Leh čih yap mâo 2 anôk mâo klei ruă mnŭ ada (H5N1), ti 2 gŏ sang rông mnơ̆ng hlăm alŭ wăl să Ea Kli, kdriêk Krông Pač, Anôk bruă ksiêm dlăng klei ruă tưp čar Dak Lak bi mguôp hŏng Dhar bruă mdrao mgŭn kơ mnơ̆ng rông leh anăn bruă sang čư êa alŭ wăl hluê ngă lu hdră êlan kñăm gang mkhư̆ klei ruă mnŭ ada (H5N1) bluh đĭ hlăm mnŭ ada leh anăn arưp aram tưp kơ mnuih.

Hluê anăn, anôk bruă ksiêm dlăng klei ruă tưp (CDC) čar Dak Lak ngă leh bruă ksiêm duah, mgaih msir, ktuê dlăng klei ruă mnŭ ada hlăm mnuih ti să Ea Kli, kdriêk Krông Pač, bi mguôp hŏng anôk bruă mdrao kơ mnơ̆ng rông hâo hưn kơ mnuih ƀuôn sang thâo klă klei mnŭ djiê leh anăn mtă kơ mnuih ƀuôn sang amâo mâo dŭ mdiăng, čuh ƀơ̆ng, ba čhĭ, mkra mjing kđeh čĭm mnŭ ada amâo mâo bĭt phŭn agha, boh nik mnŭ ada leh djiê. Anôk bruă ksiêm dlăng klei ruă tưp ăt mă leh mta ksiêm mkă leh anăn mtô kơ mnuih ƀuôn sang čŏng bi ktlah hjăn, ksiêm dlăng klei suiah prăl hlăm wang 21 hruê čiăng gang mkhư̆ kman mơ̆ng mnŭ ada tưp kơ mnuih. Ară ane, jih jang dŭm mta ksiêm mkă amâo mâo ôh kman mnŭ ada H5N1.