Mtrŭt mjhar hdră bi ktưn hlăm kluôm Êpul kkuh mơak Klei bi kƀĭn bruă Đảng dŭm gưl lehanăn Klei bi kƀĭn bruă Đảng kluôm ala tal 14, Khua tal sa bruă Đoàn gưl dlông Bùi Quang Huy mñă: Dŭm gưl bruă Đoàn lehanăn phung đoàn viên, êdam êra gĭr hluê ngă tŭ dưn hdră mtrŭt mjhar klei bi ktưn mâo: Mtô mblang kơ knhuah gru hƀuê ênuk kdrưh kơăm mơ̆ng Đảng Cộng sản Việt Nam; mñă klă bruă klam, kơhưm, klei jhŏng, klei thâo kiă kriê lehanăn ai kdơ̆ng mblah mơ̆ng Đảng dăl hlăm 95 thŭn êgao, đru mguôp ba lăn mŭt hlăm wưng mrâo, ênuk gưl kpưn đĭ mơ̆ng djuê ana, mđĭ lar ai tiê ba anăp mơ̆ng phung êdam êra hlăm bruă pŏk ngă dŭm hdră bruă, kdrêč bruă êdam êra klă sĭt lehanăn tŭ dưn; Pŏk ngă dŭm hdră êdam êra; Mkŏ mjing dŭm gưl bi lông ktưn, mphŭn ba yua dŭm hdră bruă lehanăn mkŏ mjing Hruê Êdam êra ngă bruă kkuh mơak Klei bi kƀĭn bruă Đảng dŭm gưl, anăp mđing truh kơ Klei bi kƀĭn tal 14m mơ̆ng Đảng; Mkŏ mjing êpul bruă Đoàn kjăp ktang, klă sĭt jing êpul mkăp kơ Đảng, nao hgŭm mkŏ mkra lehanăn răng mgang Đảng, đru mguôp hlăm klei čih mkra Hră mơar kơ Klei bi kƀĭn tal 14 mơ̆ng Đảng. Khua tal sa bruă Đoàn gưl dlông Bùi Quang Huy brei thâo:

Anôk dlăng bruă Đoàn iêu mthưr jih jang đoàn viên, phung êdam êra hđeh êlăk hlăm kluôm ala čar hŏng klei khăp mơ̆ng pô brei ngă dŭm bruă điêt dưn hŏng klei klă sĭt, tŭ dưn kơ êpul êya čiăng đru mguôp mjing ai êwa bi ktưn hlăm dŭm gưl bruă Đoàn. Hlăm Knăm mtrŭt mjhar Klei bi ktưn hlăm kluôm anôk bruă Đoàn čiăng kkuh mơak tŭ jing Klei bi kƀĭn bruă Đảng dŭm gưl, ti krĭng lăn “Ƀuôn prŏng kdơ̆ng mblah”, drei hrăm mbĭt hluê ngă sa bruă tŭ yuôm anăn jing mtrŭt mjhar hdră Têt pla kyâo hdơr nanao kơ Awa Hô. Hdră anei jing bruă ngă nanao, bi êdah ai tiê ba anăp, đua klam mơ̆ng phung êdam êra Việt Nam, mơ̆ng êpul bruă Đoàn Êdam êra Cộng sản Hồ Chí Minh hlăm bruă răng mgang wăl hdĭp mda, mdrơ̆ng hŏng klei bi mlih yan adiê”.

