Anôk bruă mdrao mgŭn kdriêk M’Drak, čar Dak Lak mâo 12 Adŭ bruă leh anăn 13 anôk bruă mdrao mgŭn să, wăl krah ƀiădah knŏng mâo 43 aê mdrao leh anăn 11 aê mdrao chuyên khoa I. Hlue si Lê Thị Thủy, Khua anôk bruă mdrao mgŭn kdriêk M’Drak, leh thŭn 2019 hŏng bruă hlue ngă dŭm Hdră mtrŭn 37 leh anăn Hdră mtrŭn 07 mơ̆ng  Phŭn bruă mdrao mgŭn kơ klei bi mŭt dŭm Anôk bruă mdrao mgŭn lu mta snăn anôk bruă mdrao mgŭn nah gŭ klam lu bruă klam msĕ si: Ksiêm mkă mdrao mgŭn, hdră ƀă kkiêng anak gŏ sang, pŏk ngă dŭm hdră hdră kñăm ala čar kơ mdrao mgŭn…Sa čô knuă druh ngă bruă lu mta hlăk êjai hnơ̆ng bruă knuă lu. Klei anei ngă kơ knua druh mdrao mgŭn mơ̆ng anôk bruă gĭr ktưn lu hĭn 2 truh 3 blư̆ kơh bi leh bruă klam dưi jao. Bruă lu, mnuih mă bruă kƀah ngă kơ êpul mă bruă mdrao mgĭn ñah gŭ êgao hnơ̆ng. Lê Thị Thủy brei thâo:

“Wăt tơdah pô mâo lu klei čiăng ruah leh anăn ăt mâo lu hdră êlan mơ̆ng Anôk bruă ăt msĕ mơh iêô jak Hdră mtrŭn mơ̆ng Êpul gơ̆ng bruă ƀuôn sang čar ƀiăda ăt kăn mâo aê mdrao wĭt hlăm lu blư̆ hrŏng ruah. Kyua anăn hŏng anôk bruă, êngao kơ pral mtô bi hriăm knuă druh tinăn mtam, ăt čang hmăng mâo dŭm hdră êlan rơ̆ng kơ mta phŭn kơ bruă đru, iêô jak mdê hjăn kơ knuă druh, boh nik phung aê mdrao leh anăn knuă druh mâo klei thâo kơ bruă knuă ti nah gŭ.”

Wăt tơdah hnơ̆ng jhưng đih, kdrăp mdrao mgŭn djăp ênŭn, ƀiădah kyua amâo dưi hrŏng ruah aê mdrao anăn hlăm dŭm thŭn êgao Anôk bruă mdrao mgŭn kdriêk Krông Ƀuk, čar Dak Lak amâo dưi mkŏ mjing ôh anôk bruă điêt ăt msĕ mơh pŏk ngă hdră mnêč mdrâo. Hlue si Trần Anh Hùng, K’iăng Khua anôk bruă mdrao mgŭn kdriêk Krông Ƀuk, anăn jing mta phŭn hmăi kơ bruă ksiêm mkă mdrao mgŭn, ăt msĕ mơh hnơ̆ng jăk hdră bruă mdrao mgŭn ti anôk bruă.

   “Phung aê mdrao kƀah snăk, ară anei phung aê mdrao dôk mă bruă ti Krông Ƀuk msĕ si mrâo leh ruê̆ hriă, ka mâo hră mơar mă bruă, ka mâo klei thâo. Boh nik kƀah aê mdrao hlăm bruă mdrao êngao asei mlei, anôk mdrao kơ amĭ ba tian leh anăn kơrŭ wĭt klei suaih pral leh anăn phung aê mdrao mkăn anăn bruă tŭ jum mdrao kơ klei kkiêng nâk msĕ si knŏng ngă bruă mdrao tal êlâo leh anăn ba kơ anôk mdrao prŏng hĭn. Bi bliah ăt kăn dưi pŏk ngă kyua amâo mâo aê mdrao bliah. Kơ klei ksiêm mkă snăn Anôk bruă mdrao mgŭn amâo mâo ôh aê mdrao kơ anôk đơ điêt, hliê snăn ăt kăn dưi ksiêm mkă mdrao mgŭn leh anăn mkăp hră ksiêm mkă mdrao mgŭn kơ mnuih ƀuôn sang.”

