Knăm bi êdah phung duh mkra kjăp ti Việt Nam thŭn 2024 hŏng akŏ “Phung duh mkra kpưn đĭ hlăm ênuk gưl mtah mda” mâo êpul hgŭm phung duh mkra kyua klei đĭ kyar kjăp Việt Nam dôk hlăm êpul hgŭm duh mkra mnia mblei Việt Nam (VCCI) mkŏ mjing mmăt mbrue 29/11 ti Hà Nội. Hlăm anôk mkŏ mjing anei, mâo 100 phung duh mkra kjăp bi ala brei kơ jih jang bruă duh mkra mnia mblei mâo mpŭ mni.

Blŭ hrăm ti anôk bi êdah, anăn Khua kiă kriê VCCI, Khua êpul kiă kriê phung duh mkra kjăp ti Việt Nam (CSI) Phạm Tấn Công lač, boh tŭ dưn klei ksiêm dlăng mơ̆ng VCCI hŏng phung duh mkra mâo leh anăn knăl đĭ kyar kjăp mơ̆ng CSI giăm 10 thŭn êgao mâo bi klă leh hdră duh mkra kjăp, lehanăn čhuang hlăm klei duh mkra mrô, nao hlăm klei bi mlih mtah mda mơ̆ng phung duh mkra. Thŭn anei mâo leh giăm 500 phung duh mkra hlăm kluôm ala, ngă hlăm djăp mta bruă. Ti anôk bi êdah anăn, êpul mkŏ mjing mpŭ mni kơ 100 phung duh mkra kjăp hlăm klei duh mkra mnia mblei. Hlăm anăn mâo ênoh phung duh mkra dôk hlăm 10 phung duh mkra kjăp hĭn ti hnơ̆ng ênoh jing 50% phung duh mkra hlăm ala čar, lehanăn 50% phung duh mkra mâo prăk duh bi liê mơ̆ng ala tač êngao./.