Nguyễn Thị Hoàng Mai, khua kiă kriê sa boh knơ̆ng bruă ti ƀuôn prŏng Ƀuôn Ama Thuôt, čar Daklak, brei thâo, Tết thŭn anei, ñu amâo lŏ rŭng răng ôh bruă ciăng blei mnơ̆ng pioh mđup brei kơ ƀĭng hgŭm. Mnơ̆ng mơ̆ng boh mnga bruă lŏ hma jăk hĭn hlăm čar Daklak hlăk mâo lu, lehanăn jăk mơh, jing djŏ guôp hŏng mnơ̆ng mơ̆ng knơ̆ng bruă čiăng blei pioh mđup brei kơ ƀĭng hgŭm:

          “Msĕ hŏng yăng đar thŭn, hmei kreh ruah dŭm bai nơ̆ng dlăng siam siam, ƀiădah bêñ kĕo jing dŏ blei mơ̆ng ala tač êngao, ƀiădah thŭn anei kâo kut kat tui tiŏ hdră hrŏng ruah dŭm mta mnơ̆ng tŭ jăk, jiă knhuah mơ̆ng alŭ wăl pô, msĕ si asăr kñŭl, asăr mắc ca, asăr sa chi, kpiê đông trùng hạ thảo mơĭt kơ ƀĭng hgŭm. Êlâo hĭn jing dŏ jăk, tal dua jing dŏ yuôm bhăn mơ̆ng alŭ wăl pô”.

Lê Thị Thanh Thuý, ti ƀuôn hgŭm Tân Lập, ƀuôn prŏng Buôn Ma Thuột, ăt khăp hrŏng ruah dŭm mta mnơ̆ng jing djam mtam, boh kroh jăk siam pla mjing ti Daklak, amâodah dŭm mta asẳ boh kroh leh bi mthu:

         “ Lu thŭn hŏng anei, kâo duah ruah jing jih jang mnơ̆ng ƀơ̆ng pla mjing doh, jăk kơ asei mlei, djŏ guôp hŏng klei pioh huă ƀơ̆ng hlăm hrue Tết. Kâo ăt đăo knang kơ dŭm êpul êya, êpul hgŭm bruă, phung duh mkra mkra mjing hŏng k’hưm jăk hlăm čar pô. Lehanăn ară anei mâo leh lu mta mnơ̆ng djăp ênoh cuăn pioh ba čhĭ kơ ala tač êngao mơh”.

Tui si Trần Ngọc Đan Thuỳ, Khua kiă kriê knơ̆ng bruă Green Foods, ƀuôn prŏng Ƀuôn Ama Thuôt, klei bi mnia mblei boh mnga bruă lŏ hma mơ̆ng čar Daklak mâo leh lu mta, hŏng ênoh djŏ guôp mơh. Klei bi čhĭ mnia găl ênưih, thâo bĭt klă phŭn agha mnơ̆ng pô blei, mjing leh klei đăo knang prŏng hŏng mnuih blei yua:

“Jing jih jang mnơ̆ng čhĭ jih pral. Wưng tết msĕ snei, klei čiăng yua jing lu hĭnTơl lu blư̆ pô akâo blei mơ̆ng hrue êlâo leh, amâo mâo djŏ ôh hlŏng mâo hĕ mtam. Klei yua mnơ̆ng jăk mơ̆ng alŭ wăl pô ñu hơĭt ai tiê hĭn, dŭm mâo mkra dŭm đŭng hruh hlŏng čhĭ, snăn mnơ̆ng jing jăk mơh”.

Hlăm wưng Tết, boh mnga bruă lŏ hma mơ̆ng čar amâo mâo djŏ knŏng ba wĭt mnâo mnañ jăk leh mâo, ƀiădah klei anei jing lŏ mơĭt truh hŏng jih jang mnuih blei thâo bi ba yua mnơ̆ng jăk, mđrĭng hŏng klei bi hơêč hmưi thŭn mrâo. klei mnuih yua ti čar Daklak ruah mta mnơ̆ng mơ̆ng čar pô pla mjing jing mnơ̆ng pioh bi mđup brei yan Tết , amâodah gŏ sang pô ba yua, jing klei lŏ bi lar boh tŭ dưn dhar krehm, lehanăn klei bi sa ai hŏng klei mđĭ kyar kjăp bruă lŏ hma pô./.