Hruê tal êlâo lŏ wĭt ti sang hră mơ̆ng nai mda asei Lê Thị Hồng Anh, 25 thŭn, ti să Čư̆ Êbur, ƀuôn prŏng Ƀuôn Ama Thuôt, hlăm ai tiê dleh dưi bi êdah. Djă ti kngan hră iêo nao kahan, Hồng Anh amâo mơh klei hơưi ƀiădah lu hĭn jing klei hơ̆k mơak kyua klei hmăng hmưi jing sa čô lĭng kahan dưi jing sĭt. Leh anăn hluê si Hồng Anh, jing sa čô lĭng kahan jing hdră lŏ čuê knhuah gru gŏ sang, sa klei hmăng hmưi mơ̆ng hlăk dôk điêt:

 “Amĭ Kha kâo jing Amĭ Việt Nam jhŏng ktang, đa đa ayŏng adei ñu leh anăn anak ñu jing lĭng kahan êngiă asei, kyuanăn kâo khăp êdi ao mtah lĭng kahan. Mphŭn kčưm, amĭ ama kâo uêñ mĭn kyua kâo jing mniê, ti anôk hriăm jing suăi êmăn, hjan mđiă. Ƀiădah ƀuh kâo čiăng êdi, gŏ sang ăt mđĭ ai leh anăn sa ai. Kyuanăn, kâo bi klă hdĭp jih ai mda asei leh anăn ngă hră akâo nao kahan.”

Bi đảng viên mda asei Phương Bắc Ƀuôn Krông (20 thŭn, mnuih djuê ana Êđê, ti ƀuôn Čuah, să Ea Ana, kdriêk Krông Ana) ăt lui kơ tluôn bruă dôk hriăm ti sang hră gưl krah dưh, ngă hră akâo nanao kahan. Phương Bắc bi mĭn kơ klei nao kahan jing wăl jăk čiăng kơ phung mda asei hriăm mjuăt, wăt hlăm klei suaih pral, klei thâo leh anăn klei mĭn:

Nao ngă kahan, kâo srăng gĭr hriăm mjuăt jăk dŭm klei hriăm čiăng mđĭ klei suaih pral. Kâo ăt srăng hriăm dŭm hdră hriăm kđi čar čiăng thâo klă hĭn kơ hƀuê ênuk djuê ana, mơ̆ng anăn mđĭ hĭn klei thâo kơ pô leh anăn gĭr jing lĭng kahan awa Hồ.

Tuôm nao ngă kahan hlăk thŭn 1990, Y-Tách Ƀuôn Krông, ama mơ̆ng Phương Bắc Ƀuôn Krông sa ai leh anăn mđĭ ai anak nao kahan hlăm gưl anei čiăng kơ anak dưi duh myơr, mjuăt asei pô hlăm bruă lĭng kahan, wăt kơ lui hĕ êjai bruă hriăm hră.

Kâo ăt đru kčĕ klei mĭn kơ anak mprăp nao kahan. Klei mjuăt hriăm hlăm lĭng kahan jing dleh dlan, suăi êmăn, čiăng kơ klei čŏng pô mjuăt hriăm čiăng mđĭ hĭn knhuah hdĭp leh anăn hdră bhiăn. Anak čiăng gĭr găn hlăm 3 mlan hriăm mjuăt anăn čiăng dưi dôk hlăm êpul lĭng kahan yang ƀuôn Việt Nam, đru hluê ngă klei hmăng hmưi mơ̆ng ai mda asei čiăng răng mgang ƀuôn sang, lăn čar.

Wưng ruah kahan thŭn anei, čar Dak Lak iêo mkă dlăng 10.373 čô mnuih ƀuôn sang. Hlăm anăn, 2.553 čô djăp hnơ̆ng čuăn nao kahan, mâo 3 čô mniê, 8 čô đảng viên, 162 čô leh jih hriăm gưl prŏng, gưl krah. Đại tá Niê Ta, khua gĭt gai knơ̆ng kahan čar – k’iăng khua Êpul gơ̆ng ruah kahan čar Dak Lak brei thâo bruă jao – tŭ mă lĭng kahan mâo leh dŭm anôk bruă leh anăn alŭ wăl mprăp kluôm ênŭm, ngă mtam ti hruê 13/2 kơ anăp. Đại tá Niê Ta bi klă, 100% mnuih ƀuôn sang nao kahan gưl anei jing mâo klei suaih pral, thâo săng klă kơ bruă klam pô:

 “Thŭn anei mâo êbeh 500 mda asei hlăm čar ngă hră akâo nao kahan, lu hĭn dŭm thŭn êlâo, anei jing klei năng mơak. Phung mda asei ară anei mâo klei thâo săng hĭn hlăm bruă klam mơ̆ng pô hlăm bruă mkŏ mjing leh anăn răng mgang lăn čar. Diñu mâo klei hriăm, mprăp duh myơr klei mĭn, ai tiê čiăng mkŏ mjing êpul lĭng kahan thơ̆ng kơ bruă, mrâo mrang.”

Phung mda asei msĕ si Lê Thị Hồng Anh, Phương Bắc Bkrông amâodah lu phung mda asei mkă ti Dak Lak, wăt dôk hlăm klei mdê mdê, ƀiădah mâo sa klei gĭr lŏ čuê knhuah gru cách mạng leh anăn duh myơr ai pô kơ bruă răng mgang lăn čar. Diñu dôk hdĭp jih ai mda leh anăn bi lar ai tiê khăp kơ lăn čar hlăm êpul êya./.