Hruê 07/08, ti Anôk bruă Knŭk kna, Khua knŭk kna Phạm Minh Chính gĭt gai Klei bi kƀĭn grăp gưl mlan 7. Klei bi kƀĭn online mkŏ hŏng 34 čar, ƀuôn prŏng hlăm Gưl dlông. Hlăm klei bi kƀĭn, Khua knŭk kna Phạm Minh Chính mñă klă, kluôm ala pŏk ngă leh bruă ba yua gru hmô knŭk kna dua gưl; mđĭ kyar bruă duh mkra mơ̆ng 8,3% leh anăn mdrơ̆ng hŏng hdra êlan jia mrâo mơ̆ng Mi; Gĭr pŏk ngă “pă kmeh gơ̆ng” hlue si Hdră mtrŭn mơ̆ng Phŭn bruă kđi čar; Mprăp kơ klei bi kƀĭn Đảng dŭm gưl, mđing truh kơ klei bi kƀĭn  Đảng tal 14; Mkŏ mjing Klei bi hdơr 78 thŭn Hruê phung kahan êka êkeh - êngiă asei leh anăn gĭr mprăp kơ Knăm bi hdơr 80 thŭn hruê mphŭn mkŏ mjing ala čar…

Gang mkhư̆ klei yan adiê ngă, răng mgang klei hdĭp mda, ngăn drăp mnuih ƀuôn sang, msir pral hĭn boh jhat yan adiê ngă. Hlăm boh klei dleh dlan, kyua klei gĭr mơ̆ng jih bruă kđi čar, boh klei duh mkra ala ƀuôn lŏ dơ̆ng  mâo klei bi knăl jăk, mlan êdei jăk hĭn mlan êlâo,  7 mlan jăk hĭn kơ wưng anei thŭn 2024. Khădah snăn, Khua knŭk kna ăt lač klă klei dleh dlan lông dlăng, mbĭt anăn mtă kơ dŭm phŭn, dhar bruă, alŭ wăl lŏ dơ̆ng pŏk ngă hdră ngă mrâo dŭm boh kdrŭt đĭ kyar čiăng mâo hdră kñăm mơ̆ng 8,3-8,5% hlăm thŭn 2025. Ksiêm dlăng kơ bruă khăt bi hrŏ hră mơar knŭk kna, mjing klei găl tŭ dưn kơ anôk bruă duh mkra, mnuih ƀuôn sang mđĭ kyar bruă duh mkra êngao knŭk kna./.