Blŭ hrăm ti knăm anei, Khua gĭt gai Đảng Tô Lâm lŏ ksiêm wĭt leh boh tŭ êdah êdi hlăm djăp mta bruă mơ̆ng Ala čar hlăm thŭn 2024, mñă dŭm boh tŭ dưn anăn mâo klei đru mguôp prŏng prĭn mơ̆ng phung khua kiă kriê Đảng êlâo adih, phung mă bruă cách mạng sui thŭn lehanăn phung hriăm lu hlăm ala čar lehanăn mnuih Việt Nam dôk hdĭp ti ala tač engao.

Kơ bruă klam hlăm wưng ti anăp, tui hluê Khua gĭt gai Đảng čiăng lŏ đua klam bruă yuôm bhăn hƀuê ênuk ba Lăn čar drei mŭt hlăm ênuk wưng mrâo, hlăm wưng ti anăp, brei drei lŏ dơ̆ng mlih mrâo hdră kiă kriê, mđĭ klei thâo gĭt gai mơ̆ng Đảng. Lač kơ bruă klam phŭn jing mđĭ kyar bruă duh mkra – ala ƀuôn, Khua gĭt gai Đảng lač, jih anôk bruă kđi čar brei mđing hluê ngă tŭ dưn lehanăn klă nik bruă lŏ mkŏ dăp hdră duh mkra, mguôp hŏng gru hmô mđĭ kyar, mkŏ mkra tur knơ̆ng kreh knhâo, kdrăp mrâo, bi mlih mrô./.