Hdră mkŏ mkra anôk bruă nah gŭ krĭng ƀuôn sang dôk, hdră mkŏ anôk dôk mrâo să Dă Hoai, čar Lâm Đồng jing sa hlăm dŭm hdră phŭn mkăp kơ bruă mkŏ anôk dôk mrâo mơ̆ng hdră êlan êran pral Tân Phú – Bảo Lộc. Hdră mâo ênoh duh êbeh 150 êklai prăk. Mbĭt hŏng klei hmăi kyua hjan lu, snăn bruă êmưt hluê ngă lŏ kbiă mơ̆ng klei dleh dla hlăm bruă msir mghaih anôk ala. Lê Bảo Thi, kriê dlăng hdră mkŏ mkra anôk bruă nah gŭ krĭng mnuih ƀuôn sang dôk brei thâo, êpul ngă mkra mprăp leh ênŭm kdrăp mnơ̆ng, maĭ mŏk, mnuih mă bruă, mprăp mtrŭt mđĭ bruă hluê ngă dŭm hdră msir mghaih klei gun kpăk.

 “Ară anei mnuih mă bruă ti anôk bruă ƀiă êdi 60 čô, hluê ngă jih jang bruă dôk mâo. Knŏng dôk guôn hruê mđiă, snăn mnuih mă bruă srăng ngă mtam. Truh hruê 3/12, srăng ba jao kơ mnuih hluê ngă hdră mkŏ anôk dôk mrâo”.

Thŭn 2025, ênoh duh ngăn prăk knŭk kna mơ̆ng čar Lâm Đồng 18.700 êklai prăk. Hlăm 7 mlan, kluôm čar mâo mkăp hlăm brô 30% hdră kčah. Hdră mkăp prăk knŭk kna êmưt kyua kpăk gun lu hlăm klei msir mghaih anôk ala. Ară anei lu hdră bruă ngă leh, hră mơar leh mơh, ƀiădah kpăk gun kơ klei msir mghaih anôk ala snăn ka dưi pŏk ngă.

Hồ Văn Mười, Khua anôk bruă sang čư̆ êa čar Lâm Đồng brei thâo, čiăng ngă leh hdră mkăp prăk knŭk kna thŭn 2025 mâo êbeh 95%, čar brei mâo klei gĭr prŏng. Hlăm anăn, hdră msir mghaih anôk ala jing bruă yuôm bhăn, brei jih anôk bruă kđi čar ngă mbĭt.

 “Klei thâo mơ̆ng phung knuă druh msir mghaih anôk ala jing yuôm bhăn. Hlei pô mă bruă amâo thâo, ngă dleh kơ knuă druh jing klei amâo dưi ôh. Kyua anăn, brei ruah mnuih, si srăng ruah, hdră ngă bruă si srăng ngă. Snăn hdră mtrŭt mjhar klei msir mghaih anôk ala brei jih anôk bruă kđi čar bi ngă mbĭt./.