snăn diñu ăt mơak, anăn hlăm bruă mkŏ mjing mă bruă digơ̆ čŏng ngă snăn Anôk bruă Đảng ăt ênưih hĭn lehh anăn tơdah mâo klei đru hlue si hdră êlan snăn ăt gĭr mjing klei găl kơ digơ̆ dưi dưn hlue si hdră kčah.”

 Mbĭt hŏng Čư̆ Mgar, dŭm alŭ wăl mkăn hlăm čar Dak Lak ătt mâo lu phung knuă druh akâo mdei bruă êlâo kơ jih thŭn mă bruă hlue si Hdră mtrŭn 18. Mâo leh 77 čô knuă druh, đảng viên hlăm Anôk dlăng bruă Đảng čar kdriê dlăng, hlăm anăn mâo 2 čô Khua hlăm bruă Đảng čar, 1 čô Khua dlăng bruă Đảng kdriêk čih hră akâo mdei êlâo kơ jih thŭn mă bruă. Jing Khua dlăng bruă Đảng kdriêk tal êlâo tti Dak Lak čŏng čih hră akâo mdei bruă êlâo kơ jih thŭn mă bruă hlăk êjai adôk 6 thŭn mă bruă, Ra Lan Vôn Ga, Khua dlăng bruă Đảng kdriêk Mdrak brei thâo:

 “Kâo mdei snăn čang hmăng mâo anôk kơ êpul bruă ăt msĕ mơh hlăm bruă dăp, bi mŭt mâo knuă druh mda asei jăk hĭn, pral hĭn kâo čiăng lŏ dơ̆ng mă bruă leh anăn duh myơr đru kơ kdriêk leh anăn kơ čar ƀrư̆ đĭ kyar. Tơdah kâo dưi mdei, lŏ mâo klei găl, klei suaih pral leh anăn klei thâo kâo srăng duah bruă mă djŏ guôp čiăng lŏ dơ̆ng mđĭ kyar pô ăt msĕ mơh êpul êya ala ƀuôn.

 Nguyễn Thượng Hải, Khua Anôk bruă mkŏ mjing Bruă Đảng čar Dak Lak brei thâo, hlue si hdră, čar srăng bi hrŏ ƀiă êdi 15% anôk phŭn hlăm lam leh bi mŭt leh anăn bi hrŏ 20% čô mnuih mă bruă. Bruă phung knuă druh, đảng viên čŏng  čih hră akâo mdei êlâo kơ jih thŭn mă bruă jing bruă năng mpŭ, mơ̆ng anăn đru kơ čar găl ênưih hĭn hlăm bruă hlue ngă Hdră dăp, bi khuăt êpul mă bruă:

 “Mâo lu phung mă bruă adôk êbeh 5 thŭn mă bruă ătt djăp thŭn lŏ ngă bruă klam hlăm wưng kơ anăp, ƀiădah diñu ăt bi mklă mjing klei găl kơ phung mda asei gĭr ktưn mđĭ kyar bi mlih ktang, êdah kdlưn čiăng ba alŭ wăl, anôk bruă đĭ kyar ktang hĭn ăt msĕ mơh đru lăn čar drei bi mlih”.

 Bruă phung knuă druh čŏng ngă hră akâo mdei êlâo kơ jih thŭn mă bruă ti Dak La dôk mjing klei găl kơ čar hlăm bruă bi khuăt êpul mă bruă. Anei ăt jing klei ba jao bruă klam, đru mđĭ klei tŭ dưn ngă bruă, mjing boh kdrŭt kơ Dak Lak đĭ kyar./.