Dôk kiă anak mniê 16 mlan đih mdrao ti anôk mdrao kơ phung hđeh sang êa drao prŏng krĭng Lăn Dăp Kngư, Amai Huỳnh Thị An ti să Čư̆ Mlan, kdriêk Ea Sup, čar Dak Lak brei thâo, mâo hŏng anei sa hruê kăm, ƀuh anak mtŭk lu, êmăn hlăm asei mlei, êngoh hlơr leh anăn hlăm plă kngan, jơ̆ng ƀlĕ kđuč kyuanăn ba anak nao mkă dlăng. Tinei aê mdrao bi klă ĕ djŏ klei ruă kngan jơ̆ng ƀăng êgei. Leh tlâo hruê mdrao ti sang ƀiădah amâo mâo hlao, gŏ sang ba ĕ nao đih mdrao ti sang êa drao prŏng krĭng Lăn Dăp Kngư:

            “Êjai hriê tinei ƀuh kđuč bŏk lu ti 2 plă jơ̆ng leh anăn mâo ƀiă ti plă kngan. Pô ăt kăn thâo lu lei kơ klei ruă kngan, jơ̆ng ƀăng êgei kyuanăn mnơ̆ng hlăp hlăm sang pô brei ñu hlăp lêñ sơnăn yơh, kăn mĭn leh yan anei bluh mâo klei ruă anei.”

Ăt dôk kiă anak 7 thŭn djŏ klei ruă kngan, jơ̆ng ƀăng êgei ti sang êa drao prŏng krĭng Lăn Dăp Kngư, amai Nguyễn Thị Diện ti ƀuôn hgŭm An Bình, wăl krah ƀuôn Hồ brei thâo, leh 5 hruê mdrao mgŭn, anak amai hlao leh klei êngoh, klei suaih pral ƀrư̆ ƀrư̆ mâo klei hơĭt:

 “Mơ̆ng êlâo dih ka tuôm djŏ, ti gŭ anăn ƀiă mơh mnuih djŏ, kyuanăn pô kăn thâo klă lei. Pô wĭt srăng bi doh hĭn, răng hlăm klei êrô êbat, hiu hlăp”.

            Hluê si aê mdrao Huỳnh Thị Bích Như, ti anôk mdrao kơ hđeh, Sang êa drao prŏng krĭng Lăn Dăp Kngư, mơ̆ng akŏ thŭn truh kơ ară anei, anôk mdrao drông jum, mdrao kơ êbeh 85 čô hđeh mâo klei ruă jơ̆ng kngan, ƀăng êgei. Năng mđĭ hĭn, hlăm wang sa mlan hŏng anei, ênoh mnuih ruă hriê đĭ mdrao đĭ lu. Ară anei anôk mdrao dôk mdrao kơ 15 čô, hlăm anăn mâo 2 čô ruă kjham. Aê mdrao Huỳnh Thị Bích Như mâo klei mtô:

 “Pô mkhư̆ mgang hŏng hdră mđĭ ai bi kdơ̆ng hlăm asei mlei kơ anak, ƀơ̆ng djăp mta jăk kơ asei mlei, mñăm lu êa leh anăn bi mbŏ dŭm mta vitamin mđĭ ai bi kdơ̆ng hlăm asei mlei kơ anak leh anăn tlŏ ênŭm dŭm mta vaccine gang mkhư̆ klei mtŭk hdrak leh anăn mtô kơ anak rao jơ̆ng kngan bi doh ăt dưi mkhư̆ klei tưp lar.

Hluê si Anôk bruă ksiêm dlăng klei ruă tưp čar Dak Lak, yap mơ̆ng akŏ thŭn truh kơ ară anei, hlăm čar mâo êbeh 100 čô mâo klei ruă jơ̆ng kngan ƀăng êgei hlăm 15 kdriêk, wăl krah, ƀuôn prŏng. Hlăm anăn mâo 1 čô djiê. Hlăm brô 1 mlan hŏng anei, mrâo mŭt hlăm yan hjan, ênoh mnuih mâo klei ruă kngan jơ̆ng ƀăng êgei đĭ lu, kah knar sa hruê kăm mâo mơ̆ng 12 – 15 čô ruă. Bruă sang čư êa čar Dak Lak mâo leh hră mtrŭn mrô 4953 kơ bruă mđĭ hĭn bruă gang mkhư̆ klei ruă tưp, klei ruă kngan jơ̆ng ƀăng êgei, Dhar bruă mdrao mgŭn čar gĭt dŭm anôk mdrao mgŭn mđĭ hĭn bruă ksiêm dlăng, ktuê dlăng kwang dar, mgaih msir anôk mâo klei ruă, mtrŭt mđĭ bruă hâo hưn kơ bruă gang mkhư̆ klei ruă tưp truh hŏng mnuih ƀuôn sang. mbĭt anăn bi mguôp hŏng knơ̆ng bruă mtô mjuăt bi hriăm mtô kơ dŭm sang hră hdră êlan gang mkhư̆ klei tưp lar. Hoàng Hải Phúc, k’iăng khua kiă kriê Anôk bruă mtô mjuăt bi hriăm čar Dak Lak brei thâo:

         “Hmei mâo leh klei kčĕ kơ Knơ̆ng bruă mdrao mgŭn gĭt gai dŭm anôk bruă leh anăn kčĕ hŏng Dhar bruă mtô mjuăt bi hriăm hâo hưn kơ klei huă ƀơ̆ng ksă, mnăm êa doh, bi mdoh, ruă kngan leh anăn hluê ngă 6 mlan mtă mơ̆ng Phŭn bruă mdrao mgŭn mtă kơ mnuih ƀuôn sang. Hmei lŏ bi mguôp hŏng bruă mtô mjuăt bi hriăm mtô kơ bruă tơdah tam mâo hđeh mâo klei ruă anei srăng bi ktah mtam, mtrŭt mjhar dŭm gŏ sang boh doh sang dôk, bi doh kngan jơ̆ng ƀăng êgei êlâo kơ huă bơ̆ng leh anăn leh nao eh m’iêk.