72 thŭn, 53 thŭn Đảng, Nguyễn Thị Hồng ti wăl krah Quảng Phú, kdriêk Čư̆ M’Gar, čar Dak Lak ăt bŏ hŏng jih ai tiê hŏng bruă ala ƀuôn. Jing Khua Êpul hgŭm kahan hđăp khăp kơ ala čar kdriêk Čư̆ M’Gar, ñu gĭr jih ai tiê mkŏ kriê dlăng kơ klei hdĭp mda leh anăn klei dưi kơ phung hlăm êpul. Hnưm hgŭm hlăm bruă krŭ kdơ̆ng ti krĭng krŭ kdơ̆ng Đạt Lý 2 (jing alŭ 1, să Hòa Thuận, ƀuôn prŏng Ƀuôn Ama Thuôt, čar Dak Lak hruê anei), hlăk 19 thŭn, ñu ktưn hưn dưi  mŭt Đảng Cộng sản Việt Nam. Mơ̆ng dŭm blư̆ phung roh mă kơ̆ng, ngă jhat, ñu ăt krơ̆ng kjăp klei đăo knang krŭ kdơ̆ng. Leh mâo klei êđăp ênang, ñu lŏ dơ̆ng hlăm bruă kriê dlăng ti kdriêk Čư̆ M’Gar. Nguyễn Thị Hồng brei thâo:

“Hlăm klei bi blah jing bi tuôm hŏng phung roh, jhŏng hdĭp, jhŏng djiê leh anăn jhŏng săn asei. Kâo hgŭm hlăm bruă krŭ kdơ̆ng snăn ăt ƀuh phung ƀĭng kahan pô săn asei kyua klei êngiê hruê anei. Anăn ăt jing mta phŭn, boh kdrŭt čiăng kơ pô gĭr ktưn, lŏ dơ̆ng krơ̆ng kjăp klei ƀuăn rơ̆ng hŏng čar kwar, hŏng Đảng, hŏng yang ƀuôn. Leh mâo klei êđăp ênang kâo ƀuh pô ăt jing mnuih myun dưi hdĭp, lŏ mâo klei găl duh myơr kơ ƀuôn sang, lăn čar”.

Bi hŏng Thượng tá Lữ Thị Anh Đào, K’iăng Khua adŭ bruă PA02, Kahan ksiêm čar Dak Lak, jih giăm 30 thŭn mă bruă hlăm bruă gang mkhư̆ phung bi kdơ̆ng, ñu jiă kma klei mĭn krŭ kdơ̆ng leh anăn klei mĭn phung đảng viên, bi leh jăk bruă klam dưi jao. Thượng tá Lữ Thị Anh Đào brei thâo:

 “Mâo phung naô êlâo mtô bi hriăm, mbĭt hŏng klei thâo hlăm sang hră, ƀuh hlăm klei hriăm hră mơar, kâo ƀuh klei săn asei, luč liê, duh myơr mơ̆ng phung nao êkâo snăn klei dleh dlan, suăi êmăn kâo dôk găn jing hơăi mang. Kyua anăn snăn kâo čŏng ngă bruă bi hriăm pô, klei phung ƀĭng kahan dưi ngă snăn klă brei pô ăt dưi ngă mơh čiăng kơ pô gĭr ktưn leh anăn brei jih ai tiê, đua klam snăn kơh pô dưi ngă”.

 Jing mniê knuă druh mnuih djuê ƀiă, 39 thŭn, amai H Čir Mlô, ti să Ea Đar, kdriêk Ea Kar mâo leh 14 thŭn Đảng. Tuôm ngă Khua dlăng bruă Đảng ƀuôn  Sưk, să Ea Đar, leh anăn ngă Khua Êpul hgŭm phung mniê să Ea Đar, hlăm djăp bruă, ñu mđĭ lar nanao bruă klam mkŏ plah wah Đảng hŏng mnuih ƀuôn sang. Đru kơ mnuih ƀuôn sang jhŏng lač klei mĭn, klei pô čiăng djŏ klă leh anăn năng mâo klei lŏ wĭt lač djŏ klă mơ̆ng khua gĭt gai, amai H’Čir đru mguôp leh ai đăo knang mơ̆ng mnuih ƀuôn sang hŏng Đảng leh anăn bruă sang čư̆ êa.

“Mâo knuih hdĭp jăk, djăp klei thâo, rơ̆ng hnơ̆ng čuăn kơ sa čô knuă druh hlăm ênuk mrâo, brei drei ñŭ kma, čŏng pô đua klam êlâo hĭn. Kâo đăo knang hlăm hdră êlan, hră mơar, hdră mtrŭn, asăp mtrŭn mơ̆ng Đảng leh anăn Knŭk kna. Kyua anăn bruă mbha, jao kâo hlăm ya bruă ngă snăn kâo gĭr nanao čiăng bi leh jăk bruă klam pô.”

Hŏng ai tiê đua klam, klei mĭn gĭr ktưn găn jih klei dleh dlan leh anăn jih ai tiê hŏng Đảng, hŏng mnuih ƀuôn sang, phung mniê đảng viên ba anăp ti Dak Lak dôk mđĭ ai kơ ênuk mda asei lŏ čuê, mkŏ mjing ƀuôn sang ƀrư̆ mdrŏng sah jăk siam./.