Hŏng mnuih ƀuôn sang Êđê ti ƀuôn Kŏ Mleo, anôk mâo lu mnuih êngoh bi ktư̆ lu hĭn ti să Hoà Thắng, ƀuôn prŏng Ƀuôn Ama Thuôt dŭm thŭn êlâo, snăn klei ruă êngoh bi ktư̆ amâo lŏ mâo ôh. Amai H’Rôbeka Mlô, ƀuôn Kŏ Mleo, brei thâo:        

 “Hlăm ƀuôn snăn lu mnuih ƀuôn sang nao dôk hlăm hma, mâo mnuih snăn nao hlăm dliê đăk êbŭng. Ară anei klei thâo srăng răng mgang dưi mđĭ, diñu thâo săng lu leh. Kyua Anôk mdrao mgŭn nao hâo hưn mtô mblang lu, ară anei tơdah êngoh snăn čŏng nao ti Anôk mdrao mgŭn, amâo msĕ si đưm ôh ngă yang, tơdah nao hlăm dliê snăn ăt djă mŭng băn mơh.”

Aê drao Hoàng Văn Hùng, Khua anôk mdrao mgŭn să Hoà Thắng brei thâo, klei thâo săng gang mkhư̆ klei ruă mơ̆ng mnuih ƀuôn sang ƀrư̆ dưi mđĭ; klei hdĭp dưi mkra mđĭ anăn klei nao hlăm dliê, hlăm hma lu hruê dưi mkhư̆ leh; mbĭt anăn bruă pŏk ngă dŭm bruă gang mkhư̆ klei êngoh bi ktư̆ ăt dưi mâo Anôk bruă mdrao mgŭn mđing:

“Anôk bruă kƀĭn pŏk ngă grăp mlan kơ êpul mă bruă čiăng mđĭ bruă hâo hưn mtô mblang gang mkhư̆ klei ruă êngoh bi ktư̆ kơ phung huĭ mâo klei ruă msĕ si nai đih pĭt hlăm hma leh anăn phung mâo mnuih hlăm gŏ sang nao mă bruă kbưi ti dŭm alŭ wăl dôk mâo klei ruă êngoh bi ktư̆, mbha mŭng, băn mâo tram leh êa drao.”

 Hlue si aê mdrao Võ Minh Hùng, Khua Anôk bruă mdrao mgŭn ƀuôn prŏng Ƀuôn Ama Thuôt, thŭn 2022, jih jang 21 să ƀuôn hgŭm mơ̆ng ƀuôn prŏng 3 thŭn leh mâo nanao kman klei ruă êngoh bi ktư̆, dŭm klei găl rơ̆ng čiăng lăm lui klei ruă êngoh bi ktư̆. Ƀuôn prŏng jing anôk bruă tal êlâo mơ̆ng čar Dak Lak dưi tŭ yap lăm lui klei ruă êngoh bi ktư̆. Aê mdrao Võ Minh Hùng brei thâo, wăt tơdah snăn, ƀuôn prŏng ăt lŏ dơ̆ng pŏk ngă dŭm hdră msir gang mkhư̆ klei ruă êngoh bi  ktư̆.

 “Bruă dưi lăm lui klei ruă êngoh bi ktư̆ hlăm thŭn 2022 jing dŭm klei tŭ tal êlâo, hlăm wưng kơ anăp ăt brei lŏ dơ̆ng mđĭ bruă hâo hưn mtô mblang kơ mnuih ƀuôn sang, boh nik phung tuôm nao đih đăm hlăm hma, amâodah nao mă bruă ti anôk mkăn čiăng kơ arăng thâo săng kơ bruă răng mgang klei suaih pral kơ êpul êya, êngao anăn hmei ăt srăng mđĭ ktang dŭm adŭ hriăm mjuăt čiăng mđĭ klei thâo kơ phung knuă druh mdrao mgŭn kơ bruă thâo ƀuh, hâo hưn mtô mblang leh anăn bruă ktrâo lač kơ mnuih ƀuôn sang dŭm hdră gang mkhư̆ klei ruă êngoh bi ktư̆ ti ƀuôn prŏng.”

 Hlue si Anôk bruă ktuê dlăng klei ruă čar Dak Lak, boh klei ruă êngoh bi ktư̆ ƀrư̆ hrŏ hlăm 3 thŭn êgao. Tơdah thŭn 2020, kluôm čar mâo 126 čô mnuih êngoh bi ktư̆, snăn truh thŭn 2021-2022, grăp thŭn knŏng mâo êbeh 10 čô. Êngao kơ ƀuôn prŏng Ƀuôn Ama Thuôt dưi tŭ yap lăm lui klei ruă êngoh bi ktư̆, ară anei mâo 6 kdriêk wăl krah čih anăn srăng lăm lui klei êngoh bi ktư̆ hlăm knhal jih thŭn anei.

    Aê mdrao Hoàng Hải Phúc, K’iăng Khua Anôk bruă ksiêm dlăng klei ruă čar Dak Lak brei thâo, wăt tơdah hdră gang mkhư̆ klei ruă êngoh bi ktư̆ čar mâo klei tŭ dưi ngă, ƀiădah ti krĭng Lăn Dap Kngư leh anăn dŭm čar mơ̆ng ala čar ăt dleh ktuê dlăng, huĭ djŏ klei ruă êngoh bi ktư̆ leh anăn bluh mâo klei ruă. Kyua anăn, hlăm wưng kơ anăp, Anôk bruă pral mkŏ mjing hdră kčah gang mkhư̆ klei ruă êngoh bi ktư̆, mđĭ lar dŭm bruă ktuê dlăng jih jang hdră:

  “Hmei mđĭ ktang bruă hâo hưn mtô mblang kơ mnuih ƀuôn sang leh anăn dŭm anôk bruă bi hgŭm. Tal dua hmei mđĭ bruă ksiêm dlăng phung ruă, tal êlâo ksiêm dlăng anôk mâo lu mnuih ruă. Grăp gưl trŭn ksiêm dlăng phung nao đih đăm hlăm hma, phung đing mâo klei ruă snăn mă êrah ksiêm mkă čiăng thâo ƀuh phung djŏ kman leh anăn mbĭt anăn hmei pŏk ngă hdră msir tram mŭng hlăm êa drao hlăm 2 gưl.”

 Dŭm klei tŭ dưi ngă hlăm bruă gang mkhư̆ klei ruă êngoh bi ktư̆ ti čar Dak Lak jing boh kdrŭt čiăng kơ čar lŏ dơ̆ng msưh kdŭn klei ruă anei, truh kơ bruă lăm lui klei ruă êngoh bi ktư̆ hlăm thŭn 2028./.