VOV4.Êđê- Hlăm wưng êgao, lu alŭ wăl hlăm kluôm ala, hlăm anăn mâo čar Dak Lak lĕ hlăm klei kƀah êa drao, kdrăp mdrao mgŭn ngă kơ mnuih ƀuôn sang rŭng răng. Djŏ tuôm kơ klei anei, Khua knŭk kna Phạm Minh Chính gĭt gai leh klei bi kƀĭn Dhar bruă knŭk kna kơ bruă anei, hlăm anăn lač kơ mta phŭn kơ hră mơar mnia blei. Khua knŭk kna mtă êlâo hĭn Phŭn bruă mdrao mgŭn gĭt gai, bi hgŭm hŏng dŭm phŭn, dhar bruă djŏ tuôm mjêč ktuê dlăng dŭm hdră kčah ară anei djŏ tuôm kơ bruă blei êa drao, kdrăp mnơ̆ng mdrao mgŭn. Mơ̆ng anăn pral, gĭr msir mgaih, mtrŭn hră mơar hlue si klei dưi.

Dôk kiă ung dôk đih ti sang êa drao Sang hră gưl prŏng Ƀuôn Ama Thuôt čar Dak Lak, mô̆ pô dôk đih sang êa drao brei thâo, mâo hŏng anei 5 hruê, ung ñu mâo kei ruă dăl aruăt êrah kboh leh anăn ba dŏng mdrao ti sang êa drao anei. Hlăm klei ksiêm mkă, Aê mdrao brei thâo, pô ruă anei srăng mdưm stent êlan êrah kboh kơh dưi lŏ dŏng hdĭp. Ƀiădah kyua sang êa drao amâo mâo ôh kdrăp anăn, knŏng dưi dŏng mdrao phŭn kčưm leh anăn brei gŏ sang ba kơ sang êa drao nah dlông hĭn:

“Phung êa mdrao dôk ngă bruă tinăn diñu dŏng mdrao êlâo, leh anăn hlăk mblang klei ruă anei jing kjham êdi, lŏ dôk tinei bhiâo djiê mtam yơh, ară anei tinei amâo mâo kdrăp masin ngă bruă ôh”.

Amâo djŏ knŏng kƀah drăp yua bruă mdrao mgŭn, lu mnuih ruă ti čar Dak Lak ăt dleh dlan êdi hlăm klei blei êa drao ti dŭm anôk čhĭ êa drao hlăm sang êa drao. Klei kƀah hin êa drao leh anăn kdrăp yua bruă mdrao mgŭn mâo Nguyễn Đại Phong, khua kiă kriê Sang êa drao prŏng krĭng Lăn Dăp Kngư bi klă. Nguyễn Đại Phong brei thâo, phŭn agha klei anei jing ka dưi ngă ôh dŭm klei bi lông blei hlăm klei dưi mơ̆ng knơ̆ng bruă mdrao mgŭn čar Dak Lak.

“Truh kơ ară anei dôk mâo 2 klei bi lông blei dôk kpăk hŏng hdră bhiăn mơ̆ng klei bhiăn ala čar msĕ si klei bi lông blei anei djŏ ƀiădah dŭm mta mnơ̆ng ka dưi ngă ôh kyua ênoh đĭ, ka ba ôh hlăm hdră êlan mơ̆ng phŭn bruă leh anăn dŭm mta hră mơar arăng ka dưi bi leh mơh leh anăn klei bi lông blei stent mdưm êlan êrah, hlăm hruê mmông êgao, mâo đa đa sang êa drao mdrao kơ kboh ti Hà Nội leh anăn dŭm sang êa drao mkăn djŏ tuôm hŏng klei bhiăn ala čar kơ boh klei stent dưm êlan êrah, kyuanăn klei blei stent mdưm êlan êrah jing dŭm knơ̆ng bruă dôk răng êdi kyuadah dŭm sang êa drao dôk ksiêm dlăng. Tơdah amâo mâo ngă djŏ srăng soh hŏng klei bhiăn ala čar.”

Kƀah êa drao leh anăn kdrăp mdrao mgŭn ngă kơ bruă ksiêm mkă mdrao mgŭn ti Sang êa drao krĭng Lăn Dap Kngư tuôm hŏng klei dleh dlan

Nay Phi La, khua kiă kriê knơ̆ng bruă mdrao mgŭn čar Dak Lak brei thâo, hluê si klei čih yap phŭn kčưm, hlăm dŭm anôk mkă dlăng, mdrao mgŭn klei ruă ti alŭ wăl čar dôk kƀah hĭn dŭm mta mnơ̆ng djŏ tuôm hŏng bruă mkă dlăng leh anăn mdrao mgŭn msĕ si: êa drao mđĭ ai bi kdơ̆ng hŏng kman, êa drao djŏ tuôm hŏng êpul generic, boh nik jing êa drao kơrŭ wĭt ai ktang, dŏng mdrao. Hluê si Nay Phi La, phŭn agha ngă truh klei anei jing klei ruă tưp Covid-19 hlăm 2 thŭn êgao bi kpăk leh dŭm klei mkăp brei tar rŏng lăn, ênoh mnơ̆ng dhơ̆ng, logistic đĭ sơăi, kyuanăn dleh dưi mâo sa ênoh djŏ. Mbĭt hŏng anăn, bruă bi lông blei dŭm mta kdrăp yua bruă mdrao mgŭn ăt dleh hĭn kyua sa mta masin, ƀiă jing mta mrâo hĭn, klei yua ăt mdê, kyuanăn ênoh srăng mdê mơh. Bi kơ êa drao dưi mbha jing 5 êpul čiăng ngă klei bi lông blei ƀiădah kdrăp yua bruă mdrao mgŭn amâo mâo msĕ sơnăn ôh. Ka lač ôh hlăm klei đăo knang, hnơ̆ng tŭ jăk mơ̆ng dŭm knơ̆ng bruă mkra mjing ăt mdê mdê. Klei anei ăt bi dleh kpăk bruă blei mnơ̆ng dhơ̆ng.

