Hruê 12/2, dŭm kdriêk, ƀuôn prŏng mơ̆ng čar Lâm Đồng mđrăm mbĭt mkŏ mjing Hruê mơak nao mŭt hriăm kahan thŭn 2025, hŏng êbeh 1.200 čô mprăp nao hriăm kahan, hlăm anăn giăm mkrah wah jing mnuih djuê ƀiă. Thŭn anei, čar Lâm Đồng mâo êbeh 1.200 čô nao hriăm kahan, hlăm anăn giăm mkrah wah jing mnuih djuê ƀiă lehanăn êbeh 50% mâo hră akâo nao hriăm kahan.

Hlăm ênoh anăn, phung êdam êra mâo hnơ̆ng hriăm gưl krah, gưl prŏng truh 7,6%, hriăm jih gưl tlâo mâo êbeh 36%, boh nik mâo 23 čô jing đảng viên, hlăm anăn mâo 11 čô jing đảng viên mnuih djuê ƀiă. Lơ Mu Tha Ni, đảng viên, 21 thŭn, mnuih K’ho, ti alŭ Dă Nghit 1, să Lat, kdriêk Lạc Dương hơ̆k mơak brei thâo, ñu lehanăn gŏ sang ktưn hưn êdi hlăk hră akâo nao hriăm kahan dưi tŭ ư, klă klơ̆ng ñu dưi nao hriăm kahan čiăng duh myơr kơ hdră mkŏ mkra, răng mgang Ala čar./.

Khădah leh hriăm jih gưl prŏng, mâo bruă mă hơĭt, ƀiădah mâo lu phung hlăk ai ti Gia Lai ăt ngă hră akâo nao kahan, lŏ čuê knhuah gru gŏ sang leh anăn klei hmăng hmưi duh myơr kơ lăn čar. Êlâo hruê nao kahan, Lê Thị Hồng Ngọc ti să Diên Phú, ƀuôn prŏng Pleiku) ktưn hưn răk hră akâo nao kahan kơ gŏ sang hmư̆. Msĕ sơnăn, Lê Thanh Mai ti ƀuôn hgŭm Yên Thế, ƀuôn prŏng Pleiku ăt hriê kơ prŏng hlăm gŏ sang lĭng kahan, khădah leh jih hriăm gưl prŏng bruă čhĭ êa drao, ƀiădah gưl anei ăt ngă hră akâo nao kahan.

Boh nik hlăm sa gŏ sang ngă lŏ hma ti să Ia Piar, kdriêk Phú Thiện, čar Gia Lai, êkei êdam mnuih Jarai Ksor Thanh mrâo jih hriăm sang hră gưl prŏng luật- sang hră gưl prŏng Huế, ăt mprăp êmiêt nao kahan hlăm gưl anei.