Kreh nao kơ sang êa drao prŏng krĭng Lăn Dap kngư nanao, Mai Thanh Nhàn, dôk ti să Hòa Thắng, ƀuôn prŏng Ƀuôn Ama Thuôt, čar Daklak, yăl dliê, ñu ư ai êdi hlăm bruă ngă hră mơar mkă dlăng klei mdrao mgŭn ară anei;

 “Ară anei nao mkă dlăng mdrao mgŭn jing găl ênưih lehanăn pral hĭn amâo mâo luič lu hrue mmông ôh. Êlâo dih mă mrô lehanăn djă kơ̆ng hĕ hră ênua bruă mdrao mgŭn, leh mâo aê mdrao mkă dlăng snăn kơh trŭn bi tĭng tla, lehanăn lŏ mă wĭt hra ênua bruă mdrao mgŭn, ngă luič lu mmông snăk. Ƀiădah ară anei leh mâo yua hdră bi mlih mrô jing pral hĭn leh sơăi”.

Mjing klei găl jăk hĭn kơ mnuih ruă, bruă bi mlih mrô mâo leh sang êa drao prŏng Krĭng lăn dap kngư djă yua msĕ si: Klei ngă hră mơar, mkă dlăng mdrao mgŭn hŏng hră ênua, mâo leh kak mâo čip, mkă hră mơar bi tĭng tla ăt hŏng elektronik, bi tĭng tla amâo ba yua prăk ti anăp ôh, čoh čuăn hrue lŏ hriê mkă dlăng mdrao mgŭn ăt ba yua hlăm hla pŏk... Tui si Nguyễn Trí Dũng, Khua adŭ bruă kdrăp bi mlih mrô, jih jang klei ngă hră mơar, klei bi tĭng tla bruă mdrao mgŭn, mâo ba yua hŏng kdrăp mrâo mrang dưi čih hưn kleă mngač, ƀhĭ ênŭm:

 “Phần mềm bruă kiă kriê mrâo jing găl ênưih hŏng mnuih ruă nao mkă dlăng, lehanăn mdrao mgŭn, kyuadah digơ̆ bi hrŏ mơh hră mơar bi djă ba. Mơ̆ng anăn sang êa drao lu bruă ngă ăt găl ênưih lehanăn klă mngač jih jang bruă hŏng klei mdrao mgŭn hlăm hră ênua jing hơĭt sĭt”.

Ară anei kah knar hlăm grăp hrue, Sang êa drao prŏng krĭng lăn dap kngư mâo tŭ jum giăm 1.500 gưl čô mnuih ruă hriê mkă dlăng mdrao mgŭn, lehanăn mâo êbeh 1.600 čô mnuih ruă dôk đih mdrao ti sang êa drao. Aê mdrao Trịnh Hồng Nhựt – K’iăng khua kiă kriê sang êa drao brei thâo, bruă bi mlih mrô mâo ba wĭt leh klei bi mlih klă mngač êdi hlăm jih jang bruă ngă:

 “Sang êa drao prŏng Krĭng lăn dap kngư mâo mkŏ leh sơăi jih jang phần mềm ba yua hlăm bruă knuă, msĕ si hlăm bruă mkă dlăng mdrao mgŭn, lehanăn bruă kiă kriê jih jang kdrăp mă bruă, kñăm čiăng ba wĭt klei tŭ dưn kơ mnuih ruă, lehanăn đru kơ phung aê mdrao mâo mmông duh mĭn kơ mnuih ruă jing lu hĭn”.

 Nguyễn Hữu Vũ Quang, K’iăng khua kiă kriê knơ̆ng bruă mdrao mgŭn čar Daklak brei thâo, amâo mâo djŏ knŏng hjăn ti gưl čar, ƀiădah bruă bi mlih mrô hlăk dôk ngă wăt ti dŭm boh sang êa drao alŭ wăl. Jih jang dŭm boh sang êa drao mâo ba yua sơăi phần mềm pioh kơ bruă kiă kriê, mkă dlăng, mdrao mgŭn, lehanăn bruă tlŏ mgang... Phần mềm bruă kiă kriê sang êa drao nah gŭ mâo ngă leh truh kơ 185 boh sang êa drao să alŭ, ƀuôn hgŭm, wăl krah. Ară anei mâo leh 21 boh sang êa drao mâo leh kdrăp mkă dlăng, kăp kčĕ hưn, lehanăn đru hlăm bruă mdrao mgŭn mơ̆ng kbưi. Anôk bruă mdrao mgŭn hlăk dôk mkŏ phần mềm “Aê mdrao truh hŏng grăp boh sang” kñăm bi kjăp hĭn bruă mkă dlăng mdrao mgŭn hŏng mnuih ƀuôn sang, lehanăn mđĭ hnơ̆ng jăk bruă mdrao mgŭn hlăm dŭm boh sang êa drao gŭn nah gŭ.

Nguyễn Hữu Vũ Quang, hưn mthâo hlăm wưng tinăp, bruă mdrao mgŭn čar Daklak lŏ dơ̆ng mlih mrâo klei bhiăn mă bruă, mđĭ hnơ̆ng kjăp, klei thâo, lehanăn boh tŭ dưn klei kiă kriê bruă knuă, mâo klei bi mlih sĭt mơ̆ng bruă bi mlih mrô:

 “Tal sa mkŏ mjing anôk pioh ênoh čih djŏ tuôm hŏng bruă mdrao mgŭn, klă mngač hŏng grăp hdră mkă dlăng mdrao mgŭn; Tal dua jing mjing atur kơ bruă mdrao mgŭn čiăng kơ mnuih ƀuôn sang thâo dưn yua klei čoh čuăn leh kơ anăn pô hlăm   VNEID mâo bi klin leh ênŭm kơ ênoh bruă mdrao mgŭn ti hjiê ala čar mkăp pioh; tal 3 jing kăp hưn bi êdah jih hlăm online kơ mnuih ƀuôn sang lehanăn hŏng phung duh mkra, ktưn bi leh ênŭm 100% kơ jih jang bruă knŭk kna dôk ngă hlăm bruă hră mơar ară anei”./.