Hlăm klei kkuh mơak knăm hrue kgŭ krŭ kdơ̆ng mlan 8 lehanăn hrue mkŏ mjing lăn čar hrue 2/9, aguah mbrue (20/08), ti sang bi kƀĭn ala čar, knăm bi hdơr 80 thŭn hrue mkŏ mjing knŭk kna (28/8/1945 - 28/8/2025) mâo mkŏ mjing kdrăm k’ah. Lŏ bi hdơr wĭt hƀuê ênuk, khua knŭk kna Phạm Minh Chính lač: Hrue 28/8/1945, Knŭk kna jing jai Việt Nam Dân chủ Cộng hoà mâo hưn mdah ti anăp jih jang mnuih ƀuôn sang, lehanăn hŏng tar rŏng lăn, kơ bruă mkŏ mjing knŭk kna mrâo, lehanăn bi êdah mâo 15 čô phung khua prŏng mâo leh Khua gĭt gai Hồ Chí Minh jing khua kiă kriê, kruak knăl kơ klei mkŏ mjing knŭk kna Cách mạng tal êlâo hlăm dăl hƀuê ênuk dŭm êbâo thŭn rŭ mdơ̆ng lehanăn răng mgang lăn čar mơ̆ng djuê ana. Dăl hlăm 80 thŭn, găn leh lu klei dleh dlan, klei lông dlăng, ti gŭ klei kiă kriê kjăp mơ̆ng Đảng, knŭk kna găn leh hlăm dŭm gưl kiă kriê hŏng ai tiê đua klam prŏng, mâo klei gĭr jih ai tiê mơ̆ng mnuih ƀuôn sang lehanăn lĭng kahan dưi ba wĭt leh klei tŭ dưn yuôm bhăn, hŏng klei jăk hlăm hƀuê ênuk kơ djăp mta.

Năng mđing êdi, knŭk kna mđing mghaih msir tŭ jing bruă dăp wĭt êpul khua kiă kriê hŏng klei khuăt, mă bruă kjăp, mkŏ mjing êpul khua kiă kriê khuăt, tŭ jing mkŏ mjing bruă sang čư̆ êa dua gưl, lehanăn mđĭ kyar kluôm dhuôm lăn čar. Blŭ gĭt gai hlăm knăm anăn, Khua gĭt gai Đảng Tô Lâm mtă lehanăn mâo klei čang hmăng phung bi ala lŏ dơ̆ng mđrăm mbĭt hŏng knŭk kna atăt lăn čar čhuang nao hlăm ênuk gưl mrâo kpưn đĭ mdrŏng sah, kreh dhar mơ̆ng djuê ana./.

Phung khua kiă kriê Đảng, nao ti anôk bi kƀĭn