Găn 7 êpul bi lông čiăng mâo mă klei dưi hlăm klei bi lông mkra mjing mnơ̆ng dhơ̆ng mơ̆ng djah ksu mâo bruă êdam êra să mkŏ mjing, Hla kak Việt Nam mơ̆ng êpul êdam êra ƀuôn Čuôr Dăng A bi êdah klei mbruă. Phunug êdam êra mă yua leh djah ksu čiăng mkŏ mjing mnơ̆ng dhơ̆ng mâo ênoh yuôm leh anăn mâo knhuah hâo hưn. Amai H-Tuyết Niê, khua bruă êdam êra ƀuôn Čuôr Dăng A, să Čuôr Dăng, kdriêk Čư̆ Mgar brei thâo:

“Nao hlăm klei bi lông anei, hmei ba hla kak Việt Nam dưi mkra mơ̆ng dŭm mta mnơ̆ng leh lui, yua hlăm grăp hruê msĕ si mơar, đĭng ƀuôp, kăt êa leh anăn dŭm mta mnơ̆ng yua mkăn. Mnơ̆ng anei mâo klei hưn kơ klei khăp lăn čar, ƀuôn sang, ăt msĕ mơh klei tưn hưn djuê ana, klei dưi kiă kriê leh anăn kluôm dhuôm lăn čar. Mơ̆ng anăn, kâo pô leh anăn phung mda asei srăng lŏ gĭr mjuăt pô, hluê hriăm čiăng mkŏ mjing leh anăn răng mgang lăn čar.

Mbĭt hŏng dŭm klei bi lông, klei hriăm, mlam êdam êra thŭn anei ti Dak Lak mâo lu mta bruă bi kƀĭn êpul, dŭm mta bruă jăk kyua yang ƀuôn. Hŏng akŏ Êdam êra nao êlâo, čŏng pô kyua klei hdĭp yang ƀuôn, lu mta bruă dưi mkŏ mjing hrăm mbĭt hlăm čar msĕ si Knăm 7 mtah, hruê čŏng pô mkŏ mjing wăl krah mrâo mrang, trŭn kơ bruă mluih mrô đru kơ yang ƀuôn.

Mbĭt hŏng dŭm bruă mbĭt, êpul bruă êdam êra nah gŭ lŏ ngă lu hdră bruă, mta bruă klă klơ̆ng, djŏ guôp hŏng boh sĭt ti alŭ wăl, anôk bruă pô. Amai H’Vinh Êban, ti ƀuôn Kroa B, să Čuôr Dăng, kdriêk Čư̆ Mgar  brei thâo, giăm 300m êlan hla čhiăm gru lăn čar mâo êpul êdam êra kă čiăng tŭ drông dŭm knăm prŏng hlăm mlan 3. Mbĭt hŏng anăn, phung êdam êra ăt hur har bi doh wăl hdĭp mda, jah waih, hrui mă djah ti pin êa Ea Mkang leh anăn pla ana kyâo ti alŭ wăl êpul êya.

“Kâo leh anăn phung êdam êra trŭn kơ bruă mkŏ mjing êlan hla čhiămg gru êdam êra, pla ana mnga leh anăn boh doh pin êa. Hŏng dŭm hdră bruă anei, kâo ƀuh klei hơ̆k mơak kyua pô đru mguôp hlăm dŭm hdră bruă êdam êra hlăm ƀuôn”.

Hluê si ayŏng Y-Lê Pas Tơr, k’iăng khua bruă êdam êra čar, khua êpul hgŭm phung hlăk ai čar Dak Lak, 3 hruê kăm ngă dŭm mta bruă hlăm mlan êdam êra, mâo leh giăm 220 êpul ngă bruă, ngă êbeh 200 mta bruă, hdră bruă. Giăm 160 êpul bruă mnuih ƀuôn sang hriăm kơ hdră mrô dưi mkŏ mjing, đru kơ mnuih ƀuôn sang hriăm kơ bruă mrô. Phung êdam êra hlăm čar ăt bi mguôp prăk kăk, hruê ai rŭ mdơ̆ng 25 boh sang hlăm hdră hrăm mbĭt msir lăm sang dôk êjai, sang tĭ rưč.

Klei mrâo mơ̆ng mlan êdam êra thŭn anei jing dŭm mta bruă sa ai hŏng hdră bi lông ktưn hrăm mbĭt msir lăm sang dôk êjai, sang tĭ rưč, hluê ngă tŭ dưn hdră mtrŭn mrô 57-NQ/TW mơ̆ng Phŭn bruă kđi čar kơ mđĭ kyar klei kreh knhâo, mrâo mrang, mlih mrâo mbruă leh anăn mlih mrô ala čar hŏng hdră Mnuih ƀuôn sang hriăm kơ hdră mrô. Leh mâo mta phŭn, dŭm gưl bruă êdam êra mâo leh hdră êlan klă klơ̆ng, hmao tiŏ mơ̆ng êlâo.

“Mkŏ mjing dŭm hnơ̆ng čuăn kơ mlan êdam êra, nao klă hŏng akŏ mơ̆ng thŭn ăt msĕ mơh grăp bruă klam hlăm mlan 3. Mbha dŭm hnơ̆ng čuăn kơ dŭm kdriêk, wăl krah, ƀuôn prŏng, gĭt gai mkŏ mjing dŭm êpul hluê grăp gưl, mkŏ mjing klei hrăm mbĭt hlăm kluôm čar. Hmei gĭr dưn yua lu hĭn kdrăp mrô hlăm dŭm mta bruă čiăng ngă hŏng klei kluôm êlam hĭn, pral hĭn leh anăn tŭ dưn hĭn truh hŏng phung êdam êra.”

Mlan êdam êra 2025 bi ruê̆ hŏng dŭm gru kruăk mơ̆ng thŭn mdah dŭm djuê ana Lăn Dap Kngư – klei hur har, jiha ai tiê bruă klam leh anăn klei hmăng hmưi duh myơr. Dŭm hdră bruă êdam êra, klei čŏng ngă bruă amâo djŏ knŏng ba wĭt boh tŭ dưn klă klơ̆ng kơ yang ƀuôn ƀiădah lŏ ksul mbŭ klei bi mguôp, klei ktưn hưn leh anăn klei mĭn mkŏ mjing ƀuôn sang. Hĭn kơ dŭm ênoh mrô, anăn jing klei blŭ tlao, dŭm bĕ kngan hrăm mbĭt leh anăn bŏ hŏng klei khăp čiăng.

­Hdră duh myơr mơ̆ng phung mda asei amâo mâo mdei hlăm mlan êdam êra ƀiădah srăng lŏ dơ̆ng bi lar hlăm grăp mta bruă điêt mơ̆ng grăp hruê, đru kơ Lăn Dap Kngư dưi đĭ kyar hơĭt kjăp, mdrŏng ktang.