K’iăng khua knŭk kna mtă brei mđĭ hĭn bruă mkra êlan, ktưn čiăng dưi bi hluh êlan êdeh dưi găn êrô êlâo kơ hrue 2/9 lehanăn srăng bi leh êlan hlăm thŭn anei. Klei dôk mkra êlan kdrêč tal dua găn čư̆ čhiăng plah wah dua boh čar, mâo Phŭn bruă rŭ mdơ̆ng kiă kriê, Êpul bruă kiă kriê êlan êdeh treng jing pô duh bi liê, boh taih 37,5km. Tui si pô duh bi liê, yan hjan sui hlăm thŭn 2025, anôk ala hlăm čư̆ čhiăng, mâo lu bruă nga jing kban lehanăn ƀăng mur snăn mđĭ hĭng ênoh bi liê, ngă ktrŏ hlăm klei mă bruă, ară anei knŏng mrâo mil 65% bruă knuă. 4 bĭt ƀăng mur bi hluh čư̆ mâo Ea Trang 1, Ea Trang 2, Phượng Hoàng lehanăn Chư Te hŏng boh taih jih jang 5.550m mâo kuai hluh leh, hlăk dôk tuh betong, mkŏ kdrăp bi msiam. Ti anăp klei êmưt hlăm bruă knuă anei, K'iIng khua knŭk kna Hồ Quốc Dũng mtă brei mkra bi pral, bi hluh êlan êdeh găn êrô hlăm jih kdrêč êlan.

Ti anôk ksiêm dlăng, Khua kiă kriê čar Daklak mâo leh klei akâo kơ gưl dlông brei hdră êlan lŏ čuăl mkă thiăm truh 5km êlan mkŏ mơ̆ng êlan dơ̆ng pral Khánh Hòa - Buôn Ma Thuột hŏng êlan dơ̆ng prŏng Yŭ Ngŏ, kdrêč êlan mkŏ găn alŭ wăl tač êdeh phiơr Buôn Ma Thuột kñăm mđĭ hĭn klei tŭ dưn ba yua êlan anei./.