VOV4.Êđê - Hruê mbruê, êpul mă bruă mơ̆ng Phŭn bruă Mdrao mgŭn mâo Bùi Khánh Toàn, K’iăng khua anôk bruă ksiêm dlăng klei ruă tưp Lăn dap kngư ngă khua êpul mă leh bruă hŏng Sang êa drao prŏng krĭng lăn dap kngư lehanăn Anôk bruă ksiêm dlăng klei ruă tưp čar Dak Lak kơ hdră gang mkhư̆ klei ruă čut kra. Hluê klei hưn, leh mâo klei hưn brei răng kơ klei ruă anei mơ̆ng Êpul bruă mdrao mgŭn tar rŏng lăn, Knơ̆ng bruă mdrao mgŭn čar Dak Lak čih mkra leh hdră mdrơ̆ng lehanăn pŏk hdră ksiêm dlăng ti krĭng knông lăn, êlan đ’điêt.

Leh Việt Nam mâo mnuih ruă čut kra tal êlâo ti ƀuôn prŏng Hồ Chí Minh, anôk bruă mdrao mgŭn đru kčĕ kơ Anôk bruă sang čư̆ êa čar DakLak ba mdah Hdră mtrŭn ngă bruă êjai kñăm mdrơ̆ng hŏng klei ruă, mjuăt bi hriăm êpul mnuih mă bruă. Sang êa drao prŏng krĭng lăn dap kngư ăt mprăp kdrăp mnơ̆ng, êa drao, mnuih mă bruă ksiêm mkă dlăng, bi ktlah lehanăn mă mta ksiêm dlăng tơdah tăm mâo klei ruă anei. Čiăng mđĭ boh tŭ hdră gang mkhư̆, êpul ksiêm dlăng gĭt gai mkŏ mjing Anôk bruă gang mkhư̆ klei ruă anei, mđĭ hdră ksiêm dlăng, gang mkhư̆ klei ruă tưp kluôm čar, boh nik ti krĭng huĭ bluh mâo klei ruă anei lu./.

VOV TâyNguyên/ Pô mblang: H’Nêč Êñuôl