Ti čar Gia Lai, wưng leh êgao, adiê amâo mâo jăk bi mlih nanao hlăm dŭm hrue ngă kơ lu phung hđeh ruă hlăm êlan bi êwa lehanăn ba kơ sang êa drao, hŏng ênoh lu hĭn. Giăm anei, Sang êa drao hđeh čar Gia Lai mâo mdrao leh mơ̆ng 300 – 400 gưl čô hđeh/hrue, mâo dŭm klei ruă hlăm êlan bi êwa. Mơ̆ng akŏ thŭn truh kơ ară anei mâo leh giăm 1000 čô hđeh ba kơ sang êa drao kyua klei ruă hlăm êlan bi êwa msĕ si: Bŏk ksŏ, ruă đŏk, mtŭk ƀhiêt... đĭ hĭn mkă hŏng wưng anei thŭn dih.

Tui si Aê mdrao Từ Thị Mai Linh - k'iăng khua kiă kriê sang êa drao hđeh čar Gia Lai, lu phung hđeh ruă kyua amĭ ama amâo mâo răng, lehanăn ba anak kơ sang êa drao lu anak nao hlăm klei ruă kjham leh, đĭ êngoh hlơr, bi hrut... Sang êa drao mâo klei mtă kơ amĭ ama phung hđeh mđing hĭn hŏng yan adiê amâo mâo jăk. Lehanăn mđing brei pral dưi thâo ƀuh anak mâo klei ruă lehanăn mdrao mtam./.