Dôk kriê dlăng amĭ 94 thŭn djŏ Covid-19 ti Anôk mdrao klei rưa tưp, sang êa prŏng krĭng Lăn Dap Kngư, Đặng Ngọc Lân, ti alŭ 8, să Hòa Thắng, ƀuôn prŏng Ƀuôn Ama Thuôt brei thâo, sui hŏng anei 1 hruê kăm, amĭ ñu mâo klei bi knăl mtŭk, êngoh hlơr, êmăn êmiêk, dleh huă mnăm, gŏ sang bi mĭn mâo klei ruă hơăi mang anăn blei êa drai êngoh kơ ñu mnăm. Dŭm gưl êngoh sui, gŏ sang ba ñu nao đih mdrao. Leh thâo amĭ djŏ Covid-19, Lân rŭng răng kyua amĭ ñu ka tuôm tlŏ vaccin Covdi-19 ôh.

“Phung di neh lač ñu dôk ti sang, anăn tlŏ kơ phung mda asei êlâo hĭn, bi ñu khua thŭn leh lui êdei amâo brei hlei pô bi tuôm hŏng ñu snăn dưi ƀiă mơh. Mrâo êgao snăn bi mĭn kyuă klei ksŏ đuč, amâo mĭn ôh djŏ Covid-19, ba ti test anăn djŏ Covid. Amâo thâo ôh, phung hđeh ti sang nao sang hră jih, bi kâo ăt tlŏ vaccin leh mơh, bi ñu amâo mâo anôk nao ôh.”

        Dôk mdrao COVID-19 ti Sang êa drao prŏng krĭng Lăn Dap Kngư, ayŏng

Hoàng Văn Hân, alŭ Ana, să Dray Asăp, kdriêk Krông Ana brei thâo, sang ñu čhĭ mnia điêt, grăp hruê bi tuôm hŏng lu mnuih anăn ñu amâo thâo ôh hbĭl djŏ Covid-19. Hlăk anăn ƀuh ruă đŏk, êngoh hlơr anăn ñu nao ti sang êa drao:

“Kâo tlŏ leh 3 aruăt vaccin anăn dưi ƀiă, klei ruă kăn đei kjham mơh, êngoh hlơr, dua čô anak ăt kăn đei êmăn mơh, knŏng đŏk ruă, amâo dưi huă ƀơ̆ng anăn êmưt lŏ suaih”

        Hlue si aê mdrao Phạm Hồng Lâm, Khua anôk mdrao klei ruă tưp, Sang êa drao prŏng krĭng Lăn Dap Kngư, sa mlan hŏng anei, ênoh mnuih nao đih mdrao kyua Covid-19 đĭ pral. Phung ruă lu jing mdrao leh ti sang leh anăn mâo klei ruă êlâo. Ară anei Anôk anei dôk mdrao kơ 25 čô djŏ COVID-19.

“Hlăm 25 čô anăn mâo 5% bi êwa hŏng oxy, truh ti wưng anei snăn ka mâo ôh hlei kjham đei, khădah snăn ăt adôk mâo klei hgăm. Čiăng hưn brei răng leh anăn gang mkhư̆ truh kơ djiê snăn phung mâo klei ruă hlăm êlan bi êwa, boh nik hlăm phung mâo leh klei ruă êlâo snăn brei nao ksiêm mkă leh anăn lač kơ klei ruă tui si grăp čô. Leh anăn mâo sa klei mnuih ƀuôn sang hơĭt ai tiê jing phung hdjul snăn mdrao ti êngao, knŏng đih mdrao phung mâo klei ruă kjham leh anăn ktrŏ, leh anăn phung anei snăn lu jing mâo klei ruă êlâo leh”.

 Mơ̆ng akŏ thŭn 2023 truh hruê 16/5, kluôm čar Dak lak mâo 570 čô djŏ Covid-19. Knŏng hjăn 7 hruê êgao, Dak Lak mâo 252 čô leh anăn 1 čô djiê. Hlue si Hoàng Hải Phúc, K’iăng Khua Anôk bruă ksiêm dlăng klei ruă tưp čar Dak lak, ênoh mnuih djŏ Covdi-19 đĭ pral leh gưl mdei 30/4-1/5 mrâo êgao. Ară anei lu mnuih ƀuôn sang lui leh klei mưng truă čhiăm guôm ƀô̆ leh anăn mdjiê kman anôk lu mnuih anăn klei huĭ tưp lar lu hĭn mơh.

“Hmei kčĕ leh kơ Knơ̆ng bruă mdrao mgŭn ăt msĕ mơh Knơ̆ng bruă sang čư̆ êa čar gĭt gai jing mđĭ bruă hâo hưn mtô mblang čiăng kơ mnuih ƀuôn sang thâo săng hdră 2 mta, hưn kơ mnuih ƀuôn sang mđing kơ hdră tlŏ hmei dôk pŏk ngă.  Ară anei jih jang dŭm kdriêk mâo mnuih djŏ Covid-19 ăt mâo wăl bi ktlah hjăn, ăt mđĭ lar hdră gang mkhư̆ leh anăn klei ruă tưp. Tơdah ruă kjham snăn kơh ba kơ sang êa drao prŏng krĭng jing anôk knhal tuč bi dŭm anôk bruă ăt mprăp mdrao kơ phung djŏ Covid-19 hdjul.”

Ăt hlue si klei hưn mdah mơ̆ng Anôk bruă ktuê dlăng klei ruă CDC čar Dak Lak, ti čar mrâo mâo sa čô djiê kyua Covid-19. Mnuih ruă 56 thŭn, ti alŭ 4, wăl krah Ƀuôn Trăp, kdriêk Krông Ana, čar Dak lak. Ñu mâo klei ruă mơ̆ng hruê 12/5 hŏng klei ruă mâo êlâo leh jing lu mta hlăm asei mlei, ruă boh ƀleh, tiê leh anăn mâo mta mmih hlăm êrah.

Êlâo anăn, hlăm mlan 4 mrâo êgao, leh ƀuh 8 čô hđeh sang hră djŏ Covid-19, bruă mdrao mgŭn Dak Lak Test leh Covid-19 kơ jih jang hđeh sang hră gưl 2 Trưng Vương, ƀuôn hgŭm Thành Công, ƀuôn prŏng Ƀuôn Ama Thuôt. Lŏ mâo thiăm 7 čô djŏ kman SARS -CoV2. Ti anăp klei dleh ktuê dlăng mơ̆ng Covid-19 leh ênoh mnuih ruă đĭ, bruă mdrao mgŭn Ƀuôn prŏng Ƀuôn Ama Thuôt, čar Dak Lak kčĕ kơ bruă sang čư̆ êa dŭm gưl kơ hdră gang mkhư̆ Covid-19. Mbĭt anăn mđĭ hâo hưn kơ mnuih ƀuôn sang čiăng mđĭ klei thâo răng mgang klei suaih pral pô leh anăn êpul êya./.