Klei kƀĭn trông bi mklă, djam mtam boh kroh jing sa hlăm tlâo mta mnơ̆ng lŏ hma ba čhĭ kơ ala tač êngao lu êdi mơ̆ng Việt Nam. Thŭn 2024, ênoh yuôm bruă ba čhĭ djam mtam boh kroh kơ ala tač êngao mâo truh 7.12 êklai USD.

Khădah ba čhĭ kơ êbeh 80 ala čar lehanăn krĭng lăn ƀiădah djam mtam boh kroh mơ̆ng Việt Nam dôk tlă anăp hŏng klei gun kpăk djŏ tuôm kơ bruă kriê dlăng kjăp phĭt kơ hnơ̆ng dôk mâo êa drao răng mgang mnơ̆ng pla mjing, hdră ksiêm dlăng lehanăn hnơ̆ng čuăn klei mă bruă, wăl hdĭp mda. Ti anôk bi kƀĭn trông, phung thơ̆ng kơ bruă, phung mă bruă kriê dlăng, anôk bruă duh mkra… mblang leh kơ klei mâo, lông dlăng lehanăn dŭm hdră msir mđĭ kyar bruă ba čhĭ djam mtam, boh kroh Việt Nam; bruă klam mơ̆ng hdră bi hgŭm knŭk kna – êngao knŭk kna hlăm bruă mđĭ hnơ̆ng tŭ jăk djam mtam, boh kroh ba čhĭ, kah mbha klei thâo hlăm hdră pla mjing…