VOV4.Êđê- Hlue si ênoh mrô ksiêm yap mơ̆ng Anôk bruă ktuê dlăng klei ruă čar Dak Lak, mơ̆ng akŏ mlan 10 truh ară anei, klei ruă êngoh bi ƀlĕ êrah ti čar dleh ktuê dlăng, ênoh mnuih ruă mrâo đĭ leh anăn mâo nanao mnuih djiê kyua klei ruă anei. Knŏng 10 hruê akŏ mlan 10 mâo giăm 500 čô êngoh bi ƀlĕ êrah, mđĭ ênoh ruă hlăm thŭn 2022 ti Dak Lak đĭ êbeh 7 êbâo čô. Năng mđing hĭn, mơ̆ng akŏ mlan 10 truh ară anei mâo leh 2 čô mnuih djiê kyua êngoh bi ƀlĕ êrah.

  Hoàng Hải Phúc,  K’iăng Khua anôk bruă ktuê dlăng klei ruă čar Dak Lak brei thâo, hŏng adiê hjan sui hlăm dŭm hruê êgao ti čar, klei ruă êngoh bi ƀlĕ êrah mâo klei bi knăl đĭ hlăm wưng kơ anăp. Bruă mdrao mgŭn Dak Lak mđĭ bruă hâo hưn, mtô mblang, mđĭ klei thâo săng mnuih ƀuôn sang hlăm bruă gang mkhư̆ klei ruă; Pŏk ngă hdră bi doh wăl hdĭp mda, mdjiê hluăt lŏk ti grăp alŭ, ƀuôn, gŏ sang./.

Pô mblang: H’Zawut Ƀuôn Yă