Thŭn hriăm 2024 - 2025 čar Kon Tum mâo 36 čô hđeh sang hră mâo klei pah mni hlăm gưl bi lông hđeh sang hră hriăm thâo gưl ala čar; 2 čô hđeh sang hră mâo klei pah mni hlăm klei bi lông kreh knhâo hdră mnêč gưl ala čar kơ phung hđeh sang hră gưl dua, gưl tlâo, ênoh hđeh sang hră mnuih djuê ƀiă nao hlăm Klei bi lông hriăm thâo gưl čar ƀrư̆ đĭ kơ ênoh leh anăn hnơ̆ng…

Phạm Thị Trung,  Khua Knơ̆ng bruă sang hră mtô bi hriăm čar Kon Tum, brei thâo, thŭn hriăm 2024 - 2025 hŏng klei blŭ: “Kjăp, đua klam - mlih mrâo, mbruă , bruă sang hră mtô bi hriăm mâo leh leh anăn êbeh hdră kñăm Klei bi kƀĭn bruă Đảng čar wưng 2020 - 2025 kčah leh. Klă klơ̆ng, bruă sang hră mâo leh klei tŭ êdah êdi, msĕ si ênoh hđeh nao sang hră dưi mtrŭt mjhar nao sang hră, hđeh dưi hriăm aguah tlam hlăm sa hruê leh anăn hđeh sang hră mnuih djuê ƀiă mâo djăp leh anăn êbeh hdră kñăm.