https://vov4.vov.vn/ede/hdra-mtrun-leh-anan-klei-hdip-chinh-sach-cuoc-song/lam-lui-sang-ti-ruc-mko-mjing-ai-tie-dao-knang-ti-dum-buon-sang-lan-dap-kngu-492154.vov4

https://vov4.vov.vn/ede/hdra-mtrun-leh-anan-klei-hdip-chinh-sach-cuoc-song/lam-lui-sang-dok-ejai-sang-ti-ruc-mko-mjing-klei-dao-knang-ti-dum-buon-elan-lan-dap-kngu-klei-cih-tal-1-ai-ieo-jak-klei-hmang-hmui-duh-myor-mong-hdra-lam-lui-sang-dok-ejai-492292.vov4

Hlăm boh sang mrâo prŏng 60m², ayŏng Y Lô Ksor, djuê ana Êđê ti ƀuôn Hiâo, să Ea Hleo, čar Dak Lak amâo dưi mdăp ôh klei mơak. Ayŏng Y Lô brei thâo, sang mâo lu anak čô, amĭ mduôn 80 thŭn leh, êlâo dih jih gŏ sang hdĭp hlăm boh sang  kyâo sô hđăp, adiê hjan ƀrôč, angĭn thut, amĭ ñu khăng ruă duam. Jih gŏ sang knŏng knang hlăm dŭm sao pla hbei ƀlang, prăk hrui wĭt ƀiă. Mrâo anei, mâo kahan ksiêm čar đru 80 êklăk prăk, ñu čan thiăm 40 êklăk prăk mdơ̆ng sang mrâo. Mơ̆ng hruê mâo anôk dôk prŏng siam, amĭ ñu suaih ƀiă, anak čô mơak hĭn, bi ñu hơĭt ai tiê mă bruă. Ară anei ayŏng Y Lô lŏ đru hlăm êpul kriê dlăng ƀuôn, gĭr ksiêm dlăng ƀuôn sang, đru răng kriê klei êđăp ênang grăp thŭn.

“Gŏ sang dleh dlan, mâo truh 8 čô mnuih hlăm sang kyâo hđăp, kniă kniêt, adiê hjan ƀrôč, adiê mđiă hlơr. Lăn hma ăt ƀiă mơh, dôk ti čư̆ dlông anăn amâo dưi pla ana pla mjing ôh. Mâo Đảng, Knŭk kna leh anăn Phŭn bruă kahan ksiêm đru mdơ̆ng sang mrâo prŏng siam, jih sang mơak snăk. Ară anei knŏng mă bruă knuă, rông anak čô nao sang  hră, hrăm mbĭt đru ƀuôn sang đĭ kyar.”

Ăt msĕ si lu gŏ êsei mkăn ti ƀuôn sang lăn Dap Kngư, amai H’Bui Đing,  djuê ana Êđê ti ƀuôn Zia, să Hòa Sơn, čar Dak Lak, amâo dưi mdăp ôh klei mgei ai tiê hlăk nao mŭt dôk hlăm sang mrâo prŏng giăm 40m², mâo ênoh 80 êklăk prăk. Ñu brei thâo, jing gŏ êsei ƀun, lŏ rông truh 4 čô anak leh anăn amĭ ama mduôn, gŏ sang suăi êmăn hŏng 1-2 sao lăn sah kba, amâo dưi pla mjing kphê amâodah tiu. Klei hdĭp dleh dlan, truh mmông huă ƀơ̆ng dôk rŭng răng mơh, snăn klei mdơ̆ng sang jing klei kbưi snăk. Amai H’ Bui mgei ai tiê bi êdah.

“ Gŏ sang dleh dlan snăk, amâo dưi lač jih ôh kơ klei dleh dlan, hdĭp grăp hruê mơ̆ng bruă mưn kơ arăng đuč. Pưk sang adiê hjan mđiă snăn ƀrôč. Pưk hma čư̆ čhiăng, knŏng mâo mă 1-2 sao lăn amâo jing. Phung knuă druh hruê đru mâo  sang dôk, gŏ sang mơak snăk. Bi mni kơ Đảng, Knŭk kna leh anăn Phŭn bruă kahan ksiêm, dŭm gưl dhar bruă alŭ wăl. Mâo sang dôk kjăp, hmei srăng kƀĭn mă bruă knuă, rông anak čô nao sang hră mơar.”

