VOV4.Êđê - Khădah kluôm ala tlŏ leh êbeh 255 êklăk hnơ̆ng vaccine Covid 19 kơ mnuih ƀuôn sang, ƀiădah ênoh tlŏ aruăt tal 3, tal 4 hŏng mnuih mơ̆ng 18 thŭn kơ dlông, boh nik aruăt tal 2 kơ phung hđeh mơ̆ng 5 truh 12 thŭn mrâo ƀiă, ênoh vaccine dŭm alŭ wăl mâo bi mklă mơ̆ng ară anei truh kơ knhal jih thŭn ƀiă hĭn mkă hŏng ênoh mnuih ka tlŏ. Klei anei brei ruh mtlaih čiăng mtrŭt mđĭ hnơ̆ng luôm vaccine hlăm wưng ti anăp. Anei jing mta phŭn klei bi kƀĭn online kơ hdră gang mkhư̆ klei ruă tưp mơ̆ng Phŭn bruă mdrao mgŭn hŏng 63 čar, ƀuôn prŏng mkŏ mjing aguah hruê 25/8. Čiăng mđĭ hnơ̆ng tlŏ vaccine, K’iăng nai prŏng, nai prĭn Nguyễn Thị Liên Hương, K’iăng khua phŭn bruă mdrao mgŭn brei thâo, Phŭn bruă mtă kơ Knơ̆ng bruă mdrao mgŭn dŭm alŭ wăl bi hgŭm hŏng Knơ̆ng bruă sang hră m’ar mđĭ hdră tlŏ vaccine kơ hđeh mơ̆ng 5 truh gŭ 12 thŭn hlăm mlan 8-9/2022 lehanăn aruăt lŏ mñă kơ mnuih mơ̆ng 12 truh kơ gŭ 18 thŭn hlăm 3 mlan gưl 3 thŭn 2022 leh phung hđeh lŏ nao sang hră. Mkŏ mjing hdră lŏ tlŏ aruăt mñă wĭt kơ mnuih mơ̆ng 18 thŭn kơ dlông, mđĭ hnơ̆ng luôm vaccine aruăt tal 3 êbeh 90%./.

H’ Nêč pô mblang