Mơ̆ng aguah ưm, mâo lu mnuih mơ̆ng 11 alŭ ti să knông lăn Ia Đal bi mƀĭn ti anôk mkŏ mjing Hdră bruă “Yan mnga knông lăn hơuh mđao ai tiê mnuih ƀuôn sang”. Tinei, mnuih ƀuôn sang nao hgŭm hlăm lu hdră mơak Têt, msĕ si bi lông đŭng, tŭk ƀêñ điŏ mtah, bi lông bhir còn, ktŭng klei, trŭt hlâo… Dŭm gŏ sang dleh dlan mâo knuă druh, lĭng kahan răng mgang knông lăn hưn mthâo “Anôk čhĭ mnơ̆ng 0 prăk” čiăng ruah čhum ao mrâo, tŭ mă braih, êa praĭ êa msĭn, ƀột ngọt… Amai Lục Thị Đương, djuê ana Thái, ti alŭ 4, brei thâo, 14 thŭn êlâo mơ̆ng Thanh Hoá hriê ti Kon Tum mkŏ mkra klei hdĭp tinei, grăp blư̆ Têt truh yan mnga hruê, amai adei lŏ dưi hdĭp hlăm ai êwa Têt ƀuôn sang lehanăn ƀuh klă klei khăp mơ̆ng phung knuă druh, lĭng kahan răng mgang knông lăn.

 “Dưi nao hgŭm hlăm Têt yan mnnga knông lăn mâo êpul kahan răng mgang knông lăn mkŏ mjing kâo mơak êdi. Kâo mgei ai tiê kyua Kđông kahan răng mgang knông lăn đru kơ mnuih ƀuôn sang, msĕ si čô anak hlăm sang ăt mâo Kđông kahan răng mgang knông lăn đru rông ba”.

Bi ayŏng Hà Văn Tình, brei thâo:

 “Drông Têt Ất Tỵ 2025 mâo Lĭng kahan răng mgang knông lăn čar Kon Tum mkŏ mjing Hruê mơak ƀêñ điŏ mtah, mnuih ƀuôn sang ti krĭng knông lăn anei mơak êdi. Ƀri hruê mơak anei hmei ăt dưi bi mjĕ mjuk. Knơ̆ng gĭt gai lĭng kahan răng mgang knông lăn čar Kon Tum jao leh dŭm hnư mnơ̆ng tŭ yuôm truh kơ mnuih ƀuôn sang. Dŭm gŏ sang hơ̆k mơak êdi.

Ƀri wưng Têt djuê ana thŭn anei, să knông lăn Ia Đal, kdriêk Ia H’Drai mâo Knơ̆ng gĭt gai Lĭng kahan răng mgang knông lăn čar Kon Tum ruah mkŏ mjing gưl čar Hdră bruă “Yan mnga knông lăn hơuh mđao ai tiê mnuih ƀuôn sang” mguôp hŏng Hruê mơak ƀêñ điŏ mtah. Ti hdră anei, êpul kahan răng mgang knông lăn lehanăn bruă sang čư̆ êa alŭ wăl mđup brei leh 400 blah hla čhiăm gru Ala čar, êbeh 250 hnư mnơ̆ng, 400 hlâo ƀêñ điŏ, jao prăk đru hriăm hră kơ 9 čô hđeh dôk hlăm Hdră “Đru kơ adei nao sang hră”, gru hmô “Anak rông kđông kahan răng mgang knông lăn”, jao êmô ana mđai kơ 2 gŏ sang ƀun mđĭ kyar bruă duh mkra… Ênoh prăk duh kơ hdră anei êbeh 350 êklăk prăk. Thiếu tá Nguyễn Văn Đại, Khua hlăm Anôk bruă kđi čar Kđông kahan răng mgang knông lăn Ia Đal, brei thâo, anei jing klei lač jăk kơ phung knuă druh, lĭng kahan răng mgang knông lăn hŏng mnuih ƀuôn sang krĭng knông lăn grăp blư̆ Têt truh, yan mnga hriê.

“Hluê hŏng hdră anei, dưi rơ̆ng klei hgŭm mguôp plah wah lĭng kahan lehanăn mnuih ƀuôn sang ti krĭng knông lăn. Hluê hŏng anei ăt jing wưng drei krơ̆ng kjăp boh tŭ yuôm jăk siam lehanăn mtrŭt mjhar hdră bruă anei čiăng hrăm mbĭt hŏng lĭng kahan răng mgang knông lăn rơ̆ng kjăp klei dưi kiă kriê kluôm ênŭm krĭng knông lăn ala čar.

Hluê ngă hdră bruă “Amâo lui hlei pô dôk ti tluôn” rơ̆ng grăp gŏ sang, grăp čô mnuih ti krĭng knông lăn dưi mâo klei găl mơak yan mnga, drông Têt, lŏ dơ̆ng mơ̆ng hruê 19 truh kơ hruê 25/1, Lĭng kahan răng mgang knông lăn čar Kon Tum mđrăm mbĭt mkŏ mjing hdră bruă “Yan mnga knông lăn hơuh mđao ai tiê mnuih ƀuôn sang” mguôp hŏng “Hruê mơak ƀêñ điŏ mtah” ti 12 să krĭng knông lăn siă knông hŏng Lao lehanăn Campuchia. Dưi thâo, ênoh duh kơ hdră mđup brei mnơ̆ng lehanăn mđing dlăng Têt Djuê ana Ất Tỵ 2025 kơ mnuih ƀuôn sang 13 să krĭng knông lăn Kon Tum êbeh 1 êklai prăk./.