VOV4.Êđê- Hlue si ênoh mrô ksiêm yap mơ̆ng Anôk bruă ktuê dlăng čar Dak Lak, yap truh hruê 28/9, kluôm čar čih yap 729 čô mâo klei ruă jơ̆ng kngan ƀăng êgei đĭ êbeh 30% mkă hŏng wưng anei thŭn 2021. Ênoh mnuih ruă dưi yap ti 15/15 kdriêk, wăl krah, ƀuôn prŏng mơ̆ng čar, hlăm anăn dŭm alŭ wăl mâo mnuih ruă jơ̆ng kngan ƀăng êgei lu msĕ si ƀuôn prŏng Ƀuôn Ama Thuôt, kdriêk Ƀuôn Đon, Čư̆ Mgar, Krông Pač leh anăn wăl krah Ƀuôn Hô.

 Lê Phúc - K’iăng Khua Anôk  ktuê dlăng klei ruă čar Dak Lak brei thâo, čiăng gang mkhư̆ klei ruă jơ̆ng kngan ƀăng êgei, bruă mdrao mgŭn Dak Lak srăng ktuê dlăng tliêr kjăp boh klei ruă tưp, hmao thâo ƀuh dŭm anôk mâo klei ruă mrâo bluh mâo, čuăl krĭng, msir mgaih anôk mâo klei ruă leh anăn đru kơ anôk bruă nah gŭ hlăm bruă mkhư̆ klei ruă tưp, đru dŏng mjêč, mdrao sĭt čiăng êdi./.

Pô mblang: H’Zawut Ƀuôn Yă