Kơ dŭm čar Lăn Dap Kngư, ară anei jing jih Dhŭng kwar Krah, bruă hlăm krah thŭn brei hlue ngă mơ̆ng bruă msir hră mơar kơ lăn ala, iêô mkrum prăk bi liê, mnuih mă bruă čiăng mdơ̆ng êbeh 20 êbâo boh sang, jing klei dleh dlan snăk. Ƀiădah bruă hlue ngă tu’ jing hdră, ăt srăng ba kơ alŭ wăl klei thâo yuôm bhăn čiăng mâo klei đăo knang pŏk ngă tŭ dưn bruă klam prŏng hlăm wưng mrâo.

Đại tá Nguyễn Văn Dũng, K’iăng Khua kahan ksiêm čar Lâm Đồng, lač kơ klei gĭr mơ̆ng êpul kahan ksiêm hlăm bruă hlue ngă “bruă klam mdua” rơ̆ng êđăp ênang ti alŭ wăl, iêô mkrum jih hnơ̆ng êpul, kdrăp mnơ̆ng čiăng hlue ngă đru kơ mnuih ƀuôn sang mdơ̆ng sang dôk.  Hŏng ai tiê gĭt gai leh anăn klei ngă bruă hrăm mbĭt mơ̆ng jih êpul, hnơ̆ng bruă prŏng kơ anăp dưi bi leh hlăm wưng bhiâo.

“Bruă pŏk ngă anei Anôk bruă gĭt gai ngă jih ai tiê. Klă klơ̆ng, 5 čô mâo Khua knơ̆ng bruă leh anăn 4 čô K’iăng khua knơ̆ng bruă jing khua êpul, nao mđĭ ai êpul čiăng pŏk ngă bruă mdơ̆ng sang kơ mnuih ƀuôn sang. Mbĭt anăn  brei mâo klei hgŭm mơ̆ng jih anôk bruă; hlăm anăn, gĭt gai kahan ksiêm dŭm să, ƀuôn hgŭm kčĕ jih ai tiê kơ Knơ̆ng bruă sang čư̆ êa dŭm să iêô jak jih bruă kđi čar, dŭm alŭ, ƀuôn leh anăn jih mnuih ƀuôn sang hrăm mbĭt ngă bruă.”

 Hlăm dŭm hruê mprăp bi mŭt čar, să leh anăn mprăp kơ bruă ngă mơ̆ng bruă sang čư̆ êa alŭ wăl 2 gưl, ăt jing wưng mjêč mơ̆ng hdră lăm lui sang tĭ, rưcc, Khua gĭt gai Đảng Tô Lâm êmuh hrăm leh anăn mă bruă hŏng dŭm čar Lăn Dap Kngư. Khua gĭt gai Đảng tă hdră leh anăn gĭt gai klă: Mkŏ mjing Đảng brei bi mguôp hŏng bruă rơ̆ng êđăp ênang lĭng kahan - klei êđăp ênang leh anăn mđi’ kyar bruă duh mkra - ala ƀuôn kjăp. Hŏng hdră lăm lui sang tĭ, ƀrôč mơ̆ng dŭm čar dôk mjêč hlue ngă, Khua gĭt gai Đảng bi mklă, anei jing dŭm hdră bruă đru ba ala ƀuôn, jing hdră bruă mơ̆ng klei đăo knang, kyua anăn Lăn Dap Kngư brei gĭr ngă hĭn:

“Mdơ̆ng sang kơ mnuih ƀuôn sang snăn diñu mơak snăk. Klei hdĭp mnuih ƀuôn sang ƀrư̆ dưi mđĭ snăn ƀrư̆ thiăm klei găl bruă lĭng kahan - răng mgang klei êđăp ênang. Mnuih ƀuôn sang ƀrư̆ đăo knang hlăm Đảng, Knŭk kna sa ai tiê tui hlue Đảng snăn ai ktang bi hgŭm djuê ân, bi hgŭm mnuih ƀuôn sang ƀrư̆ dưi mđĭ. Hdră kñăm anăn brei hlue ngă bi jăk.”

 Mlan 7 hdơr knga tla ai, mkan 8 bi hdơr krŭ kdơ̆ng tŭ jing, mlan 9 kdrưh kơăm bi hdơr 80 thŭn Hruê mkŏ mjing ala čar… leh anăn dŭm ƀuôn êlan ti Lăn Dap Kngư mrâi mâo leh êbeh 2 êbâo boh sang mrâo kơ dŭm hruê mdê hjăn anei. Hlăm sang prŏng siam, mnuih ƀuôn sang kluôm Lăn dap Kngư ƀrư̆ thiăm klei đăo knang hŏng kluôm ala mŭt hlăm wưng mkŏ dăp ala čar, mŭt hlăm ênuk gĭr ktưn đĭ kyar.