Hlue si aê mdrao Phan Thành Trinh, Khua êpul hgŭm aê mdrao mda asei čar Dak Lak, hruê knăm mơak phung aê mdrao mda asei hlue ngă asăp Awa mtă, čŏng ngă kyua klei suaih pral êpul êya thŭn anei dưi pŏk ngă hlăm kluôm čar. Hŏng akŏ “Phung aê mdrao ba anăp hlăm hdră mlih mrô, čŏng ngă kyua klei suaih pral êpul êya”, dŭm êpul leh anăn phung hlăm dŭm alŭ wăl srăng kƀĭn hlăm bruă ksiêm mkă, mbha klei ruă amâo mă prăk kơ mnuih ƀuôn sang, mkŏ mjing bruă đru kơ ala ƀuôn, mđup brei kdrăp mnơ̆ng đru bi mlih mtô bruă mdrao mgŭn hlăm bruă ksiêm mkă mdrao mgŭn.

        “Anei jing thŭn tal 12 Knơ̆ng bruă Êpul hgŭm êdam êra čar Dak Lak, Êpul hgŭm phung mda asei čar Dak Lak mkŏ mjing Knăm mơak phung aê mdrao mda asei hlue ngă asăp Awa, ngă bruă kyua klei suaih pral êpul êya. Hlăm jih 13 thŭn mkŏ mjing knăm mơak snăn êpul aê mdrao mda asei hŏng ai tiê ba anăp, phung ayŏng amai adei jih ai tiê ngă bruă leh anăn đru hgŭm mâo lu ayŏng amai adei aê mdrao mơ̆ng dŭm êpul bruă đru kơ ayŏng amai adei mdrao mgŭn să, ƀuôn hgŭm.”

Ƀri gưl anei, anôk bruă mkŏ mjing mđup brei leh 350 hnư mnơ̆ng kơ dŭm gŏ êsei, 100 hnư mnơ̆ng kơ hđeh leh anăn 20 hnư prăk hriăm hră kơ hđeh ƀun hriăm thâo ti să Hòa Phong, kdriêk Krông Bông, čar Dak Lak. Phung aê mdrao mkŏ mjing klei ksiêm mkăn, kčĕ klei suaih pral leh anăn mbha êa drao amâo mă prăk kơ dŭm êtuh čô mnuih ƀuôn sang ti 2 alŭ Ea Khiêm leh anăn Noh Prông. Êpul bruă djŏ tuôm ăt hriăm mjuăt dŭm hdră đru dŏng leh anăn gang mkhư̆ klei hđeh djiê mngăt hlăm êa kơ nai mtô leh anăn hđeh sang hră. Mkŏ mjing dŭm klei hlăp lêñ djuê ana leh anăn mbha hnư mnơ̆ng kơ hđeh điêt. Thái Thanh Sơn, K’iăng Khua Knơ̆ng bruă sang čư̆ êa să Hòa Phong, kdriêk Krông Bông brei thâo, jih jang mnuih ƀuôn sang ti 2 alŭ jing mnuih Mông mơ̆ng nah Dưr hriê dôk, klei hdĭp dleh dlan. Dŭm bruă snei dưi mkŏ mjing yuôm bhăn snăk hŏng mnuih ƀuôn sang.

“Dưi mđing dlăng mơ̆ng dŭm gưl snăn mkŏ hŏng bruă dŭm êpul đru kơ mnuih knap mñai snăn thŭn anei mâo bruă anei ăt jing yuôm bhăn kơ klei kriê dlăng klei suaih pral leh anăn mkăp êa drao kơ mnuih ƀuôn sang, mkŏ mjing bruă hlăp lêñ kơ phung hđeh, mđup brei mnơ̆ng kơ dŭm gŏ sang dleh dlan. Anei jing sa bruă dưi lač jing yuôm bhăn leh anăn đru kơ alŭ wăl lu snăk.”

  Čih yap klei đru mguôp jăk mơ̆ng phung aê mdrao, grăo thŭn, Êpul hgŭm phung êdam êra čar Dak Lak leh anăn Êpul hgŭm phung mda asei čar Dak lak mkŏ mjing klei pah mni kơ phung aê mdrao mda asei, bi mni kơ phung mda asei mâo lu klei đru mguôp kơ bruă mdrao mgŭn. Anăn jing gưl čiăng kơ phung aê mdrao kah mbha kơ klei thâo, bruă klam leh anăn dŭm klei dleh dlan hlăm hdră mă bruă. Phung aê mdrao mda asei ăt mơĭt klei mĭn, klei čiăng kơ mnuih ƀuôn sang mđĭ klei thâo săng gang mkhư̆ klei ruă tưp, mbĭt hŏng bruă mdrao mgŭn rơ̆ng kơ klei kriê dlăng klei suaih pral.

 Thŭn dih, Êpul hgŭm phung êdam êra čar Dak Lak bi mni kơ 32 čô aê mdrao leh anăn phung knuă druh mdrao mgŭn êdah êdi, lu klei tŭ dưn đru mguôp hlăm bruă mdrao mgŭn ti alŭ wăl, mđup brei mnơ̆ng kơ 2 čô aê mdrao mda asei mâo klei hdĭp dleh dlan. Aê Mdrao Đỗ Thị Thanh Trang - ti kdriêk čư̆ Mgar mâo Êpul hgŭm aê mdrao Việt Nam mđup brei klei pah mni kơ klei tŭ hlăm bruă Êpul hgŭm leh anăn hdră phung aê mdrao mda asei. Aê mdrao Đỗ Thị Thanh Trang yăl dliê:

“Ktưn hưn kơ klei duh myơr dưi mâo sa kdrêč hlăm bruă kriê dlăng leh anăn răng mgang klei suaih pral kơ yang ƀuôn. Boh nik phung mnuih djuê ƀiă, phung mâo klei hdĭp dleh dlan, phung dôk ti krĭng taih kbưi. Pô kâo ai ktang, mâo klei suaih pral snăn pô mâo klei pô dưi ngă truh kơ krĭng taih kbưi čiăng đru kơ pô mkăn”

Bri bi hdơr 133 thŭn hruê kkiêng Khua gĭt gai Hồ Chí Minh, mrâo êgao, ti ƀuôn prŏng Hải Phòng, bruă êdam êra gưl dlông CS Hồ Chí Minh, phung êdam êra Việt Nam, Êpul phung aê mdrao mda asei Việt Nam mkŏ mjing Knăm trŭn ngă bruă knăm mơak “Phung aê mdrao hlue ngă asăp Awa, ngă bruă kyua klei suaih pral êpul êya 2023” - Bi mlih mrô hlăm klei kriê dlăng kơ êpul êya. Hdră dưi mkŏ mjing hrăm mbĭt hlăm kluôm ala čar.

Anei jing thŭn tal 13 knăm mơak dưi mkŏ jing, hŏng hdră kñăm mđĭ ktang bruă ksiêm dlăng klei ruă amâo thâo hlao leh anăn ba yua mlih mrô hlăm klei đru kriê dlăng klei suaih pral kơ mnuih ƀuôn sang. Mđĭ klei bi hgŭm, bi kƀĭn phung aê mdrao hlăm bruă êpul êya, đru hlăm bruă răng mgang, mđĭ klei suaih pral, mđĭ lar hlăm bruă klam phung êdam êra leh anăn phung aê mdrao mda asei hlăm hdră mlih mrô dŭm bruă ngă mơ̆ng Êpul hgŭm./.