 Hlue si Knơ̆ng bruă mdrao mgŭn Dak Lak kluôm čar dôk kƀah êbeh 1.700 ngă bruă mdrao mgŭn, leh anăn knŏng mâo ênoh 7,15 aê mdrao/ 1 êbâo čô mnuih ƀuôn sang mkă hŏng hdră kčah 8 aê mdrao/1 êbâo čô mnuih ƀuôn sang. Klei mnuih ruă mâo lu dôk mâo ti lu anôk bruă mdrao mgŭn nah gŭ ti čar, hŏng hnơ̆ng jhưng đih mdrao ti hnơ̆ng 110% truh 130%. Mta phŭn kƀah aê mdrao ti anôk bruă nah gŭ jing kyua wăl hdĭp mda mă bruă rŭng răng, dleh dlan. Hlăk êjai anăn, hnơ̆ng prăk mlan dưi dưn hlue si anăn bruă knuă leh anăn klei đru mkăn hlue si hnơ̆ng prăk mlan ƀiă hĭn adôk lu, ka năng ôh hŏng bruă knuă.

 Čiăng msir mgaih klei anei, bruă mdrao mgŭn Dak Lak kčĕ kơ Knơ̆ng bruă sang čư̆ êa čar hdră msir ba jao ênoh bruă mdrao mgŭn mkăp kơ dŭm alŭ wăl kriê dlăng leh anăn bi liê.  Mbĭt anăn Bruă mdrao mgŭn ăt srăng mkŏ mjing sa Hdră bruă yua aê mdrao ti êngao hlăm klei ksiêm mkă mdrao mgŭn ti sang êa drao knŭk kna leh anăn tla dŭm klei dưi dưn năng djŏ. Bruă ruah phung aê mdrao ti năn dưi mđing tal êlâo hlue ngă hlăm wưng kơ anăp. Nay Phi La, Khau Knơ̆ng bruă mdrao mgŭn čar Dak Lak brei thâo:

“ Ară anei snăn  Knơ̆ng bruă mdrao mgŭn ba mdah lu hdră msir msĕ si phung amĭ kkiêng, hriê kơ prŏng ti alŭ wăl srăng dưi jum kơ alŭ wăl anăn. Thŭn 2023 srăng lŏ dơ̆ng hrŏng ruah boh nik jing mđing tal êlâo sang hră gưl prŏng Lăn Dap Kngư, Sang hră gưl prŏng Buôn Ama Thuôt ăt msĕ mơh phung sinh viên mâo klei čiăng wĭt mă bruă ti čar.”

Kƀah mnuih mă bruă, boh nik phung aê mdrao dôk jing klei lông dlăng hŏng bruă mdrao mgŭn Dak Lak. Wăt tơdah hlăm wưng êgao, čar pŏk ngă leh lu hdră msir iêô jak phung aê mdrao ăt msĕ mơh mđing dlăntg tiŏ nao phung knuă druh nao mtô mđĭ klei thâo, kjădah snăn ăt ka ngă djŏ klei čiăng boh sĭt. Čiăng lŏ dơ̆ng krơ̆ng kjăp leh anăn iêô jak phung aê mdrao kơ bruă knuă ti anôk bruă mdrao mgŭn nah gŭ hlăm knŭk kna, êngao kơ hdră êlan iêô jak, brei mâo thiăm dŭm hdră msir klă klơ̆ng mkăn čiăng diñu hơĭt ai tiê mă bruă, mguôp hŏng bruă knuă./.