Msĕ si yang đar, hruê 16 grăp mlan, aê mdrao Y Nham Niê, Khua anôk dlăng bruă mdrao mgŭm să Krông Ana, kdriêk Ƀuôn Đon lŏ hrăm mbĭt hŏng knuă druh, mnuih mă bruă nao hlăm ƀuôn Drang Phôk, să Krông Ana čiăng ksiêm mkă, kčĕ klei suaih pral kơ mnuih ƀuôn sang. Ƀuôn Drang Phôk hlăm Đang dliê knŭk kna mkuôm York Đôn, kbưi hŏng Anôk mdrao mgŭn să giăm 20 km, anăn bruă nao ti anôk mdrao mgŭn să čiăng ksiêm mkă mdrao mgŭn mâo lu klei dleh dlan. Grăp gưl wĭt kơ ƀuôn, aê mdrao Y Nham hnêč hâo hưn mtô mblang bruă gang mkhư̆ klei ruă mnuih ƀuôn sang.

“Hlăm krĭng taih kbưi anei snăn klei ruă lu snăk, boh nik klei ruă êngoh bi ktư̆ jing mâo lu, mrâo anei jing dŭm klei ruă mkăn hmăi mơ̆ng anôk mkăn ăt mâo lu mơh. Klei mnuih ƀuôn sang thâo săng jing ƀiă, mnuih ƀuôn sang thâo klei ruă kơh nao bi tuôm hŏng aê mdrao, bi bruă gang mkhư̆ klei ruă tưo snăn arăng dôk mkhư̆.”

Êlâo dih, phung mă bruă mdrao mgŭn hlăm ƀuôn nao hlăm grăp boh sang mñă kơ mnuih ƀuôn sang ksiêm mkă grăp gưl, snăn ară anei, truh hruê 16 grăp mlan, mnuih ƀuôn sang čŏng hriê ti sang dhar kreh čiăng ksiêm mkă leh anăn kčĕ klei suaih pral. Amai H’Thép Knul ti ƀuôn Drang Phôk, brei thâo:

“ Aê mdrao Nham hriê tinei ksiêm mkă, kčĕ hŏng ƀuôn sang tinei jih ai tiê, kyua mâo aê mdrao snăn ƀuôn sang thâo kriê dlăng klei suaih pral”.

Jing mnuih Êđê amĭ kkiêng leh anăn hriê kơ prŏng ti să Ea Ƀar, kdriêk Ƀuôn Đon, leh hriăm ruê̆ bruă mdrao gŭn, thŭn 2022, ayŏng Y Nham Niê mă bruă ti Anôk bruă mdrao mgŭn să Ea Ƀar. Mơ̆ng thŭn 2016 truh ară anei, aê mdrao Y Nham dưi jao ngă Khua anôk bruă mdrao mgŭn să Krông Ana. Êbeh 20 thŭn siă suôr hŏng bruă leh anăn mâo 7 thŭn ngă bruă kbưi hŏng sang êbeh 20 km, ñu săng klei dhĭp mnuih ƀuôn sang krĭng taih kbưi, krĭng knông lăn tuôm hŏng lu klei dleh dlan, ăt mâo lu klei bhiăn kthŭl mluk hmăi amâo jăk kơ klei suaih pral mnuih ƀuôn sang.

 Hŏng klei thâo hriăm leh leh anăn klei khăp kơ bruă, aê ndrao Y Nham amâo uêñ kơ êlan taih kbưi, adiê hjan amâodah mđiă, gĭr hŏng phung mă bruă nao mtrŭt mnuih ƀuôn sang lăm lui klei bhiăn kthŭl mluk, kčĕ kơ klei suaih prak ƀă kkiêng anak, mtrŭt amĭ ama ba anak nao tlŏ mgang djŏ wưng. Kyua klei ñu gĭr ktưn leh anăn êpul bruă mdrao mgŭn alŭ wăl, bruă kriê dlăng klei suaih pral kơ mnuih ƀuôn sang ti să Krông Ana mâo lu klei tŭ dưn. Ênoh ƀă kkiêng anak tal 3, bi dôk ung mô̆ mơ̆ng mda, bi dôk anak amiêt awa ti alŭ wăl hrŏ lu, ênoh tlŏ mgang mâo êbeh 70%. Aê mdrao Y Nham brei thâo:

“Ai tiê pô jing yuôm bhăn hĭn kriê dlăng klei suaih pral kơ mnuih ƀuôn sang, amâo bi mbha anôk anei anôk mkăn ôh, mnuih ƀuôn sang čiăng, knŭk kna jao snăn pô nao yơh. Pô gĭt mă klei thâo pô čiăng mă bruă kơ mnuih ƀuôn sang.”

Amâo djŏ knŏng jih ai tiê hlăm bruă kriê dlăng klei suaih pral kơ mnuih ƀuôn sang ôh, hŏng bruă klam jing Khua Anôk bruă mdrao mgŭn să, aê mdrao Y Nham lŏ pral mâo hdră kčah klă klơ̆ng kơ djăp mta bruă mơ̆ng anôk bruă hluê si grăp hruê kăm, grăp mlan ăt msĕ mơh pral hlăm bruă đăo knăl boh klei ruă tưp ti alŭ wăl čiăng mâo klei kčĕ hŏng gưl dlông. Êngao anăn, aê mdrao Y Nham lŏ jih ai tiê ktrâo lač kơ mnuih mă bruă hlăm Anôk bruă čiăng kơ diñu mđĭ klei thâo. Ayŏng Y Sới Hwing, K’iăng Khua anôk bruă mdrao mgŭn să Krông Ana brei thâo:

“Y-Nham jing sa čô jih ai tiê, mă bruă đua klam. Grăp mlan leh bi kƀĭn anôk dlăng bruă Đảng, ñu ba sa klei ruă čiăng hâo hưn, mtô mblang, mâo hdră ngă tơdah tuôm hŏng boh klei mâo, ñu ăt ktrâo lač, mtô mblang kơ phung ayŏng adei ti anôk bruă, čiăng ti anôk ñu nao snăn ayŏng anei hlăm Anôk bruă dưi msir mgaih soăi”

 Dŭm bruă aê mdrao Y Nham Niê ngă leh năng mpŭ snăk, ñu amâo djŏ knŏng jing sa aê mdrao mbruă đuič ôh, bŏ hŏng knuih jăk sa čô mdrao mgŭn, ƀiădah lŏ jing gru mngač hlăm bruă mdrao mgŭn krĭng knông lăn. Kyua klei mkŏ mjing leh anăn mđĭ lar kơhưm mâo mnuih ƀuôn sang đăo knang đru kơ ñu dưi pŏk ngă Hdră mdrao mgŭn ala čar kơ alŭ ƀuôn hŏng klei tŭ dưn./.