Nao kahan mơ̆ng hlăk 14 thŭn, lĭng kahan hđăp Lâm Xuân Quang, thŭn anei 70 thŭn brei thâo:

"Yan mnga thŭn 1969 êjai kâo ti kdrăn mblah kwar Ngŏ, kâo hmư̆ khua gĭt gai Hồ Chí Minh hơêč hmưi tết hŏng klei duê…hmư̆ ênai ñu blŭ kâo ƀuh mgei ai tiê, mtrŭt mjhar kâo mmông anăn srăng mkŏ mjing sa wăl mpŭ kơ Awa Hồ.”

50 thŭn bi mĭn, duah hră mơar, truh thŭn 2018, leh mkra mđĭ sang dôk, ñu gĭr pioh sa tal sang čiăng ngă sa sang djă pioh pô kơ khua gĭt gai Hồ Chí Minh. Ti anôk hmư̆ mâo hră mơar kơ khua gĭt gai Hồ Chí Minh ñu mâo ƀô̆ mta tinăn, amâodah hmư̆ hlăm radio, tivi, klei mrâo lač kơ khua gĭt gai Hồ Chí Minh, ñu srăng čih pioh jih.”

Atăt hmei nao čuă dlăng anôk rang mdah prŏng 300m2, awa Quang brei thâo dŭm pŏk rup, hră mơar mơ̆ng lu phŭn. Boh nik hĭn, rup êlan Trường Sơn, rup êdeh sar mnuh ƀăng jang sang klei êngiê yang hruê dơ̆ng 30/4/1975 mbĭt hŏng lu pŏk rup hƀuê ênuk mâo awa Quang rang mdah ti dua bĭt mtih sang ñu:

"Mrâo mŭt tinei kâo ƀuh boh lăn, čih kơ êlan duah hdră dŏng mtlaih lăn čar mơ̆ng Awa Hồ găn hlăm brô 40 lăn čar. Mơ̆ng anăn, Khua gĭt gai Hồ Chí Minh dưi bi mbŏ klei thâo, klei hriăm, klei hmăng hmưi kơ klei êngiê djuê ana, klei mĭn Hồ Chí Minh kơ gĭt gai bruă krŭ kdơ̆ng tŭ dưi. Bi anei jing Păk Bó, hnoh Lênin, čư̆ Các Mác, anei jing klei kƀĭn trông Diên Hồng thŭn 1945… bi anei jing 2 mta mnơ̆ng ñu yua lu hĭn jing masin kčoh hră leh anăn radio…Bi anei jing rup sang mơ̆ng kwar Dưr, kwar Dhŭng, hŏng hnoh krông, pin êa, jhŏng mran…dưi dưm ti anôk rang mdah, msĕ si čiăng lač kơ ai tiê mnuih ƀuôn sang kwar Dhŭng tŭ drông khua gĭt gai Hồ Chí Minh êjai lăn čar hluh hlir.”

Hrô kơ pŏk ƀăng sĭt mâo wưng yuôm, sang djă pioh kơ khua gĭt gai Hồ Chí Minh mơ̆ng awa Quang pŏk ƀăng nanao, Ñu hlŏng ngă bruă hưn mdah dŭm mta mnơ̆ng mbĭt hŏng dŭm klei yăl dliê kơ Awa. Hoàng Ánh Ngọc ti ƀuôn prŏng Hồ Chí Minh, nao čuă anôk anei brei thâo:

"Kâo nao hŏng amĭ ama kâo leh anăn ƀĭng găp diñu, phung lĭng kahan hđăp, nao dlăng wăl dhar kreh Hồ Chí Minh mơ̆ng awa Quang. Mgei ai tiê êdi…anôk anei mâo ñu mkra jăk êdi. Awa Quang gĭr jih ai tiê čiăng dưi ngă bruă msĕ sơnăn. Phung mda asei hmei thâo săng klă hĭn kơ khua gĭt gai Hồ Chí Minh, kơ klei kdơ̆ng mblah mơ̆ng djuê ana čiăng dưi mâo klei êngiê ară anei.”

70 thŭn, Lâm Xuân Quang hmăng hmưi dưi mkŏ mụing sa wăl Hồ Chí Minh hŏng kdrăp 4d čiăng bi êdah ênŭm hră mơar, rup kơ pô đru kơ mnuih ƀuôn sang Việt Nam leh anăn mah jiăng tar rŏng lăn čiăng ksiêm hriăm kơ khua gĭt gai Hồ Chí Minh hŏng klei klă klơ̆ng, tŭ dưn hĭn.