Aguah akŏ hruê kăm, Bùi Đức Thanh – mnuih ƀuôn sang alŭ Tân Sao, ƀuôn hgŭm Ia Hrung – nao ti anôk bruă ngă hră mơar knŭk kna čiăng brei lŏ mkăp hră djă yua lăn. Lăn gŏ sang ñu dưi mkăp leh hră dưi yua lăn, kyua klei soh čhuai mŏng dŭm thŭn êlâo, klei dưi djă yua lăn mkăp kơ pô mkăn. Gưl tal êlâo truh ti să ngă hră mơar leh hdră mkŏ dăp anôk bruă, Thanh mâo ktrâo lač jăk êdi kơ klei ngă hră mơar.

 “Knuă druh, mnuih mă bruă ti ƀuôn hgŭm mă bruă tŭ dưn êdi, jih ai tiê ktrâo lač. Mâo mnuih mă bruă hriê ktrâo lač, phung ba anăp hriê lač mơh lehanăn đru kơ kâo čih hră mơar. Hruê anei, hră mơar kâo dưi ngă leh. 

Jing sa să mâo lu mnuih djuê ƀiă, ƀiădah Ia Hrung dôk tal 8/135 ƀuôn hgŭm hlăm kluôm čar Gia Lai mâo lu klei ngă hră mơar hlăm hruê kăm tal êlâo leh mkŏ dăp anôk bruă. Êbeh 200 mta hră mơar dưi tŭ mă. Ênoh hră mơar mơĭt hluê êlan online mâo 3/4, brei ƀuh mnuih ƀuôn sang bi mlih leh klei mưng lehanăn dưi ngă ti mbah hâo hưn online. Huỳnh Ngô Tùng Điệp – Kơiăng khua Anôk bruă sang čư̆ êa să, hlŏng ng Khua Anôk bruă ngă hră mơar knŭk kna să Ia Hrung brei thâo:

 “Bi mklă, bruă knŭk kna alŭ wăl 2 gưl mkăp jăk êdi kơ mnuih ƀuôn sang lehanăn dŭm êpul êya, anôk bruă ti al wăl. Kyua anăn, klei anei mâo nanao Anôk bruă sang čư̆ êa mtă kơ mnuih mă bruă gĭr bi leh bruă klam hlăm hruê, amâo bi kdung. Si tô hmô scan, brei phung knuă druh ba yua đĭng blŭ thâo mĭn, si hdră pral hĭn ngă snăn yơh.

Mbĭt hŏng să Ia Hrung, lu alŭ wăl mkăn msĕ si ƀuôn hgŭm Pleiku, Quy Nhơn, Phú Túc… ăt mâo lu ênoh hră mơar ba msir mghaih, dôk tal 5 kluôm čar lehanăn boh wĭt boh tŭ hluê hdră online. Lê Thị Ánh Tuyết – Anôk bruă ngă hră mơar ƀuôn hgŭm Thống Nhất brei thâo: Ênoh ngă hră mơar lehanăn ba wĭt boh tŭ hluê êlan online amâo djŏ knŏng bi hrŏ hruê mmông msir mghaih kơ mnuih ƀuôn sang, ƀiădah lŏ đru mkŏ hgŭm hlăm kdrăp mơ̆ng kluôm čar. Kyua anăn, hlăm gưl ngă hră mơar ti anăp, mnuih ƀuôn sang amâo guôn ba lu hră mơar, kyua klei hâo hưn mâoleh hlăm kdrăp mrô. 

 “Anôk bruă mtă kơ mnuih mă bruă brei hluê ngă djŏ hdră, mơ̆ng klei tŭ mă hră mơar tal êlâo, ba wĭt boh tŭ klei ngă hră mơar, snăn kơh srăng mđĭ klei ngă hră mơar online. Mbĭt anăn, anôk bruă ăt bi hgŭm hŏng adŭ thơ̆ng kơ bruă msir mghaih hră mơar pral, ruh mtlaih klei dleh dlan, gun kpăk hlăm bruă msir mghaih.

Ară anei, dŭm ƀuôn hgŭm ti Gia Lai dôk hluê ngă 424 mta hră mơar – giăm tlâo blư̆ mkă hŏng êlâo adih. Hlăm wưng ti anăp, čar tĭng srăng jao thiăm bruă klam, mđĭ klei đua klam mơ̆ng bruă knŭk kna nah gŭ. Ênoh bruă mă hlăm grăp hruê đĭ lu, dôk čiăng êpul knuă druh thâo klă hdră ngă ti kdrăp mrô lehanăn raih kơ kdrăp mrâo hlăm bruă msir mghaih klei ngă hră mơar mkăp kơ mnuih ƀuôn sang.

Hluê si Phạm Anh Tuấn – Kơiăng khua bruă Đảng čar, Khua Anôk bruă sang čư̆ êa čar Gia Lai, čar srăng mđĭ hdră mjuăt bi hriăm kơ phung knuă druh, duh kơ anôk bruă nah gŭ, mkăp djŏ hŏng klei đua klam hlăm wưng mrâo. Hŏng êpul knuă druh gưl nah gŭ, Khua Anôk bruă sang čư̆ êa čar Gia Lai mtă mđĭ ai tiê đua klam hlăm klei ngă bruă.

 “Ai tiê đua klam msir mghaih pral hlăm hruê. Mă mnuih ƀuôn sang lehanăn anôk bruă duh mkra jing phŭn, jing pô mkăp ngă bruă. Mnuih ƀuôn sang lehanăn anôk bruă duh mkra jing tuê mơ̆ng anôk bruă knŭk kna, snăn si drei srăng ngă bruă? Anei jing hdră mlih mrâo mơ̆ng ala čar, duah djăp hdră čiăng ba yua tŭ dưn. Klei mĭn jing amâo bi mĭn phă tluôn, amâo kdŭn, ƀiădah brei drei bi trông kơ hdră ngă”

Gru hmô ƀuôn hgŭm mrâo ti Gia Lai phŭn tal êlâo brei ƀuh anôk bruă knŭk kna ƀrư̆ hruê giăm mnuih ƀuôn sang hĭn lehanăn msir mghaih bruă pral hĭn. Khă snăn, čiăng mđing truh kơ sa anôk bruă knŭk kna mrâo, jăk kơ mnuih ƀuôn sang lehanăn anôk bruă duh mkra, brei mđing kơ anôk bruă nah gŭ, hdră kdrăp lehanăn mđĭ hĭn klei thâo, ai tiêmkăp kơ bruă mơ̆ng êpul knuă druh mnuih mă bruă wưng ti anăp./.