Tui si anôk bruă ksiêm dlăng klei ruă čar Daklak, mơ̆ng akŏ thŭn 2024 truh ară anei, kluôm čar mâo leh êbeh 300 čô mnuih mâo klei ruă êngoh bi ƀlĕ êrah ênŭm hlăm 15/15 kdriêk, wăl krah, ƀuôn prŏng. Lu hĭn êdi ăt jing hlăm ƀuôn prŏng Ƀuôn Ama Thuôt, kdriêk Ea Kar lehanăn Krông Pač.

Snăn hlam kluôm čar Daklak ară anei klei ruă êngoh bi ƀlĕ êrah hlăk dôk mâo lehanăn đĭ lar hlăm lu anôk. Hoàng Hải Phúc, Khua anôk bruă kiă kriê klei ruă tưp čar Daklak lač, čiăng dưi mkhư̆ klei ruă anei, anôk bruă mdrao mgŭn bi hgŭm hŏng dŭm anôk bruă hâo hưn mâo nanao klei hâo hưn mtă mtăn kơ bruă gang mkhư̆ klei ruă êngoh bi ƀlĕ êrah hlăm alŭ wăl, ksiêm ti dŭm anôk mâo klei ruă mâo hdră gang mkhư̆ bi pral./.