Tal tlâo ba anak điêt nao ti Anôk mdrao mgŭn tlŏ vaccin 5 hlăm 1, ƀiădah Amai H’Čuôn Ksơr, să Krông Jing, kdriêk Mdrak ăt lŏ wĭt kyua ka mâo vaccin. Amai H’Čuôn brei thâo, ñu hmư̆ klei hâo hưn hlăm rađio, giăm anei mâo lu klei ruă tưp dôk bluh mâo, ƀiădah ba anak nao tlŏ snăn amâo mâo vaccin ôh anăn ñu rŭng răng snăk:

   “Anak kâo 4 mlan leh ƀiădah ka tlŏ vaccin 5 hlăm 5. Ară anei kâo atăt anak hruê tlŏ čiăng mkhư̆ klei ruă duam kăn mâo vaccin mơh. Kâo čang hmăng hnưm mâo vaccin tlŏ kơ anak.”

Amai H’Yên Niê, Khua anôk bruă mdrao mgŭn să Krông Jing, kdriêk Mdrak brei thâo, ară anei kluôm să mâo êbeh 220 čô hđeh 2 mlan kơ dlông brei tlŏ vaccin 5 hlăm 1 ƀiădah ka mâo. Hlue si Ñu bruă kƀah vaccin sui amâo djŏ knŏng ba klei amâo myun kơ hđeh ôh, ƀiădah lŏ ngă kơ bruă mtrŭt mjhar amĭ ama ba anak nao tlŏ mgi dih:

         “Ară anei kyua kƀah vaccin lu snăk, boh nik vaccin 5 hlăm 1 êbeh leh 6 mlan amâo mâo vaccin ôh, êngao anăn aruăt vaccin bi ƀlĕ čut aruăt 1 leh anăn vaccin DPT ăt kăn mâo čiăng tlŏ kơ hđeh, ƀrư̆ jing ăt dleh dlan hlăm bruă hâo hưn kơ phung amĭ ama nao tlŏ. Si tô mô diñu hriê tlŏ tal 1 amâo mâo, tal 2 kăn mâo, tal 3 kăn mâo snăn êdei anei pô hâo hưn mtô mblang dleh dlan snăk”

        Hlue si Lê Thị Thủy, Khua Anôk bruă mdrao mgŭn kdriêk M’Drak, kdriêk anei jing sa hlăm dŭm dŭm alŭ wăl mâo lu să hlăm krĭng amâo tlŏ ênŭm vaccin. Hlăm dŭm thŭn êgao, bruă mdrao mgŭn kdriêk tuôm hŏng lu klei dleh dlan bruă mtrŭt mjhar hđeh nao tlŏ djŏ leh anăn ênŭm. Ară anei lŏ kƀah vaccin snăn huĭ srăng ba klei kƀah ai dưi mdrơ̆ng hlăm êpul êya lu snăk:

         “Êlâo dih wăt tơdah dưi mkăp vaccin mơ̆ng Phŭn bruă mdrao mgŭn snăn Mdrak leh anăn dŭm kdriêk ƀun ăt tuôm hŏng klei dleh dlan kơ bruă tlŏ mgang boh nik dŭm să krĭng taih kbưi, krĭng mnuih djuê ƀiă, ară anei vaccin kƀah snăn dleh dlan hĭn. Bruă vaccin tlŏ mgang kơ hđeh brei dưi ngă djŏ wưng leh anăn hlue si hdră, tơdah ñu êmưt leh anăn amâo hmao srăng hmăi kơ hdră tlŏ mgang kơ hđeh”

Kƀah vaccin tlŏ mgang kơ hđeh jing klei dôk mâo ti čar Dak Lak. Hlue si Võ Minh Hùng, Khua Anôk bruă mdrao mgŭn ƀuôn prŏng Ƀuôn Ama Thuôt, mơ̆ng akŏ thŭn truh ară anei, ƀuôn prŏng jih leh vaccin DPT, bi vaccin 5 hlăm 1 mrâo knŏng mkăp sa blư̆ hlăm mlan 1 hŏng 368 aruăt, hlăk êjai klei čiăng grăp thŭn hlăm ƀuôn prŏng hlăm brô 15 truh 18 êbâo aruăt vaccin 5 hlăm 1.

