VOV4.Êđê- Mơ̆ng mlan 12/2021, êjai klei ruă tưp Covid-19 dleh dưi ksiêm dlăng kyua mâo lu mnuih mâo klei ruă tưp Covid-19, čar Dak Lak tŭ ư leh hŏng hdră brei phung mâo klei ruă tưp Covid-19 ti alŭ wăl ƀuôn prŏng Ƀuôn Ama Thuôt dưi mdrao, bi ktlah ti sang. Kñăm bi hrŏ klei ktrŏ kơ dŭm anôk bruă mdrao mgŭn, sa êpul aê mdrao ti alŭ wăl ƀuôn prŏng Ƀuôn Ama Thuôt čŏng pô mkŏ mjing êpul đru ktrâo lač hŏng êlan online amâo mâo mă prăk đru kơ phung F0 dôk mdrao ti sang.

       Leh thâo pô djŏ Covid 19, Amai Cao Thị Thanh Phương, ti alŭ 2, ƀuôn hgŭm Tân Hoà huĭ hyưt, kyua hlăm sang lŏ mâo 2 čô anak điêt. Mâo ƀĭng găp hưn mthâo kơ êpul mdrao F0 ti sang hlăm čar Dak Lak, amai iêu đĭng blŭ akâo klei đru, mơ̆ng anăn amai amâo lŏ huĭ hyưt, bi hgŭm hluê ngă dŭm klei ktrâo lač mơ̆ng phung nai aê mdrao, hgao klei ruă tưp:

“Thâo pô jing F0, kâo huĭ hyưt mơh, kâo akâo bi ktlah ti sang êdei anăn kâo hmư̆ ƀĭng găp hưn mthâo kơ êpul nai aê mdrao Hoà An mdrao phung F0 ti sang. Hlăm êpul phung aê mdrao Hoà Anh, digơ̆ mhač, grăp hruê hruê phung nai aê mdrao iêu đĭng blŭ êmuh klei suaih pral lehanăn ksiêm mkă kơ pô, ktrâo lač kơ kâo hdră bi ktlah čiăng rơ̆ng klei êđăp ênang kơ pô lehanăn găp djuê riêng gah, phung nai aê mdrao mkăp êa drao kơ pô mdrao ti sang, hlăm hdră mdrăp ară anei kâo jih leh kman, lač jăk êdi kơ êpul nai aê mdrao Hoà Anh đru mdrao mnuih F0 ti sang”.

        Ăt msĕ hŏng amai Cao Thị Thanh Phương lehanăn lu mnuih ruă Covid 19 mkăn ti čar Dak Lak, leh 5 hruê mdrao ti sang hŏng klei đru mơ̆ng êpul nai aê mdrao kăp mdrao phung F0 ti sang, Trần Thị Kim Loan ti ƀuôn hgŭm Tân An, ƀuôn prŏng Ƀuôn Ama Thuôt mâo boh tŭ ksiêm mkă amâo lŏ ƀuh ôh kman Sar CoV2. Hơ̆k m’ak kyua suaih pral Loan lač jăk êdi kơ êpul đru kčĕ - mdrao mnuih ruă ti sang, jih ai tiê đru ktrâo lač kơ ñu êjai dôk mdrao.

“Mơ̆ng klei hâo hưn mơ̆ng Êpul đru kčĕ hdră mdrao anôk Hoà Anh snăn kâo iêu đĭng blŭ hưn mthâo lehanăn mâo mtam êpul nai aê mdrao đru kčĕ, mkăp brei êa drao, ktuê ksiêm hlăm grăp hruê. Leh 5 hruê kâo jih leh kman lehanăn hưn mthâo kơ anôk bruă djŏ tuôm hriê ksiêm bi mklă.

Êpul mă bruă mơ̆ng aê mdrao Hoà Anh đru mdrao phung F0 ti sang

         Êpul đru kčĕ online lehanăn đru kơ phung F0 ti sang mâo aê mdrao Phạm Hòa Anh, ară anei dôk mă bruă ti sang êa drao prŏng Thiện Hạnh, čar Dak Lak mkŏ mjing. Nao hlăm êpul mâo 50 čô nai aê mdrao ti lu čar, ƀuôn prŏng mdê mdê mbĭt hŏng êpul ba anăp čar Dak Lak. Čiăng dưi rơ̆ng jih hruê mlam, pral dru kčĕ online, êpul dưi kah mbha jing dŭm êpul đ’điêt, djŏ hŏng boh phŭn đru kčĕ kơ phung F0. Hluê anăn, êpul nai aê mdrao srăng đru kčĕ, dŏng mdrao; ktrâo lač kơ hdră bi mdoh mdjiê kman, hriăm bi êwa, ksiêm dlăng huĭdah đĭ kơ ktrŏ, hưn mthâo êlan đĭng blŭ mjêč; bi êpul mbha êa drao srăng đru kčĕ kơ hdră ba yua êa drao, kdrăp mnơ̆ng yua hlăm bruă mdrao mgŭn…

