Mlan 11 thŭn 2021, Êpul hgŭm bruă mniê gưl dlông Việt Nam bi hgŭm hŏng Anôk bruă Djuê ana mkŏ mjing hdră ksiêk kjăp, pŏk ngă hdră bruă truh ti 51 čar, ƀuôn prŏng hlăm krĭng mnuih ƀuôn sang djuê ƀiă lehanăn krĭng čư̆ čhiăng. Hdră bruă “Hluê ngă klei mtăp mđơr êkei mniê lehanăn msir mghaih dŭm bruă mjêč hŏng phung mniê lehanăn hđeh mniê” jing sa hlăm 10 hdră bruă dôk hlăm Hdră ala čar kñăm mđĭ kyar bruă duh mkra – ala ƀuôn krĭng mnuih djuê ana ƀiă lehanăn krĭng čư̆ čhiăng wưng thŭn 2021-2030. Hdră anei mâo Êpul hgŭm bruă mniê gưl dlông Việt Nam mâo jao mkŏ mjing lehanăn pŏk ngă. Anei ăt jing gưl tal êlâo hlăm hdră kñăm ala čar mđĭ kyar bruă duh mkra ala ƀuôn krĭng mnuih djuê ƀiă lehanăn krĭng čư̆ čhiăng mâo sa hdră hjăn păn djŏ tuôm kơ bruă mtrŭt mđĭ klei mtăp mđơr êkei mniê.

Êpul hgŭm bruă gưl dlông mtrŭt mđĭ leh bruă mtô mblang kơ hdră bruă 8 hluê hŏng dŭm bruă hưn mthâo, mtô mblang, bi trông hlăm kdrăp hâo hưn kơ lu mnuih. Bi hgŭm hŏng dŭm Phŭn, dhar bruă djŏ tuôm hluê ngă dŭm mta čuăn mơ̆ng hdră bruă 8 djŏ tuôm kơ bruă klam mơ̆ng anôk bruă.

Mbĭt hŏng hdră đru mơ̆ng Êpul hgŭm bruă gưl dlông, Êpul hgŭm bruă mniê dŭm gưl ti alŭ wăl mđing djăp klei găl mâo pŏk hdră ngă bruă ti 8 să phŭn, mkŏ mkra lehanăn krơ̆ng kjăp 32 gru hmô mtô mblang êpul êya, 4 Anôk đăo knang kjăp, 4 Êpul hgŭm khua ba akŏ kơ klei bi mlih lehanăn mkŏ mjing 4 klei blŭ hrăm kơ hdră mtrŭn. Mđing dlăng, mkŏ mjing hdră mjuăt bi hriăm mđĭ klei thâo săng kơ phung knuă druh mniê mnuih djuê ƀiă. Mjuăt bi hriăm, ktrâo lač, ksiêm dlăng, tĭng dlăng kơ klei mtăp mđơr êkei mniê, mđĭ klei thâo mguôp hŏng bruă hưn mthâo kơ phung knuă druh kdriêk, să lehanăn alŭ, ƀuôn.

Hluê si Trần Lan Phương, Kơiăng khua Êpul bruă mniê Việt Nam, leh 3 thŭn pŏk ngă hdră mtô mblang, mđĭ klei thâo săng kơ phung knuă druh mniê mnuih djuê ƀiă, mđĭ klei thâo mguôp mbĭt hŏng phung knuă druh hlăm anôk bruă kđi čar, phung khua mduôn, khua ƀuôn, mnuih mâo kơhưm hlăm êpul êya lehanăn mkŏ mjing klei bi blŭ hrăm kơ hdră mtrŭn gưl să lehanăn alŭ, ƀuôn mâo leh dŭm gưl, anôk bruă lehanăn Êpul bruă mniê dŭm čar pŏk ngă mđrăm mbĭt, đru ti dŭm să phŭn.

Dŭm hdră gĭt gai, pŏk ngă phŭn tal êlâo mjing leh klei bi mlih jăk hlăm klei thâo săng, bruă ngă mơ̆ng mnuih ƀuôn sang, đru bi mlih klei mĭn, hdră ngă, lăm lui klei amâo mtăp mđơr êkei mniê lehanăn bi hrŏ dŭm klei mâo mjêč hlăm ala ƀuôn hŏng phung mniê lehanăn phung hđeh.

Lò Thị Thu Thủy, Khua hlăm Êpul kiă kriê, Khua Dhar bruă Djuê ana – Klei đăo, Êpul hgŭm bruă mniê Việt Nam gưl dlông brei thâo: Dŭm anôk bruă hlăm Êpul hgŭm gưl dlông mkra leh dŭm mta hră mơar ktrâo lač bruă mkŏ mjing, ba yua lehanăn dŭm mta hră mơar mkăp kơ hdră mtô mblang, mkŏ mjing hdră bi mjĕ mjuk dŭm gru hmô. Boh nik, gru hmô Êpul hgŭm “Khua ba akŏ hlăm klei bi mlih”. Mkra dŭm mta klei hâo hưn hluê kdrăp video, pŏk rup ksiêm dlăng, djŏ guôp hŏng grăp čô.

Mơ̆ng hdră mjuăt bi hriăm, ktrâo lač, mđĭ klei thâo săng kơ phung knuă druh Êpul lehanăn knuă druh dŭm anôk bruă djŏ tuôm ti gưl să kơ bruă mkŏ mjing, ba yua lehanăn mđĭ hnơ̆ng tŭ jăk ngă bruă mơ̆ng gru hmô mâo leh Êpul hgŭm bruă gưl dlông mđing brei hluê ngă hlăm grăp thŭn. Mbĭt anăn mđĭ klei đru hdră mnêč kơ dŭm alŭ wăl kriê dlăng, ba yua gru hmô anei. Mkŏ mjing hdră mtô mblang ti êpul êya.

Hluê si klei hưn mdah mơ̆ng Dhar bruă Djuê ana – Klei đăo, Êpul hgŭm bruă mniê gưl dlông Việt Nam, dŭm hdră ngă bruă mơ̆ng dŭm să mđing mjĕ mjuk, mtô mblang čiăng bi mlih klei mĭn, hdră ngă, lăm lui klei amâo mtăp mđơr êkei mniê. Hluê klei ktrâo lač mơ̆ng Gưl dlông, dŭm gưl êpul iêu mtrŭt leh klei hgŭm kngan mơ̆ng dŭm dhar bruă, pŏk ngă bruă ba wĭt leh boh tŭ dưn./.