VOV4.Êđê- Covid-19 lŏ ba truh 203 klei amâo jăk hlăm asei mlei mnuih ruă leh djŏ, hlăm anăn lu êdi jing klei ruă hlăm êlan bi êwa. Anei jing klei hưn dưi ba mdah ti Klei bi kƀĭn kreh knhâo mdrao dŭm klei truh amâo jăk leh djŏ Covid 19 hŏng hdră bi mguôp hdră mdrao hluê knhuah djuê ana lehanăn mdrao mgŭn hluê kdrăp mrâo gưl tal êlâo mâo Êpul hgŭm mdrao klei ruă hluê knhuah djuê ana Việt Nam mkŏ mjing aguah hruê 30/3, ti Hà Nội. Hlăm wưng êgao, Êpul hgŭm mdrao klei ruă hluê knhuah djuê ana hluê ngă leh hdră mdrao anei kơ 900 čô ruă Covid 19 hlăm wưng tal êlâo mtam. Mnuih ruă điêt hĭn jing 3 thŭn, khua hĭn jing 90 thŭn. Boh tŭ amâo mâo mnuih đĭ kơ kjham ôh. Mơ̆ng boh sĭt hdră mdrao bi mguôp hdră mdrao hluê knhuah djuê ana lehanăn mdrao mgŭn hluê kdrăp mrâo kơ mnuih ruă leh djŏ Covid 19, Nai prĭn Trần Quốc Hùng, Khua Sang êa drao mdrao klei ruă hluê knhuah djuê ana Hà Nội lač snei: Dŭm boh tŭ anei srăng đru kơ Êpul hgŭm mdrao klei ruă hluê knhuah djuê ana Việt Nam bi tŭ ư kơ dŭm hdră dŏng mdrao mnuih ruă leh djŏ Covid 19 bi mguôp hluê knhuah djuê ana lehanăn kdrăp mrâo./.

Pô mblang: H’Nêč Êñuôl