Hlăm sa kdrăn čuah, anôk bi hdơr kơ phung kahan Gạc Ma ară anei jing leh anôk hrah pioh mjuăt bi hriăm lehanăn ksul mbŭ kơ ai tiê thâo khăp kơ lăn čar  mơ̆ng lu gưl ênuk. Grăp thŭn, dŭm pluh êbâo čô mnuih ƀuôn sang, knuă druh, lĭng kahan, phung êdam êra lehanăn phung tue hiu čhưn mơ̆ng djăp čar kwar kluôm ala tui duah čiăng čuh brui mngưi bi hdơr kơ phung kahan djiê êngiă hlăm kdrăm mblah Gạc Ma thŭn 1988, răng mgang klei dưi êngiê êa ksĭ, lăn čar. Amai Nguyễn Thị Thanh Hà, pô ngă bruă hlăm anôk bi hdơr Gạc Ma brei thâo, dŭm hrue mlan 3, djŏ tuôm hŏng boh klei hƀuê ênuk anei, ênoh mnuih nao čuh brui mngưi, hdơr knga kơ phung lĭng kahan êngiă asei kyua êa ksĭ, plao ksĭ lăn čar. Alŭ wăl anei êlâo adih knŏng jing sa kbuôn čuah, amâo mâo ana kyâo ôh. Wưng leh êgao, hmei lŏ pla lu ana kyâo mtah čiăng bi mâo êyui êđăp. Truh kơ ară anei čăt đĭ leh jăk, mjing anôk êđăp siam. Tuê truh hriê čhưn lu, ƀiădah ăt bi mbha hruê mmông mơh, đăm lĕ hlăm klei gun kniă.”

  Ti anôk anei, grăp aruăt brui mngưi mâo čuh jing bi êdah ai tiê thâo hdơr knga mơ̆ng anak mnuih mơ̆ng lăn čar anei êbuh leh hlăm krah plao ksĭ. Mâo hŏng anei 38 thŭn, hlăm hrue 14/3/1988, hlăm kdrăn boh tâo Gạc Ma, Cô Lin lehanăn Len Đao hlăm wăl plao ksĭ Trường Sa, čar Khánh Hòa, knuă druh kahan êa ksĭ bi blah leh hŏng klei jhŏng ktang čiăng răng mgang lăn čar.

Hrue anei, hŏng klei anăn lŏ bi hdơr, bi lar grăp blư̆ mâo klei nao čuh brui mngưi truh hŏng alŭ wăl bi hdơr Gạc Ma. Trần Đăng Đức, mnuih mơ̆ng kjhôč ksĭ Cam Ranh, čar Khánh Hòa lač: “Anei jing klei bhiăn mưng leh mơ̆ng đưm hlăm knơ̆ng bruă. Grăp thŭn hmei nao bi hdơr, čuh brui mngưi kơ phung djiê êngaĭ. Jing bi êdah ai tiê thâo hdơr knga, lehanăn čang hmăng kơ lăn čar mâo nanao klei êđăp ênang, đĭ kyar, boh nik hlăm alŭ wăl plao ksĭ lehanăn tač êdeh phiơr.”

Klei lŏ bi hdơr kơ Gạc Ma jing klei yuôm bhăn snăk hŏng lu gŏ sang găp djuê mâo mnuih djiê êngiă hlăm kdrăn mblah anei. Klei digơ̆ săn asei mlei amâo mâo djŏ knŏng mâo čih ktur hlăm hƀuê ênuk, ƀiădah lŏ jing boh phŭn kơ klei mđĭ ai phung hđeh gưl mrâo lŏ hluê čhuang tui gru aê ama pô nao leh êlâo, răng mgang hlăm grăp kgam lăn čar, êa ksĭ pô.

Hŏng klei jing phung anak mơ̆ng lĭng kahan djiê êngiă ti Gạc Ma, lŏ bi hdơr kơ aê ama pô, amâo djŏ knŏng jing klei yăl dliê hlăm hƀuê ênuk, ƀiădah lŏ jing klei myưng m’ang lehanăn klei đua klam lŏ čuê knhuah gru. Lu mnuih ruah leh êlan nao mŭt kahan, lŏ dơng duh myơr ai tiê klei thâo pô êjai dôk mda asei anei nao răng mgang klei êngiê plao ksĭ, êa ksĭ lăn čar. Amai Trần Thị Thủy, dôk mă hlăm hlăm  Lữ đoàn 146 – Trường Sa, anak mniê pô êngiă asei Trần Văn Phương lač: “Thŭn hlăk ai mơ̆ng ama kâo, mbĭt hŏgn mah jiăng ñu tuh êrah mčah klang leh hlăm wăl êa ksĭ pioh răng mgang lăn čar, răng kriê grăp êwang lăn ala kơ lăn čar Việt Nam. Asei kâo msĕ mơh hlăk thŭn dôk mda, adôk lu ai tiê klei hur har, kyuanăn kâo hmăng hmưi ktuh êyuh jih ai tiê pô kơ bruă răng mgang klei dưi êngiê lăn čar lehanăn klei êdăp ênang hlăm êa ksĭ, plao ksĭ.”

Amâo mâo djŏ knŏng jing anôk hdơr knga kơ phung êngiă asei, alŭ wăl bi hdơr lĭng kahan Gạc Ma lŏ jing anôk mjuăt bi hriăm kơ lu êpul êya lĭng kahan, boh nik hŏng knuă druh, lĭng kahan mda asei. Lu êpul êya kahan êa Việt Nam kreh mkŏ mjing nanao klei hriê čuh brui mngưi, hriê čuă dlăng, tui duah klei thâo săng kơ hƀuê ênuk, čiăng lŏ mjhar ai tiê myưng m’ang kơ bruă răng mgang klei dưi êngiê plao ksĭ êa ksĭ pô. Mơ̆ng bruă ngă anăn, grăp čô, knuă druh lĭng kahan jiă kma klei tŭ dưn mơ̆ng klei êđăp ênang, mơ̆ng anăn lŏ čuê êlan aê ama leh nao, gĭr ktir mjuăt hriăm, mprăp ai tiê kơ klei bi blah, kut kat răng mgang bi kjăp êa ksĭ plao ksĭ pô.   Trung tá Dương Trọng Hà, Khua bruă êdam êra Trung đoàn 196 brei thâo “Čuh brui mngưi bi hdơr, nao čuă mjuăt hriăm ti alŭ wăl bi hdơr jing bruă ngă jêñ jêñ mơ̆ng Trung đoàn 196. Boh nik, hŏng knuă druh lĭng kahan mrâo srăng mâo dŭm knhuah bhiăn mơ̆ng lĭng kahan mjuăt bi hriăm, ngă klei bi hmô mơ̆ng phung kahan leh djiê êngiă. Čiăng kơ jih jang phung knuă druh, lĭng kahan kjăp ai tiê klei mĭn, bruă kđi car kut kat mghaih msir klei dleh dlan.”

Tlao pluh sapăn thŭn leh êgao, dŭm klei ƀuăn răng kriê kjăp plaŏ ksĭ hlăk anăn ăt dôk kwang nanao hlăm krah êa ksĭ. Mơ̆ng alŭ wăl bi hdơr Gạc Ma hrue anei, hŏng ai tiê anăn lŏ mdưm kơ hđeh gưl mrâo, čiăng kơ phung lĭng kahan hlăm plao ksĭ păn kjăp nanao phao ktuang pô, răng mgang kjăp klei dưi êngiê lăn čar pô./.