Giăm 20 thŭn mă bruă ti krĭng knông lăn, Thiếu tá, aê mdrao Nguyễn Văn Quốc Trí hŏng phung kahan hơô ao mtah Kđông kahan răng mgang knông lăn Tr’hy, kdriêk Tây Giang mtrŭt mjhar, hâo hưn mtô mblang kơ mnuih ƀuôn sang Cơ Tu ƀrư̆ mđĭ klei thâo săng kơ klei amâo jăk mơ̆ng klei thâo săng kthŭl mluk, lăm lui klei mâo lŏ djŏ hlăm êpul êya.

Amĭ kkiêng leh anăn hriê kơ prŏng ti kdriêk Núi Thành, čar Quảng Nam. Leh ruĕ hriăm Sang hră gưl prŏng mdrao mgŭn Huế (Sang hră gưl prŏng Huế) aê mdrao Nguyễn Văn Quốc Trí wĭt mă bruă ti kđông kahan răng mgang knông lăn Đăk Pring (kdriêk Nam Giang). Truh mlan 5/2021, aê mdrao Trí lŏ mâo ba nao mă bruă ti Adŭ ksiêm mkă êpul lĭng kahan AXan, Kđông kahan răng mgang knông lăn Tr’hy, kdriêk Tây Giang, ksiêm mkă mdrao kơ mnuih ruă pă să knông lăn ti kdriêk Tây Giang leh anăn đa đa dŭm ƀuôn bi knông hŏng ala čar Lào. Găn lu thŭn mă bruă tinei, Thiếu tá, aê mdrao Nguyễn Văn Quốc Trí hŏng phung lĭng kahan hơô ao mtah mtrŭt mjhar, hâo hưn kơ mnuih ƀuôn sang Cơ Tu dua nah knông lăn mđĭ klei thâo săng kơ klei amâo jăk kơ klei mĭn soh čhuai, ƀrư̆ lăm lui klei mĭn kthŭl mluk hlăm êpul êya.

20 thŭn hdĭp mda hŏng mnuih ƀuôn sang ti knông lăn, amâo uêñ kơ ya wưng, tơdah mâo mnuih hlăm ƀuôn ruă duam, djŏ ƀơ̆ng mta ruă, hla ngón, hnuê duč, ala čoh, boh nik kkiêng anak… mnuih ƀuôn sang đăo knang, duah aê mdrao Nguyễn Văn Quốc Trí.  Giăm anei, hlăm mlam êăt, hmư̆ klei hâo hưn sa čô mniê ba tian Cơ Tu nao kkiêng anak anăn ruă tian snăk, amâo dưi lŏ đĭ êdeh p’phŭt čiăng nao ti adŭ ksiêm mkă ôh. Aê mdrao Nguyễn Văn Quốc Trí hŏng phung mă bruă mbĭt mjêč nao tinăn hmao msir mgaih, ñu kkiêng sa čô ĕ mniê, jih dua amĭ anak suaih sơăi.

 Hdơr kơ thŭn mlan mă bruă ti krĭng čư̆ čhiăng hŏng aê mdrao Trí leh anăn phung mă bruă mbĭt ƀrư̆ lu. Diñu jing leh anôk knang kơ mnuih ƀuôn sang. Aê mdrao Nguyễn Văn Quốc Trí yăl dliê:

“Anôk kahan jưh jing ti să AXan krĭng čư̆ čhiăng kdriêk Tây Giang, čar Quảng Nam, mnuih ƀuôn sang tinei jing  mnuih Cơ Tu hdĭp mda, klei găl bruă duh mkra leh anăn klei thâo săng mnuih ƀuôn sang adôk kƀah anăn mâo lu klei bhiăn kthŭl mluk. Bruă hâo hưn mtô mblang kơ mnuih ƀuôn sang lăm lui klei kthŭl mluk mâo hmei mđing tal êlâo, ƀrư̆ ƀrư̆ klei thâo săng mnuih ƀuôn sang dưi mđĭ. Hlăm dŭm thŭn êgao, kâo bi tuôm leh lu phung ruă mdê mdê, msĕ si ala čoh, djŏ ƀơ̆ng mmao ruă, leh anăn phung mniê kkiêng anak ti krah êlan. Hlăm anăn kâo dŏng mdrao leh kơ lu mnuih găn mmông huĭ hyưt”

