Blŭ hrăm ti anôk bi kƀĭn,Khua hlăm êpul kiă kriê bruă Đảng gưl dlông Trần Cẩm Tú lač, thŭn 2025 jing thŭn yuôm bhăn – jing thŭn hlăm kluôm Đảng, jih jang mnuih ƀuôn sang, lĭng kahan kut kat mđĭ kyar, ba wĭt boh tŭ dưn mơ̆ng dŭm mta kñăm mơ̆ng klei kƀĭn prŏng Đảng 13 kčah leh, thŭn mkŏ mjing klei bi kƀĭn prŏng Đảng dŭm gưl truh kơ klei bi kƀĭn prŏng Đảng kluôm ala gưl 14 thŭn hlue ngă klei dăp wĭt êpul ngă bruă hlăm kđi čar hŏng klei khuăt, mă bruă tŭ jing, mjing klei găl kơ lăn čar čhuang hlăm ênuk mlih mrâo mơ̆ng djuê ana. Kyuanăn, Êpul khua kiă kriê bruă Đảng gưl dlông pŏk mlar hdră mă bruă hlăm thŭn anei, dhar bruă đru čung ba mnuih ƀuôn sang lŏ dơ̆ng bi kjăp klei mĭn khua gĭt gai Hồ Chí Minh, klei mĭn mơ̆ng Đảng lehanăn klei kiă kriê mơ̆ng khua gĭt gai Đảng Tô Lâm ti anôk mă bruă mrâo anei kơ bruă đru čung ba mnuih ƀuôn sang, dhar bruă bi tĭng mkă klei yuôm bhăn bruă mlih mrâo ênuk cách mạng mrâo mđĭ hĭn ai ktang mơ̆ng mnuih ƀuôn sang, klei ktang mơ̆ng klei thâo bi mguôp jih jang djuê ana, atăt lăn čar đĭ kyar hŏng klei kjăp hlăm ênuk gưl mrâo.

Êpul khua kiă kriê bruă Đảng mtă, mđĭ hĭn boh tŭ dưn hlue ngă klei bhiăn đru čung ba mnuih ƀuôn sang hlăm jih bruă kđi čar; păn kjăp alŭ wăl, anôk bruă nah gŭ, păn kjăp boh klei, mjing djăp klei găl kñăm păn kjăp ai tiê klei mĭn klei čang hmăng, lehanăn jih jang klei blŭ djŏ hŏng hdră êlan “Mpŭ kơ mnuih ƀuôn sang, giăm hŏng mnuih ƀuôn sang, thâo săng mnuih ƀuôn sang, hriăm mơ̆ng mnuih ƀuôn sang, boh nik hlăm klei bi kčŭt hưn, klei luič liê, bi kdơ̆ng hŏng klei ƀơ̆ng ngăn... Lŏ dơ̆ng ngă jăk bruă đru čung ba mnuih ƀuôn sang hlăm krĭng mnuih ƀuôn sang, mnuih đăo, dŭm alŭ wăl phŭn kơ klei êđăp ênang, krĭng taih kbưi krĭng dleh dlan, păn kjăp boh klei mơ̆ng mnuih ƀuôn sang hdĭp ti ala tač êngao.

 Khua kiă kriê êpul bruă Đảng gưl dlông Trần Cẩm Tú mtă, bruă đru čung ba mnuih ƀuôn sang brei jih ai tiê hlue ngă bruă pioh kơ klei bi kƀĭn prŏng Đảng, mkŏ mjing dŭm klei bi mguôp bruă kđi čar kjăp hĭn hlăm tar ƀar, êlâo, hlăm lehanăn êdei kơ klei bi kƀĭn prŏng Đảng, mjing klei êđăp ênang, thâo bi mguôp, hlăm mnuih ƀuôn sang. Êpul khua kiă kriê bruă Đảng gưl dlông lač klă, hdră êlan sa anăn hlăm dhar bruă đru čung ba mnuih ƀuôn sang. Dhar bruă kiă kriê bruă Đảng gưl dlông bi êdah klă hdră êlan đru čung ba mnuih ƀuôn sang, mâo klei bi mŭt mbĭt hŏng anôk bruă kiă kriê klei hâo hưn gưl dlông lŏ ngă kjăp hĭn, jih jang bruă dăp wĭt mnuih mă bruă hlăm klei khuăt mâo boh tŭ dưn, rơ̆ng bruă knuă ăt kjăp mkŏ mjing êpul mă bruă hơĭt hlăm thŭn 2025 leh ngă klei bi mŭt mbĭt:

Drei dăp bi khuăt yơh êpul ngă bruă, mđrĭng hŏng klei dưn yua jih jang knuă druh mnuih mă bruă jing phung thâo lu, mâo knhuah dôk dơ̆ng ƀơ̆ng huă jăk hlăm wưng tinăp. Kyua anăn bruă đru čung ba mnuih ƀuôn sang ngă jăk bruă tui si hdră êlan mơ̆ng Đảng, mơ̆ng Mặt trận lehanăn dŭm êpul bruă mơ̆ng yang ƀuôn, tui si dŭm anôk bruă sang čư̆ êa ngă hŏng bruă đru čung ba mnuih ƀuôn sang kñăm mđĭ K’hưm mơ̆ng bruă đru čung ba mnuih ƀuôn sang, brei bi sa ai, mâo klei thâo uêñ, mâo klei hur har prŏng, kñăm čiăng bi leh jăk bruă dăp hŏng klei khuăt mnuih mă bruă hlăm klei djŏ”.

Mă tŭ jih klei blŭ mơ̆ng êpul khua kiă kriê kčĕ, Khua anôk bruă đru čung ba mnuih ƀuôn sang gưl dlông Mai Văn Chính brei thâo, thŭn 2025 lehanăn wưng tinăp, kluôm anôk bruă srăng mlih mrâo kluôm dhuôm, jih jang hdră êlan đru čung ba mnuih ƀuôn sang hlăm ênuk ară anei. Bi mlih hdră êlan hâo hưn, klei mtrŭt mjhar mnuih ƀuôn sang, mđĭ hĭn bruă ba yua klei kreh knhâo, klei bi mlih mrô ba yua hlăm bruă đru čung ba mnuih ƀuôn sang:

“Kơ klei mă bruă mơ̆ng ară anei hlŏng truh kơ mmông bi kƀĭn prŏng Đảng 14, jing dôk lu, hlăm anăn bruă dleh êdi jing čiăng kơ dhar bruă đru čung ba mnuih ƀuôn sang gưl dlông, lehanăn jih jang bruă đru čung ba mnuih ƀuôn sang ti dŭm gưl brei mâo klei gĭr lu hĭn, čiăng bi mâo klei ksiêm duah, kăp kčĕ hŏng phŭn bruă kđi car, hŏng êpul khua kiă kriê bruă Đảng gưl dlông, dŭm gưl bruă Đảng mâo hdră êlan mghaih msir bruă knuă, hlăm klei kiă kriê gĭt gai bruă đru čung ba mnuih ƀuôn sang, bruă djuê ana, bruă klei đăo, lehanăn hyuă kjăp klei thâo bi mguôp plah wah mnuih ƀuôn sang hŏng Đảng. Hlăm thŭn 2025 Dhar bruă đru čung ba mnuih ƀuôn sang gưl dlông lehanăn jih jang bruă đru čung ba hlăm dŭm gưl srăng jih ai tiê bi leh bruă pô”./.