            Čiăng ruh mgaih klei dleh dlan knŏng mă êjai, knơ̆ng bruă mâo leh klei mñă kơ dŭm anôk bruă mkăp brei êa drao hlăm dŭm klei kuôl kă lŏ dơ̆ng đru mkăp brei êa drao hlăm kluôm čar. Bi kơ sui, čar srăng mkŏ mjing sa anôk bruă bi lông blei êngiê čiăng đru kơ dŭm anôk bruă mdrao mgŭn amâo mâo klei dleh kpăk hŏng dŭm hdră bhiăn mơ̆ng klei bhiăn ala čar.

“Hmei mâo klei kčĕ hŏng bruă sang čư êa čar mkŏ mjing mta anôk bruă bi lông blei êa drao, kdrăp yua bruă mdrao mgŭn kơ kluôm bruă mdrao mgŭn dưi thâo. Mkŏ mjing hră anăn êa drao mdê hĭn kơ čar hluê si tur knơ̆ng pô duh bi liê kdrăp yua êlâo anăn, mkŏ mjing sa hdră răng mgang ăt msĕ hŏng hdră bhiăn, ngăn prăk kơ phung knuă druh nao bi lông blei.”

    Hruê 23/6 mrâo êgao, Khua knŭk kna Phạm Minh Chính gĭt gai leh klei kƀĭn knŭk kna kơ bruă mkăp brei êa drao, kdrăp yua bruă mdrao mgŭn leh anăn dŭm hdră êlan rơ̆ng mnuih mă bruă kơ bruă mdrao mgŭn. Hluê si klei hưn mdah mơ̆ng phŭn bruă mdrao mgŭn, ară anei mâo dŭm klei kƀah hin êa drao hlăm dŭm alŭ wăl leh anăn sang êa drao hlăm gưl dlông. Phŭn agha kyua kƀah mnơ̆ng dhơ̆ng, ênoh ênil lu mta mnơ̆ng đĭ ktang ngă kơ bruă blei dŭm mta êa drao, kdrăp yua bruă mdrao mgŭn, dŭm mta hoá chất, êa drao yua kơ bruă gang mkhư̆ klei ruă tưp leh anăn mkă dlăng, mdrao klei ruă jing dleh dlan hĭn. Năng mđing hĭn jing mâo klei mĭn hŭi, hŭi ngă soh, hŭi ksiêm dlăng, amâo mâo jhŏng ngă, jhŏng blei ti dŭm alŭ wăl leh anăn dŭm anôk bruă.

Bi klă hlăm klei kƀĭn, Khua knŭk kna Phạm Minh Chính lač klă, phŭn agha mơ̆ng pô jing êlâo hĭn, hŏng bruă mkŏ mjing klei bi lông blei êmưt, ka mâo ôh klei blŭ hrăm bi klă ênoh êa drao djŏ hŏng boh sĭt anôk mnia mblei.

Kâo mñă klă brei hluê ngă djŏ dŭm hdră bhiăn dôk mâo kơ klei bi lông blei kñăm ti gưl dlông leh anăn alŭ wăl, hŏng ai tiê jing klă mngač, djŏ hŏng boh sĭt, gang mkhư̆ klei ƀơ̆ng ngăn, klei amâo mâo jăk, klei tŭ kơ êpul čiăng rơ̆ng dưi mkăp brei ênŭm êa drao kơ dŭm anôk bruă mdrao mgŭn. Ti anăp jing srăng rơ̆ng dŭm mta êa drao tĭng hlăm ênua bruă mdrao mgŭn. Ksiêm dlăng, gĭt gai mđĭ hĭn klei ksiêm dlăng mơ̆ng knŭk kna ti dŭm anôk bruă djŏ tuôm čiăng rơ̆ng amâo mâo klei êmưt hlăm bruă brei klei dưi yua êa drao, hmao mkra mlih, bi mbŏ dŭm hdră bhiăn čiăng hnưm bi ênưih dŭm mta hră mơar knŭk kna. Mtrŭt mđĭ bruă mbha gưl čiăng blei dŭm kdrăp yua bruă mdrao mgŭn hluê si tur knơ̆ng ba mdah hnơ̆ng čoh čuăn, hdră kčah leh anăn mđĭ hĭn klei ksiêm dlăng, ktuê dlăng.

Pô mblang: Y-Ƀel Êban