Mơ̆ng akŏ thŭn truh kơ ară anei, dŭm boh adŭ hlăm êpul mkŏ mjing bruă Đảng čar Daklak dôk mă bruă hŏng klei mjêč. Dơ̆ng mơ̆ng klei ksiêm dlăng hră mơar, mkŏ mjing dŭm klei bi kƀĭn, mghaih msir djăp mta bruă mrâo hŏng klei pral, lehanăn amâo mâo anôk čhuai ôh. Tui si Kim Thị Hoài Thương, pô truăn hlăm bruă mơ̆ng adŭ bruă, klei mă bruă hŏng klei pral anei jing čiăng bi leh djŏ tui si klei kčĕ kơ bruă bi mŭt mbĭt, dăp wĭt êpul mă bruă, lehanăn ksiêm wĭt hnơ̆ng kjăp klei mă bruă hlăm grăp mlan:

“Leh drei ksiêm wĭt hlăm grăp mlan, snăn hrue mmông jing ƀiă hĭn êjai, snăn pô ƀuh jih jang bruă dôk ngă brei tui nao djŏ hlăm grăp mta, răng đăm mâo klei soh čhuai ôh, tơdah tăm soh hĕ hlŏng thâo ƀuh mtam, mghaih msir bi djŏ amâo mâo lŏ dôk guôn tơl jih thŭn ôh. Kâo mĭn mâo klei bhiăn mă bruă snăn srăng đru kơ mnuih mă bruă pral lŏ bi dlăng wĭt bruă knuă, mơ̆ng anăn mâo klei bi mlih bi jăk hĭn”.

 Amâo mâo djŏ knŏng hlăm bruă ksiêm wĭt kơ grăp čô mnuih mă bruă đuič ôh, klei bhiăn mrâo lŏ ba yua hŏng jih êpul lehanăn dŭm boh adŭ anôk bruă.  Nguyễn Thị Hồng Thúy, Khua adŭ bruă êpul mkŏ mjing bruă Đảng čar lač, anei jing bruă mrâo, čiăng bi mâo hdră êlan mă bruă kjăp hĭn, bi ktue ksiêm dlăng bruă knuă mơ̆ng grăp čô mă bruă, rơ̆ng bi mâo mnuih thâo lehanăn kjăp, lehanăn bi leh jih bruă jao:

“leh mâo mtrŭn klei čoh čuăn truh hŏng dŭm boh adŭ bruă, snăn gưl khua kiă kriê mtam jing phung kăp ksiêm dlăng bruă knuă ayŏng adei mă hlăm anôk pô mă bruă. Mơ̆ng klei bi ksiêm wĭt anăn, mâo klei hâo mdah klă ênŭm bruă knuă leh mâo ngă hlăm mlan, boh nik mơ̆ng grăp čô, lehanăn tăp hnơ̆ng mâo bi leh bruă knuă.”

 Tui si Nguyễn Thượng Hải, Khua anôk bruă mkŏ mjing bruă Đảng čar Daklak, klei ksiêm wĭt jih jang knuă druh mnuih mă bruă hlue hŏng hdră mrâo, bi yap grăp mta bruă mă, lehanăn hnơ̆ng dleh bruă knuă mă mơ̆ng dŭm bruă knuă. Amâo mâo djŏ knŏng čiăng kơ hmao ƀuh, lehanăn lŏ bi hriăm mbŏ klei thâo mă bruă hŏng phung dôk awăt hlăm bruă knuă.

Leh tlâo mlan mă bruă, klei bhiăn mrâo phŭn tal êlâo ba wĭt leh klei jăk. Phung knuă druh, mnuih mă bruă hlăm anôk bruă mâo bruă klam hĭn, čŏng ksiêm wĭt jih jang bruă ngă lehanăn bi hrŏ jih hnơ̆ng klei soh čhuai, êjai dôk ngă hlăm bruă kăp kčĕ. Siămdah, klei ksiêm wĭt mơ̆ng phung khua kiă kriê Êpul mkŏ mjing bruă Đảng čar, ăt adôk mâo lu klei bư̆ ban amâo mâo jăk jhŏng mghaih msir bi klă, ka mă bruă hŏng klei klă mngač ôh čiăng ktrâo brei ƀuh ti jing klei soh, klei čhuai mơ̆ng ƀĭng mă bruă mbĭt. Kyuanăn, hlăm wưng tinăp, anôk bruă srăng lŏ bi ksiêm wĭt hŏng klei klă mngač, mghaih msir bi ktang mtang ti jing bruă djŏ, ti jing bruă soh mơ̆ng grăp čô knuă druh:

“Boh sĭt čiăng lač jing, phŭn tal êlâo ayŏng adei ăt dôk ka mưng, ƀuh jing ngă ktang đei, ară anei diñu dơ̆ng mưng leh, lehanăn diñu bi sa ai, ƀuh klă mtam hlei pô thâo mă bruă lehanăn hlei pô dôk hlăm klei awăt. Mnĭ anei kơ tluôn duah bi tĭng msĕ sơăi, lač jing jăk sơăi, snăn mnuih mă bruă jăk sĭt ăt êdu ai mơh ƀuh mnuih mă bruă khă kơ leh, ăt mâo klei bi mni, kyuanăn ară anei lu ayŏng adei tŭ ư êdi kơ hdră êlan ksiêm wĭt klei mă bruă, čiăng kơ jih jang mnuih dưi bi leh jăk bruă kčah jao”.

Klei mlih mrâo hlăm hdră ksiêm wĭt knuă druh hlăm êpul mkŏ mjing bruă Đảng čar Daklak hlăk dôk ba wĭt klei tŭ dưn prŏng, mjing boh kdrŭt đru kơ phung knuă druh mâo klei bi ktưn hĭn, lehanăn mđĭ boh tŭ bruă knuă pô mă. Tơdah jih jang bruă ksiêm wĭt mâo ngă hŏng klei djŏ, snăn hdră êlan anei srăng dưi lŏ bi lar hlăm dŭm anôk bruă, kñăm bi kjăp jih jang knuă druh mă bruă, pioh kơ bruă pô mă jing jăk hĭn hlăm klei mkŏ mjing Đảng lehanăn jih jang bruă kđi čar./.