VOV4.Êđê - Hluê mrô ksiêm yap mơ̆ng Anôk bruă ksiêm dlăng klei ruă tưp čar Dak Lak, ênoh mnuih ruă êngoh bi ƀlĕ êrah đĭ hlăk sa hruê kăm mâo hlăm brô 400 čô ruă. Anei jing klei bi êdah huĭ bluh mâo klei ruă tưp lu hlăm wưng ti anăp. Knŏng tĭng 3 hruê giăm anei (25-27/7) Dak Lak mâo 200 čô ruă, hlăm anăn 114 čô ruă ktrŏ. Mđĭ ênoh mnuih ruă ti Dak Lak truh 2.211 čô, đĭ 4,4 blư̆ mkă hŏng thŭn 2021.

Klei ruă êngoh bi ƀlĕ êrah mâo ti jih 15 kdriêk, wăl krah, ƀuôn prŏng, hlăm anăn 3 alŭ wăl mâo ênoh mnuih ruă lu jing Êa Hleo, Krông Pač lehanăn Ƀuôn Ama Thuôt. Hluê Hoàng Hải Phúc, K’iăng khua anôk bruă ksiêm dlăng klei ruă tưp čar Dak Lak, klei ruă srăng bluh mâo lu hlăm mlan 8 lehanăn 9, kyua anăn mbĭt hŏng klei gĭr mơ̆ng anôk bruă mdrao mgŭn, grăp čô brei mđĭ klei thâo săng, hluê ngă jăk hdră gang mkhư̆ msĕ si bi mdoh wăl hdĭp mda, mkŭp dŭm mta mnơ̆ng mgơ̆ng êa amâo lŏ yua, mdjiê hluăt lŏk, kêč ƀloh./.

H’Nêč pô mblang