Aê mdrao Nguyễn Văn Quốc Trí khăng nao nanao ti grăp alŭ, ƀuôn čiăng ksiêm dlăng klei suaih pral, đru kčĕ, ktrâo lač kơ klei gang mkhư̆ leh anăn mdrao klei ruă amâo mă prăk kơ mnuih ƀuôn sang. Mbĭt anăn, ktrâo lač kơ mnuih ƀuôn sang klei ñĕ kơ klei ruă, răng mgang wăl hdĭp mda leh anăn mđĭ kyar dŭm mta mjeh êa drao yuôm hin čiăng kriê dlăng klei suaih pral ti sang. Bling Mưr ti alŭ A Banh 1, să Tr'hy, kdriêk Tây Giang mgei ai tiê:

“Aê mdrao Nguyễn Văn Quốc Trí ktrâo lač hŏng jih ai tiê, dlăng mnuih ruă msĕ phung hlăm sang. Mâo mmông aê mdrao Trí găn êa truh ti  alŭ, ƀuôn čiăng mdrao phung ruă, phung khua mduôn mâo klei hdĭp dleh dlan amâo mâo prăk mah nao mdrao ti dŭm sang êa drao prŏng čiăng ksiêm mkă, klei ruă kjham. Êngao kơ ksiêm mkă mdrao mgŭn, aê mdrao Trí lŏ mtô kơ klei yua hdră  gang mkhư̆ klei ƀă kkiêng anak kơ phung ung mô̆, kơ klei gang mkhư̆ klei ruă tưp.”

Kah knarr grăp thŭn, Adŭ ksiêm mkă mdrao kahan AXan mâo mơ̆ng 6000-8000 gưl phung ruă nao ksiêm mkă hlăm 4 să , kdriêk Tây Giang, čar Quảng Nam leh anăn dŭm ƀuôn bi knông kdriêk Kà Lừm, čar Sê kông, ala čar Lào nao ksiêm mkă leh anăn mdrao mgŭn. Mơ̆ng thŭn 2016 truh ară anei adŭ ksiêm mkă mâo mđing uêñ mkŏ mjing hŏng hnơ̆ng ƀrư̆ prŏng hĭn, mkŏ dăp lu kdrăp mdrao mgŭn mrâo mrang msĕ si masin mă rup X-quang mrô, masin ksiêm mkă, masin mjing oxy, masin hrip mnơ̆ng jhat êran hŏng pui kmlă, sang ală kĭng kơ hđeh mrâo kkiêng, 10 jhưng đih mdrao kơ phung dôk mdrao leh anăn êdeh mdiăng mnuih ruă mjêč kơ phung ruă tơdah čiăng.Thượng Tá Bùi Văn Đức, Khua Kđông kahan răng mgang knông lăn Tr’Hy brei thâo:

“Nguyễn Văn Quốc Trí bi êdah bruă klam jing gru mngač mơ̆ng êpul kahan răng mgang knông lăn ăt msĕ mơh mơ̆ng anôk bruă. Mnuih ƀuôn sang tinei jing sa kdrêč mâo klei thâo săng adôk kƀah, kyua klei găl kdrăp mnơ̆ng êlan klông dleh găn êrô, tơdah amâo hmao dŏng mdrao leh anăn ba kơ anôk ti dlông hĭn snăn mơ̆ng 2-3 mmông kơh truh ti sang êa drao kdriêk. Kyua anăn, tơdah amâo mâo ôh aê mdrao Trí hmao drŏng mdrao huĭ snăk kơ klei hdĭp. Ñu jing klei bi hmô mơ̆ng anôk bruă ăt msĕ mơh êpul kahan răng mgang knông lăn čar Quảng Nam.”

 Dŭm bruă ngă yuôm bhăn mơ̆ng aê mdrao Nguyễn Văn Quốc Trí bi êdah klei khăp, klei bi hgŭm, bi mguôp lĭng kahan leh anăn mnuih ƀuôn sang, mjing klei đăo knang êlam hlăm ai tiê mnuih ƀuôn sang ti knông lăn. Phung aê mdrao “hơô ao mtah” msĕ si aê mdrao Trí đu mguôp bi msiam thiăm knhuah gru kdrưh kơăm phung lĭng kahan Awa Hồ ti krĭng knông lăn čar Quảng Nam”.