Khua Phŭn bruă êlan klông dŭ mdiăng Nguyễn Văn Thắng mâo leh klei blŭ hŏng hră mơar kơ mta phŭn, êdu kƀah ăt msĕ mơh ƀuăn rơ̆ng hŏng čar Gia Lai ruh mgaih klei dleh dlan, gun kpăk kơ hdră mkra mđĭ Êlan dơ̆ng ala čar mrô 19.

  Hdră bruă mđĭ mkŏ êlan klông krĭng Lăn Dap Kngư (mkra mđĭ Êlan dơ̆ng ala čar mrô 19) kyua anôk bruă kriê dlăng Hdră bruă 2, Phŭn bruă êlan klông dŭ mdiăng ngă pô bi liê, mâo ênoh bi liê êbeh 3.600 êklai prăk. Rŭ mdơ̆ng thŭn 2021 leh anăn hlue si hdră bi leh hlăm mlan 6/2023. Khădah snăn mơ̆ng klei êdu kƀah hlăm hdră hlue ngă, mlan 7/2023, Êpul bi ala bruă kƀĭn ala čar Gia Lai mâo hră mơar bi klin klei blŭ phung bi ala kơ mnuih ƀuôn sang, mơĭt kơ anôk bruă gưl dlông. Hlăm anăn lač, “Hdră bruă mkra mđĭ, pŏk êlan dơ̆ng ala čar mrô 19" găn kdriêk Mang Yang leh anăn să Bình Giáo, kdriêk Čư̆ Prông, čar Gia Lai, wưng rŭ mdơ̆ng rŭ mdơ̆ng sui, hmăi kơ klei hdĭp mnuih ƀuôn sang, dleh dlan kơ mnuih ƀuôn sang găn êrô êlan klông. Akâo kơ Phŭn bruă êlan klông dŭ mdiăng mđing, gĭt gai Anôk bruă kriê dlăng hdră bruă 2 leh anăn dŭm anôk bruă djŏ tuôm ktuê dlăng leh anăn msir mgaih klei êdu kƀah hlăm bruă rŭ mdơ̆ng.