VOV4.Êđê- Čar Dak Lak srăng lŏ pŏk hdră tlŏ vaccine gang mkhư̆ klei ruă buôr čuh kô̆ kŏng đŏk wưng tal 3, hŏng mta kñăm mâo 95% ênoh mnuih hlăm êpul êya dưi tlŏ jih vaccine. Nay Phi La, Khua knơ̆ng bruă mdrao mgŭn čar Dak Lak brei thâo, hnơ̆ng vaccine gang mkhư̆ klei ruă buôr čuh kô̆ kŏng đŏk (vaccine TD) dưi mkăp hlăm gưl anei mâo 743.000 hnơ̆ng.

Knơ̆ng bruă gĭt gai leh anôk bruă mdrao mgŭn ksiêm dlăng ênoh mnuih ka tlŏ ti alŭ wăl amâo dah dŭm krĭng mâo lu mnuih ruă ka tlŏ ênŭm, rơ̆ng jih jang mnuih dưi tlŏ ênŭm 2 aruăt, hnơ̆ng tlŏ mgang êbeh 95% ti jih jang să, ƀuôn hgŭm, wăl krah, boh nik ti krĭng taih kbưi, krĭng hdră mdrao mgŭn dôk kƀah. Anôk bruă mdrao mgŭn mkăp djăp ai dưi, klei mâo, kdrăp mnơ̆ng lehanăn phung knuă druh mă bruă tlŏ mgang hluê djŏ si klei kčah mtrŭn. Bruă tlŏ vaccine gang mkhư̆ klei ruă buôr čuh kô̆ kŏng đŏk hlăm wưng phung hđeh mơ̆ng 5 truh 11 thŭn ka dưi tlŏ mgang Covid 19 srăng ba wĭt boh tŭ mdua hlăm hdră gang mkhư̆ klei ruă tưp./.

Pô mblang: H’Nêč Êñuôl