Dŭm hruê giăm Tết, H’Chớt Niê, mnuih Ê Đê, ti buôn Tai, să Krông Jing, kdriêk Mdrak, hŏng gŏ sang êmiêt tiêt pưk sang. Ñu brei thâo, ka tuôm mâo ôh ai êwa drông Tết mơ̆ng gŏ sang mơak mñai msĕ si thŭn anei.

"Mlan 6/2024, Anôk bruă gĭt gai bruă lĭng kahan kdriêk Mdrak mđup brei leh 50 êklăk prăk, Knơ̆ng bruă mặt trận čar kwar Việt Nam kdriêk đru thiăm 50 êklăk prăk. Sang kâo čan thiăm čiăng mkŏ mjing sang mrâo 90m2. Ară anei, phung hlăm gŏ sang mâo leh sang kjăp pioh dôk. Tết Ất Tỵ 2025 anei, jih gŏ sang hơĭt ai tiê drông yan Mnga, anei jing Tết mơak hĭn mơ̆ng êlâo truh ară anei”

Ăt msĕ si amai H’Chớt, ayŏng Y Sam Niê, mnuih djuê ana Ê Đê, hdĭp ti ƀuôn Tai, hơ̆k mơak drông Tết hlăm sang mrâo. Ayŏng Y Sam mgai ai tiê brei thâo:

“Kâo ka tuôm bi mĭn ôh srăng dưi mkŏ mjing sa mrâo prŏng siam čiăng dôk. Anôk bruă gĭt gai lĭng kahan kdriêk leh anăn Knơ̆ng bruă mặt trận čar kwar kdriêk ăt mđup breo 50 êklăk prăk, gŏ sang čan thiăm 50 êklăk prăk cciăng rŭ mdơ̆ng sang prŏng hĭn 60m2. Thŭn anei sang mrâo drông Tết, ung mô̆ kâo leha năn phung anak mơak snăk, amâo lŏ huĭ kơ adiê hjan ƀrôč, angĭn thut ôh. Ară anei  kaoa knŏng mă bruă mđĭ kyar bruă duh mkra, rông ba anak hriăm hră mơar.”

 Y Lương Êban, Khua bruă mặt trận čar kwar Việt Nam să Krông Jing brei thâo, hlăm thŭn 2024, să mâo  54 gŏ êsei ƀun mâo rŭ mdơ̆ng sang “bi hgŭm”. Êngao anăn, êbeh 400 gŏ êsei giăm ƀun, mnuih djuê ƀiă dưi đru prăk leh anăn phung mă bruă đru mkra sang mơ̆ng hdră mơ̆ng Knŭk kna leh anăn čar Dak Lak. Dŭm gŏ sang nao mŭt leh hlăm sang mrâo hdĭp mda. Y Lương hâo hưn:

"Knhal jih thŭn 2024, Knơ̆ng bruă sang čư̆ êa nao ktuê dlăng leh anăn ksiêm dlăng kluôm leh anăn mkŏ mjing jao sang kơ dŭm gŏ sang knŭk kna dlăng ba mâo đru mdơ̆ng sang. Păn kjăp boh klei, hmei ƀuh jih jang gŏ êsei mơak. Dŭm gŏ sang drông Tết Nguyên đán Ất Tỵ 2025 hlăm klei hơ̆k mơak mnuih ƀuôn sang.”

MDrak jing sa hlăm dŭm kdriêk krĭng ƀuôn sang dleh dlan hĭn čar Dak Lak. Hlue ngă klei mtrŭt mjhar “kluôm ala hrăm mbĭt kyua mnuih ƀun, amâo brei hlei pô ti tluôn”, hlue si klei gĭt gai mơ̆ng Knŭk kna kơ klei lăm lui sang tĭ, thŭn 2024, kdriêk iêô mkrum leh klei găl mkra mrâo 255 boh sang leh anăn mkra 190 boh sang kơ gŏ êsei ƀun, giăm ƀun. Ênoh bi liê hlue engă giăm 50 êklai prăk. Kơ hdră kčah lăm lui sang tĭ hlăm thŭn 2025, Y Khoan Niê Kđăm -  Khua Knơ̆ng bruă mặt trận čar kwar Việt Nam kdriêk Mdrak brei thâo, kdriêk mĭn tĭng mkra mrâo êbeh 220 boh sang kơ gŏ sang dleh dlan:

“Hmei čiăng 18 êklai prăk čiăng hlue ngă bruă lăm lui sang tĭ kơ mnuih ƀuôn sang ti kdriêk hơĭt klei hdĭp mda hlăm thŭn 2025. Bruă mặt trận kdriêk srăng bi mguôp dŭm hdră msĕ si Hdră mtrŭn 90/QĐ-2022 mơ̆ng Khua knŭk kna, hdră 1718 kơ klei lăm lui sang tĭ leh anăn dŭm hdră mkăn msĕ si mtrŭt mjhar anôk bruă duh mkra čiăng đru kơ mnuih ƀuôn sang.  Hdră kčah anei mĭn tĭng bi leh hlăm mlan 12/2025.”

 Kkuh drông bi hdơr 120 thŭn Hruê mkŏ mjing čar Dak Lak knhal jih mlan 11 thŭn 2024 mrâo êgao, Knơ̆ng bruă mặt trận čar kwar Việt Nam čar iêô mthưr, mtrŭt mjhar mkŏ mjing sang bi hgŭm kơ gŏ êsei ƀun, giăm ƀun kơ sang dôk hlăm alŭ, ƀuôn dleh dlan, krĭng knông lăn, krĭng mnuih djuê ƀiă. Klei mtrŭt mjhar mâo leh phung mâo ai tiê kmah, dŭm êpul bruă, anôk bruă duh mkra, knuă druh, phung mă bruă đru êbeh 23 êklai prăk, klă klơ̆ng bi leh ba jao êbeh 300 boh sang kơ gŏ êsei ƀun êlâo  Tết nguyên đán Ất Tỵ.  Hlăm boh sang mrâo mâo jao, ai êwa drông Tết dôk mơak mñai hŏng klei jăk mơak mơ̆ng dŭm gŏ sang. Dŭm boh sang hơuh mđao” bi hgŭm” dôk mjing boh  kdrŭt kơ mnuih ƀuôn sang mă bruă mkra mjing, gĭr ktưn tlaih ƀun, mkŏ mjing klei hdĭp trei mđao, jăk mơak hĭn./.