         “Truh wưng ară anei hđeh ti gŭ 1 thŭn tlŏ ênŭm 8 aruăt vaccin ti ƀuôn prŏng hmei mrâo mâo 30%, snăn ăt adôk ƀiă mkă hŏng hdră kčah jih thŭn 98%. Anăn jing hlăm wưng kơ anăp ăt mtă brei hmao mkăp vaccin 5 hlăm 1 leh anăn vaccin hlăm hdră tlŏ mgang pŏk mlar ala čar čiăng mđĭ pral hnư̆ng tlŏ kơ hđeh, đru răng mgang klei suaih pral kơ hđeh”.

Hlue si ênoh mrô ksiêm yap mơ̆ng Anôk bruă ktuê dlăng klei ruă čar Dak Lak, hlăm ênoh 12 mta/êpul vaccin hlăm gdră tlŏ mgang pŏk mlar kơ hđeh hlăm thŭn 2023 Dak Lak mrâo rơ̆ng djăp 2 mta vaccin leh anăn bi hrut hriêng aruăt ariêng, 2 mta vaccin jing 5 hlăm 1 leh anăn DPT jih leh, ênoh adôk knŏng djăp tlŏ kơ hđeh truh jih mlan 8.

Hlue si Lê Phúc, K’iăng Khua Anôk bruă ktuê dlăng klei ruă čar Dak Lak, mta phŭn bruă kƀah phŭn mkăp vaccin jing kyua mơ̆ng thŭn 2023 leh mlih hdră kñăm mdrao mgŭn mnuih ƀuôn sang jing bruă kñam bi liê jêñ jêñ kơ dŭm alŭ wăl. Khădah snăn, hlăm boh sĭt bruă ba ngăn prăk čiăng kơ alŭ wăl blei vaccin lŏ mâo klei gun kpăk kơ ênoh. Anôk bruă ktuê dlăng klei ruă čar kƀĭn klei čiăng vaccin leh anăn hdră kčah mkăp vaccin mơ̆ng thŭn 2023 leh anăn 2024 čiăng kčĕ kơ Knơ̆ng bruă mdrao mgŭn hưn hŏng Knơ̆ng bruă sang čư̆ êa čar mkăp prăk bi liê čiăng blei. Lê Phúc-K’iăng Khua Anôk bruă ktuê dlăng klei ruă čar Dak Lak brei thâo:

         “Čiăng mjing klei dưi mdrơ̆ng jăk hlăm êpul êya snăn brei mđĭ ênoh tlŏ vaccin leh anăn si bĕ ngă čiăng tlŏ djŏ tlŏ ênŭm snăn hlăk anăn ai dưi mdrơ̆ng srăng rơ̆ng leh anăn mđĭ lar jăk. Khădah snăn anôk ka djăp hlăm wưng bhiâo, tơdah mâo vaccin snăn srăng lŏ tlŏ mbŏ kơ hđeh. Hmei huĭ hĭn jing phung hđeh ka tuôm tlŏ sa aruăt ôh, ară anei kƀah vaccin snăn klă sĭt srăng hmăi kơ klei suaih pral hđeh.”

Hlue si phung thơ̆ng kơ bruă mdrao mgŭn, kƀah vaccin srăng hmăi kjham kơ boh tŭ hdră tlŏ mgang pŏk mlar. Klei kƀah ai mdrơ̆ng hŏng klei ruă tưp srăng mâo tơdah ênoh hđeh amâo dưi tlŏ mgang djăp ênŭm, djŏ wưng kčah, klei anei mđĭ klei ruă tưp lŏ wĭt bluh mâo./.