VOV4.Êđê- Anôk bruă ktuê dlăng klei ruă ƀuôn prŏng Hồ Chí Minh brei thâo, ƀuôn prŏng čih yap mâo thiăm 1 čô mnuih djiê kyua êngoh bi ƀlĕ êrah. Snăn mâo leh 17 čô mnuih djiê kyua êngoh bi ƀlĕ êrah mơ̆ng akŏ thŭn truh ară anei, đĭ 14 čô mkă hŏng thŭn 2021. Mơ̆ng hruê 1-7.8, ƀuôn prŏng Hồ Chí Minh mâo 3.066 čô mnuih êngoh bi ƀlĕ êrah, bi knar hŏng ênoh djŏ hruê kăm êlâo, hrŏ 6,4% mkă hŏng kah knar 4 hruê kăm êlâo, hlăm anăn mâo ênoh mnuih dôk đih mdrao hrŏ 3,5% leh anăn mdrao ti sang hrŏ 9,4%. Mơ̆ng akŏ thŭn truh ară anei, ƀuôn prŏng  Hồ Chí Minh mâo 39.449 čô êngoh bi ƀlĕ êrah, đĭ êbeh 178% mkă hŏng wưng anei thŭn 2021, hŏng ênoh mnuih êngoh bi ƀlĕ êrah kjham jing 679 čô. Ƀuôn prŏng ăt mâo thiăm 181 anôk mâo klei ruă êngoh bi ƀlĕ êrah ti 96 ƀuôn hgŭm, să hlăm 20/22 kdriêk čar, kdriêk, ƀuôn prŏng Thủ Đức, hrŏ 18 anôk mkă hŏng 2 hruê kăm êlâo anăn./.