VOV4.Êđê- Klei ruă êngoh bi blĕ êrah dôk bluh đĭ ktang ti kdriêk knông lăn Ea Soup, čar Dak lak êjai ênoh mnuih nao đih mdrao ti sang êa đrao ƀrư̆ hruê ƀrư̆ đĭ. Hluê si klei tĭng mkă mơ̆ng anôk bruă mdrao mgŭn kdriêk Ea Soup, čar Dak Lak, khădah ka truh ôh yan hjan, ƀiădah kluôm kdriêk mâo ƀuh leh 117 čô mâo klei êngoh bi blĕ êrah, đĭ 115 čô ruă mkă hŏng wưng anei thŭn 2021. Mâo leh 113 čô nao đih mdrao ti sang êa drao. Klei êngoh anei dôk tưp lar pral ti să Čư̆ Mlêñ leh anăn wăl krah Ea Soup hŏng 24 alŭ, ƀuôn, alŭ ƀuôn sang mâo phung mâo klei êngoh anei.

 Aê mdrao Kiều Thị Thanh Hà, ti anôk bruă mdrao mgŭn kdriêk Ea Soup brei thâo, anôk bruă mkŏ mjing leh 12 êpul gang mkhư̆ klei ruă tưp hiu ksiêm dlăng, mgaih msir dŭm anôk mâo klei ruă. Mbĭt anăn, hluê ngă hdră êlan mtô kơ mnuih ƀuôn sang mâo hdră mdjiê hluăt lŏk, čŏng gang mkhư̆ klei êngoh bi blĕ êrah ti anăp klei hŭi hyưt klei ruă bluh đĭ ktang hlăm yan hjan.

        Pô mblang: Y-Ƀel Êban