Blŭ ti knăm anei, Đỗ Văn Chiến, Khua dhar bruă gưl dlông Mặt trận čar kwar Việt Nam bi mni kơ bruă Đoàn gưl dlông pral mâo hdră mkŏ mjing Knăm bi ktưn mđing truh kơ Klei bi kƀĭn bruă Đảng dŭm gưl lehanăn Klei bi kƀĭn bruă Đảng kluôm ala tal 14. Čiăng gưl bi lông klă sĭt ba wĭt boh tŭ dưn, lar bra ai tiê ba anăp mơ̆ng phung êdam êra, Đỗ Văn Chiến mtă: 

Bruă Đoàn gưl dlông brei mđĭ hĭn hdră mtô mblang, mđĭ klei thâo săng, đua klam mơ̆ng dŭm gưl bruă Đoàn, đoàn viên, si srăng ngă čiăng kơ hdră bi ktưn anei jing sa hdră bi mjĕ mjuk bruă kđi čar hlăm anôk bruă Đoàn, mâo klei hgŭm mơ̆ng lu phung đoàn viên, êdam êra hlăm kluôm ala lehanăn mjing klei bi êdah jăk hlăm kluôm yang ƀuôn; Dưi lač anăn jing dŭm boh kban, êlan klông, sang dlăng hră, adŭ hriăm, amâo dah hdră ksiêm hriăm bruă kreh knhâo, hdră mphŭn čô̆ kơ bruă, gru hmô pla mjing ênuk mrâo, tŭ dưn mâo phung êdam êra mkŏ mjing lehanăn kriê dlăng.

Mñă klă bruă pla kyâo amâo djŏ jing bruă čiăng mkra mđĭ wăl hdĭp mda đuič ôh ƀiădah lŏ đru mguôp hlăm mta kñăm mđĭ kyar hơĭt kjăp mơ̆ng ala čar lehanăn hluê ngă klei ƀuăn rơ̆ng mơ̆ng Knŭk kna Việt Nam ti dŭm anôk bi kbĭn trông lu ala čar, hlăm anăn mâo mta kñăm bi hrŏ klei bi kbiăn êwa jhat truh hnơ̆ng 0 hlăm thŭn 2050, Đỗ Văn Chiến mtă kơ dŭm gưl bruă Đoàn, đoàn viên êdam êra mđĭ lar ai tiê ba anăp, mlih mrâo lehañ klei đua klam mơ̆ng pô čiăng bi sĭt dŭm bruă mâo bi ktưn mtrŭt mjhar.

Ti knăm anei, phung bi ala nao čuă, mđup brei leh mnơ̆ng kơ Amĭ Việt Nam Jhŏng ktang, jao 40 hnư mnơ̆ng kơ gŏ sang knŭk kna dlăng ba, 30 hnư đru hriăm hră kơ phung hđeh dleh dlan kpưn đĭ hriăm hră, 10 hnư mnơ̆ng kơ khua mduôn, khua ƀuôn ti kdriêk Sơn Dương, čar Tuyên Quang hŏng ênoh 100 êklăk prăk.

Hlăm hdră anei, bruă Đoàm Êdam êra Cộng sản Hồ Chí Minh gưl dlông pŏk ngă leh hdră êdam êra kkuh mơak Klei bi kƀĭn bruă Đảng tal 14 mâo: 15 boh sang kơ phung êdam êra hmăi mơ̆ng klei êa lip angĭn êbŭ, 2 boh sang Yâo mơak, tač čưng boh êpul êya, sang Čhiăm guêč kuê Hrah, Đang war êdam êra, êlan klông krĭng ƀuôn sang, tač hlăp kơ phung hđeh, Boh sang 26/3, 36 ktuê êlan guh mngač hŏng pil yang hruê, 20 ha dliê êdam êra, đru 13 êklai prăk mơ̆ng Keh Ala čar hdră hdră mđung bruă Đoàn gưl dlông. Ênoh duh jih jang êbeh 21 êklai prăk.

Leh knăm mtrŭt mjhar, phung khua Đảng, Knŭk kna lehanăn phung bi ala đoàn viên, êdam êra lehanăn mnuih ƀuôn sang ti alŭ wăl nao pla leh ana kyâo ti Wăl bi hdơr kơ phung mă bruă cách mạng đưm êlâo, Wăl knhuah gru ala čar Tân Trào, kdriêk Sơn Dương, čar Tuyên Quang.