Jing sa hlăm dŭm ƀuôn hgŭm mrâo mkŏ mjing leh bi mŭt mbĭt 3 să hđăp: Mỹ Chánh, Mỹ Thành leh anăn Mỹ Cát, An Lương, čar Gia Lai ară anei mâo ênhă 54 km2 leh anăn êbeh 6.000 čô mnuih ƀuôn sang. Khădah jing alŭ wăl prŏng, mnuih ƀuôn sang lu, Bruă sang čư̆ êa ƀuôn hgŭm An Lương pral bi hơĭt bruă knŭk kna leh anăn ngă dŭm bruă klam đru kơ mnuih ƀuôn sang. Ti anôk bruă knŭk kna ƀuôn hgŭm, 3 êpul hră mơar čiăng êdi dưi bi mlih mrô leh anăn ngă hlăm điện tử. Dŭm hră mơar djŏ tuôm hŏng klei hdĭp mnuih ƀuôn sang msĕ si hră hưn kkiêng, hưn pô djiê, bi klă… dưi tŭ mă leh anăn mgiah msir pral. Bruă knŏng hlăm mlan tal 1 ngă bruă, ƀuôn hgŭm dưi ngă leh giăm 700 hră mơar knŭk kna điện tử, jih jang djŏ hdră kčah.

Sa hlăm dŭm klei năng mđing jing hdră ngă mơ̆ng ƀuôn hgŭm kñăm klei jăk kơ mnuih ƀuôn sang êjai hriê mă bruă. Võ Thanh Hoàng,  Khua Bruă sang čư̆ êa ƀuôn hgŭm An Lương brei thâo:

 “Sa mlan ngă bruă, hmei ƀuh hŏng bruă klam mơ̆ng knuă druh jing hyuă kjăp mđĭ klei đru kơ mnuih ƀuôn sang, bi mâo djăp klei čiăng mơ̆ng mnuih ƀuôn sang. Alŭ wăl uêñ mĭn leh anăn duh bi liê bruă mkŏ mkra, kdrăp yua. Dŭm alŭ wăl mkăn ka mâo kdrăp yua ƀiădah anôk bruă mâo mnuih ƀuôn sang lu kyuanăn blei măi mă mrô, màn hình. Hlei hriê êlâo mă mrô êlâo, hriê êdei mă êdei čiăng mâo klei jăk.”

Klei mlih anei mâo mnuih ƀuôn sang bi myuôm. Lê Ngọc Trọng, sa čô mnuih ƀuôn sang ti ƀuôn hgŭm An Lương hŏng 2 blư̆ nao ngă hră mơar hlăm mlan brei thâo:

 “Knuă druh anôk bruă mtô ngă pral, khuăt, mgaih msir, ngă hră mơar hlăm hruê.”

Ti ƀuôn hgŭm čư̆ čhiăng Canh Vinh, leh bi mŭt mbĭt mâo giăm 260 km2, alŭ wăl dleh, lu ƀuôn mnuih djuê ƀiă krĭng tlaih kbưi, klei bi mưng hŏng klei ngă hră mơar mrâo bi mŭt mbĭt jing klei truăn mĭn mơ̆ng Bruă sang čư̆ êa alŭ wăl. Dương Hiệp Hòa,  Khua Bruă sang čư̆ êa ƀuôn hgŭm Canh Vinh brei thâo, alŭ wăl lông ngă dŭm anôk ngă hră mơar ti alŭ wăl kbưi hŏng mnuih ƀuôn sang.

 “Mơ̆ng dleh dlan Bruă sang čư̆ êa alŭ wăl mbruă, mkŏ mjing dŭm anôk ngă hră mơar kơ mnuih ƀuôn sang. Êlâo hĭn mkŏ mjing sa anôk tŭ mă hră mơar ti alŭ Canh Hiển čiăng đru kơ dŭm alŭ kbưi msĕ si alŭ Canh Hiệp, ƀuôn Canh Tiến. Anăp truh ngă dŭm anôk brư đru kơ mnuih ƀuôn sang. Klei ngă bruă truăn leh anăn dŭm kdrăp mrâo mrang srăng đru kơ dŭm ƀuôn kbưi si srăng ngă čiăng hnưm mgaih msir dŭm klei čiăng”.

Klei jĕ giăm lŏ dưi bi êdah hŏng êpul knuă druh. Amai La Thị Huyền Giang, ti anôk bruă mkăp bruă knŭk kna ƀuôn hgŭm Canh Vinh, brei thâo:

 “Êjai ngă Bruă sang čư̆ êa alŭ wăl 2 gưl, kâo ƀuh klei jĕ giăm hŏng mnuih ƀuôn sang leh anăn mnuih ƀuôn sang alŭ wăl. Êjai hriê mă bruă, đa đa mnuih ƀuôn sang ka thâo pô mtô, blŭ hrăm hŏng mnuih ƀuôn sang hŏng klei blŭ diñu ênưih thâo săng hĭn, hlăm bruă knuă ênưih hĭn.”

Knŏng leh sa mlan ngă Bruă sang čư̆ êa alŭ wăl dua gưl, čar Gia Lai dưi bi mlih ktang klei ngă hră mơar, bi mlih mrô, boh nik boh tŭ dưn hlăm klei ngă hră mơar knŭk kna online. Hluê mbah bruă knŭk kna ala čar, Gia Lai ară anei dôk tal 6/34 čar, ƀuôn hgŭm kơ hnơ̆ng mrô đru kơ mnuih ƀuôn sang leh anăn knơ̆ng bruă. Hồ Quốc Dũng, Khua bruă Đảng čar Gia Lai brei thâo:

 “Anăp anei hluê hdră srăng lŏ dơ̆ng mbha gưl kơ ƀuôn hgŭm. Dŭm bruă klam gưl dlông jao klei dưi mơ̆ng gưl čar ƀiădah ƀuh ƀuôn hgŭm mgaih msir jăk  hĭn dưi mbha klei dưi kơ ƀuôn hgŭm mgaih msir. Êngao kơnăn ăt mâo lu klei dleh kpăk, knuă druh ƀuôn hgŭm ară anei mâo 3 gưl knuă druh, knuă druh mơ̆ng čar, mơ̆ng kdriêk, knuă druh ti să. Knuă druh să êlâo dih ka mâo djăp klei thâo, kyuanăn čiăng mưng hŏng bruă anei čiăng mâo mmông bi hriăm čiăng knuă druh dưi mă bruă.”

Hŏng klei mlih mrâo, khuăt, jĕ giăm hŏng ƀuôn sang mơ̆ng Bruă sang čư̆ êa ƀuôn hgŭm leh sa mlan ngă bruă sang čư̆ êa alŭ wăl dua gưl brei ƀuh klă hdră êlan mơ̆ng Đảng. Ăt mâo lu bruă srăng mă, lu klei dleh kpăk čiăng mgaih msir, ƀiădah hŏng ai tiê, mbĭt hŏng klei gĭt gai, hrăm mbĭt mơ̆ng bruă Đảng čar leh anăn Bruă sang čư̆ êa čar Gia Lai, Bruă sang čư̆ êa ƀuôn hgŭm gru hmô mrâo ƀrư̆ hruê ƀrư̆ kjăp, knar hŏng bruă klam hlăm wưng mrâo./.