       Hluê si aê mdrao Hoà Anh,leh 4 mlan mkŏ mjing, êpul đru dlăng kriê klei suaih pral kơ hlăm brô 1500 čô jing F0 lehanăn amâo mâo mnuih ruă kjham ôh.

        “Nao hgŭm hlăm hdră anei mâo lu mnuih, đa mâo mnuih mă bruă hlăm anôk bruă mdrao mgŭn, đa êngao anôk bruă mdrao mgŭn tŭ đua klam kăp đru kơ mnuih ruă mkŏ dưm kdrăp ap, mtrŭt mđĭ ai arăng. Tal 2 jing hdră anei tơdah mâo lu phung ai tiê kmah đru srăng mâo keh prăk lehanăn mă yua prăk anăn pioh blei êa drao lu hĭn čiăng đru kơ mnuih ruă amâo guôn hiu blei êa drao lehanăn pô ăt mâo mơh ƀiă prăk đru kơ phung ba anăp msĕ si êa săng kơ digơ̆ êrô hiu.

        Mŭt hlăm thŭn 2022, klei ruă Covid 19 bluh mâo dleh dưi ksiêm dlăng ti Dak Lak, ênoh mnuih ruă đĭ nanao, djŏ hruê êbeh 4.500 čô ruă. Ară anei, čar Dak Lak mâo êbeh 87 êbâo čô ruă Covid 19, hlăm anăn ƀuôn prŏng Ƀuôn Ama Thuôt mâo êbeh 30 êbâo čô ruă. Hlăm êbeh 30 êbâo čô F0 anei mâo êbeh 15 êbâo čô dôk mdrao, 98% hlăm ênoh anăn dôk mdrao ti sang. Hluê si Nay Phila, Khua anôk bruă mdrao mgŭn čar Dak Lak, ênoh mnuih F0 dôk mdrao ti sang hlăm Ƀuôn Ama Thuôt ngă kơ anôk bruă mdrao mgŭn alŭ wăl lĕ hlăm klei ktrŏ lu đei mnuih ruă. Klei hrăm mbĭt, đru mơ̆ng êpul aê mdrao Phạm Hoà Anh năng čih yap êdi, đru bi hrŏ klei ktrŏ kơ anôk bruă mdrao mgŭn:

        “Adŭ mdrao mơ̆ng aê mdrao Hoà Anh hlăm Êpul mdrao Covid 19 êpul êya mâo djăp ênŭm leh mơh mơ̆ng kdrăp oxi lehkơnăn maĭ mkă SPO2 lehanăn wăt hruh A,B čiăng dŏng mdrao. Anei jing sa hlăm dŭm klei gĭr mơ̆ng êpul êya hlăm hdră gang mkhư̆ klei ruă. Snăn, anôk bruă mdrao mgŭn amâo hjăn păn ôh. Hlăm wưng ti anăp, kâo čang hmăng srăng dưi iêu mthưr dŭm êpul êya bruă lehanăn adŭ mdrao mgŭn bi hgŭm hŏng anôk bruă mdrao mgŭn mdrao phung F0 ti sang.

Êpul mă bruă mơ̆ng aê mdrao Hoà Anh mprăp djăp giêt oxi leh anăn kdrăp mdrao mgŭn mkăn čiăng đru mdrao F0 ti sang

          Hlăk klei ruă Covid 19 dôk mâo dleh dưi ksiêm dlăng, dưi lač klei hgŭm mơ̆ng êpul nai aê mdrao, êpul aê mdrao đru kčĕ online amâo liê prăk đru kơ mnuih ruă F0 ti sang jing klei năng mpŭ êdi, đru kơ phung F0 mâo anôk đăo knang, h’ĭt ai tiê gang mkhư̆ klei ruă tưp, mơ̆ng anăn đru mguôp amâo djŏ điêt ôh kơ hdră mdrơ̆ng hŏng klei ruă tưp lehanăn bi lar bra boh tŭ thâo bi đru jăk siam êdi hlăm êpul êya./.        

                                                    Pô mblang: H’Nêč Êñuôl